rabb-a-babb 54: Keli kennari
Nafn: Þorkell Vilhelm Þorsteinsson.
Árgangur: 1956.
Fjölskylduhagir: Kvæntur Lydiu Jósafatsdóttur og á með henni Helgu Elísu "83, Margréti Silju "84 og Ingva Aron "90.
Starf / nám: Aðstoðarskólameistari við FNV. B.A. í ensku, náms- og starfsráðgjafi, ökukennari og svæðisleiðsögumaður.
Bifreið: Skoda Octavia árg. 2006.
Hestöfl: Á annað hundrað.
Hvað er í deiglunni: Undirbúningur skólahalds næsta vetur.
Hvernig hefurðu það? Alveg sérdeilis gott.
Hvernig nemandi varstu? Ég var fyrirmyndarnemandi sem mætti í alla tíma og stundaði heimanámið fyrir utan árið sem ég eignaðist skellinöðruna. Þá slaknaði heldur á náminu.
Hvað er eftirminnilegast frá fermingardeginum? Þegar ég fékk rakvélina í fermingargjöf. Ég var löngu búinn að týna henni þegar ég þurfti loksins að nota hana.
Hvað ætlaðir þú að verða þegar þú yrðir stór? Lögga eða flugmaður. Ég varð reyndar lögga um tíma, en dreymir enn um að læra að fljúga. Miðað við allar brotlendingarnar í Flight Simulator er sennilega best að ég láti það vera.
Hvað hræðistu mest? Að ráða ekki við verkefni sem ég tek að mér.
Hver var fyrsta platan sem þú keyptir (eða besta)? Á háskólaárum mínum gaf virðulegt piparsveinafélag á Nýja Garði mér plötu með hljómsveitinni Ten Years After með laginu "I Can't Live Without Lydia". Hún er í séstöku uppáhaldi þó tónlistin sé hræðileg.
Hvaða lag ertu líklegastur til að syngja í Kareókí? Af mannúðarástæðum myndi ég líklega koma mér undan því að syngja.
Hverju missirðu helst ekki af í sjónvarpinu (fyrir utan fréttir)? Breskum spennu- og gamanþáttum. Ef Mr. Bean bregður fyrir þá er ég límdur við sjónvarpið. Breskur húmor er óborgnalegur.
Besta bíómyndin? Silent Movie, með Mel Brooks. Það var svo lítið talað í henni.
Bruce Willis eða George Clooney / Angelina Jolie eða Gwyneth Paltrow? Buce Willis. Hann er lang flottastur.
Hvað fer helst í innkaupakörfuna sem ekki er skrifað á tossamiðann? Forboðin epli á borð við nammi og harðfiskur frá Sporði á Eskifirði.
Hvað er í morgunmatinn? Súrmjólk með Cherrios. Það þarf svo lítið að hafa fyrir því.
Uppáhalds málsháttur? Ekki er jakki frakki, nema síður sé.
Hvaða teiknimyndapersóna höfðar mest til þín? Ástríkur. Hann er tær snilld.
Hvert er snilldarverkið þitt í eldhúsinu? Að raða í uppvöskunarvélina. Annars reyni ég að valda sem minnstu tjóni í eldhúsinu.
Hver er uppáhalds bókin þín? Bókin sem ég les hverju sinni.
Ef þú gætir hoppað upp í flugvél og réðir hvert hún færi, þá færirðu... Ég færi sennilega eyjarinnar til La Reunion í Indlandshafi til kunningja míns þar.
Hvað fer mest í taugarnar á þér í fari þínu? Óþolinmæði.
Hvað fer mest í taugarnar á þér í fari annarra? Kæruleysi og sérhlífni.
Enski boltinn - hvaða lið og af hverju? Manst' eftir Júnætid? Er það ekki lið í enska boltanum?
Hvaða íþróttamanni / dómara hefurðu mestar mætur á? Ég hef mestar mætur á íþróttamanninum sem stundar íþróttir sér til ánægju og yndisauka.
Heim í Búðardal eða Diskó Friskó? Heim í Búðardal. Reyndar á Diskó Friskó vel við réttu tækifærin.
Hver var mikilvægasta persóna 20. aldarinnar að þínu mati? Hvað mig varðar þá eru það mamma og pabbi. Án þeirra væri ég ekki hér. Hvað heiminn varðar þá eru það líklega vísindamenn um allan heim.
Ef þú ættir að dvelja aleinn á eyðieyju, hvaða þrjá hluti tækirðu með þér? Veiðigræjur, eldfæri og bók.
Hvað er best í heimi? Fjöskyldan og fegurð Skagafjarðar.
Fleiri fréttir
-
Erum allar ready í alvöru seríu - segir Brynja Líf
feykir.is Skagafjörður, Íþróttir, Ljósmyndavefur 25.04.2024 kl. 14.22Það hefur verið gaman að fylgjast með liði Stólastúlkna í körfunni í vetur og nú spilar liðið til úrslita um sæti í Subway-deildinni að ári. Það er mikil breyting á liðinu frá því árið áður, mörg púsl bættust í hópinn síðasta haust sem Helgi þjálfari hefur náð að sameina í heilsteypta mynd. Eitt lykilpúslið er Brynja Líf Júlíusdóttir, 16 ára stúlka frá Egilsstöðum, sem kom á Krókinn til að spila með liði Tindastóls og stunda nám á náttúruvísindabraut og í körfuboltaakademíu FNV. Hún er ein efnilegasta körfuboltastúlka landsins í sínum árgangi og í síðasta leiknum gegn Snæfelli á dögunum þá gerði hún átta af tíu stigum Tindastóls í framlengingu.Meira -
Kvenfélag Svínavatnshrepps hélt upp á 150 ára afmælið með kökuveislu af gamla skólanum
feykir.is Austur-Húnavatnssýsla, Mannlíf 25.04.2024 kl. 13.43Kvenfélag Svínavatnshrepps hélt upp á 150 ára afmæli sitt 20. apríl sl. Var öllum kvenfélagskonum í Austur-Húnavatnssýslu boðið í kaffi í Dalsmynni. Þar var mikil kökuveisla sem einkenndist af því að hafa kaffibrauð sem hugsanlega hefði getað verið á borðum er kvenfélagið var stofnað.Meira -
Gleðilegt sumar
feykir.is Skagafjörður, Austur-Húnavatnssýsla, Vestur-Húnavatnssýsla 25.04.2024 kl. 11.55„Það er komið sumar...“ sungu Mannakorn um árið og það á við í dag. Í það minnsta er sumardagurinn fyrsti í dag og þó það sé kannski ekki sami stemmari fyrir þessum degi á þessari öld og var á þeirri síðustu þá fylgir deginum oftar en ekki bjartsýni og ylur í hjarta – já, eiginlega sama hvernig viðrar.Meira -
Giggó-appið snýst um að bjarga sér | Spjallað við Kjartan Hall
feykir.is Skagafjörður, Mannlíf, Lokað efni 25.04.2024 kl. 10.38Í janúar rak blaðamaður augun í nýtt app sem kallast Giggó sem er sett fram af Alfreð. Þar sem það var gamalkunnur Skagfirðingur út að austan, lista- og íslenskumaðurinn Kjartan Hallur frá Melstað í Óslandshlíðinni, sem kynnti þetta á Facebook, var að sjálfsögðu tilvalið að senda á hann nokkrar spurningar. Kjartan Hallur er í Alfreðs teyminu og segir starf sitt hjá Alfreð fyrst og fremst vera að ritstýra, semja texta og samræma skilaboð fyrir appið, heimasíðu og þjónustuvefi Alfreðs. „Og núna hefur Giggó-appið bæst við á verkefnalistann. Þar undir er heimasíða, bloggskrif og vinna í markaðssetningu á þessu nýja verkfæri fyrir íslenska gigg-hagkerfið,“ segir hann.Meira -
Rabb-a-babb 225: Atli Freyr
feykir.is Skagafjörður, Rabb-a-babb 25.04.2024 kl. 09.11Atli Freyr Rafnsson frá Króknum fékk það verðuga verkefni að svara Rabb-a-babbi í Feyki og var það frekar strembin fæðing en útkoman svona ljómandi góð. Atli Freyr er fæddur árið 1997 eða um það leyti sem Tiger Woods vann sitt fyrsta Master mót og fyrsti þáttur af South Park fór í loftið.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.