Mannlíf

Loks er komið að því að opna Safnahús Skagfirðinga eftir gagngerar endurbætur. Húsið verður til sýnis föstudaginn 30. október milli kl 16 og 18 og verður lyftan tekin formlega í notkun.

Aðalfundur Leikfélags Blönduóss fór fram miðvikudaginn 14. október sl. Að sögn Guðmundar K. Ellertssonar formanns leikfélagsins var mætingin á fundinn heldur dræm og því var ekki hægt að taka neinar ákvarðanir varðandi uppsetningu á leikriti.

Hagyrðingakvöld verður í Menningarhúsinu Miðgarði föstudaginn 30. október kl. 20. Forseti Alþingis, Einar K. Guðfinnsson stjórnar þingi hagyrðinga, sem eru Sr. Hjálmar Jónsson, Halldór Blöndal, Sigurður Hansen, Gunnar Rögnvaldsson og Eyþór Árnason.

Lárus Guðmundsson kom færandi hendi í Höfðaskóla í síðustu viku þegar hann gaf bókasafni skólans veglega bókagjöf. „Við kunnum Lárusi bestu þakkir fyrir vitandi að bækur þessar eiga eftir að nýtast nemendum og kennurum vel á komandi árum,“ segir á heimasíðu skólans.

Aðsókn á Kardemommbæinn í uppsetningu Leikfélags Sauðárkróks hefur verið frábær og hefur því verið ákveðið að bæta við fjórum sýningum, laugardaginn 31. október, kl. 14 og 17 og sunnudaginn 1. nóvember, kl. 14 og 17.

Dagana 21. – 23. október voru þemadagar í Árskóla á Sauðárkróki. Þemað að þessu sinni tileinkað starfi skólans, nýjungum í kennsluháttum, hefðum, viðburðadögum, árshátíðum o.fl. Þemadögum lauk svo með sýningu og opnu húsi í skólanum sl. laugardag.

Við Suðurgötu á Sauðárkróki stendur Ártún, 125 ára gamalt hús. Það hefur þó ekki alla tíð staðið á sama stað heldur var það flutt á stokkum utan af Aðalgötu árið 1919, þangað sem það stendur nú. Húsið hefur lengst af verið í eigu sömu fjölskyldunnar, nú síðast Björns Ásgrímssonar. Þegar hann lést, 94 ára að aldri þann 29. júlí sl., eignaðist bróðursonur hans Gísli Einarsson húsið.

Fjöldi Skagfirðinga og nærsveitamanna gerði sér glaðan dag síðastliðinn föstudagskvöld og mætti á skemmtikvöldið Lúðar og létt tónlist í Miðgarði. Þar fóru á kostum valinkunnar kempur í tónlist og uppistandi, Hvanndalsbræður, Gísli Einarsson og Sólmundur Hólm.

Matarkistan Skagafjörður og Rúnalist í Skagafirði voru meðal aðila sem tóku þátt í matarhátíðinni Local Food á Akureyri á laugardaginn var. Hátíðin, sem haldin verður annað hvert ár, er einn stærsti viðburður sinnar tegundar á landinu.

Í öðrum þætti Fyrirmyndarfrumkvöðla fáum við að kynnast Lilju Gunnlaugsdóttur, sem rekur handverksfyrirtækið Skrautmen, og líta inn í vinnustofu hennar að Áshildarholti í Skagafirði. Fyrirmyndarfrumkvöðlar er samstarfsverkefni Feykis og Skottu kvikmyndafjelags.