Söngur að sunnan
Karlakór Reykjavíkur verður á faraldsfæti næstkomandi laugardag en þá heimsækir hann Skagafjörð og Siglufjörð og heldur tónleika á báðum stöðum. Fyrri tónleikarnir verða í Miðgarði í Skagafirði og hefjast þeir klukkan 14.00. Að þeim loknum verður ekið til Siglufjarðar þar sem kórinn mun syngja í kirkjunni kl. 20. Með í för eru sópransöngkonan Sigrún Hjálmtýsdóttir, Diddú, auk tónlistarhjónanna Önnu Guðnýjar Guðmundsdóttur píanóleikara og Sigurðar Ingva Snorrasonar klarínettuleikara. Þá mun kórfélaginn og Skagfirðingurinn Árni Geir Sigurbjörnsson tenór syngja einsöng á tónleikunum. Stjórnandi Karlakórs Reykjavíkur er Friðrik S. Kristinsson.
Karlakór Reykjavíkur fagnar 90 ára afmæli í ár, en hann var stofnaður 3. janúar 1926 af Sigurði Þórðarsyni tónskáldi sem var jafnframt fyrsti stjórnandi kórsins. Ferðin norður er liður í að fagna þessum tímamótum og er það engin tilviljun að þessir áfangastaðir séu valdir því kórinn á nokkur tengsl við þá báða. Í fyrstu söngferð sinni, sem farin var með Gullfossi árið 1929, kom kórinn við á Siglufirði og hélt þar tónleika. Voru það þriðju tónleikar kórsins í þeirri ferð, en áður hafði hann sungið á Bíldudal og Ísafirði. Þá eiga nokkrir kórmenn ættir sínar að rekja til Siglufjarðar og elstu félagarnir, bræðurnir Jón og Guðjón Hallur Hallssynir slitu þar barnsskónum. Þeir bræður hafa ljáð kórnum krafta sína fjölmarga áratugi, Jón í meira en 60 ár og Guðjón hátt á sjötta tug ára.
Margir Skagfirðingar hafa sungið með Karlakór Reykjavíkur. Frægastur þeirra er Stefán Guðmundsson Íslandi, en auk þess að vera almennur kórfélagi söng hann einsöng með kórnum víða um lönd. Það samstarf var hljóðritað nokkrum sinnum og enn þann dag í dag heyrist í útvarpinu upptaka úr Tívolí í Kaupmannahöfn frá árinu 1937 af hinu þekkta Ökuljóði; Áfram veginn í vagninum ek ég. Á ferðum sínum með kórnum hafði Stefán tvær forláta ferðatöskur úr svínsleðri sem Karlakór Reykjavíkur á og er önnur þeirra varðveitt í Stefánsstofu í Miðgarði. Í dag syngja ekki færri en fimm Skagfirðingar með Karlakór Reykjavíkur, þar á meðal áðurnefndur Árni Geir.
Karlakór Reykjavíkur er skipaður um 70 kórmönnum á þessum tónleikum og nokkrir makar þeirra slást einnig í förina. Þannig verða meira en hundrað manns með í þessari tónleikaferð sem hlakka til að hitta Siglfirðinga og Skagfirðinga og eiga með þeim notalega söngstund.
Aðgöngumiðar verða seldir á hóflegu verði við innganginn, eða aðeins kr. 1500.
/Fréttatilkynning
Fleiri fréttir
-
Formannsskipti hjá Rauða krossinum
feykir.is Skagafjörður, Austur-Húnavatnssýsla, Vestur-Húnavatnssýsla, Mannlíf, Lokað efni 19.06.2025 kl. 13.51Sigríður Stefánsdóttir hefur tekið við formennsku í stjórn Rauða krossins á Íslandi (RKÍ) af Silju Báru Ómarsdóttur. Sigríður hefur verið varaformaður undanfarin þrjú ár, átti sæti í stjórn Eyjafjarðardeildar félagsins frá 2021 og hefur verið sjálfboðaliði allt frá 2017. Silja Bára sat í stjórn félagsins frá árinu 2018 og var formaður síðustu þrjú árin. Hún var nýverið kjörin rektor Háskóla Íslands og tekur við því embætti í júlí. Formannsskiptin áttu sér stað á fundi stjórnar Rauða krossins í gær, 18. júní.Meira -
Nýr vegvísir Evrópusambandsins um jafnrétti kynjanna | Clara Ganslandt skrifar
feykir.is Skagafjörður, Austur-Húnavatnssýsla, Aðsendar greinar, Vestur-Húnavatnssýsla 19.06.2025 kl. 13.37Kæru Íslendingar, til hamingju með kvenréttindadaginn. Það er merkilegt að hugsa til þess að íslenskar konur hafi verið með þeim fyrstu í Evrópu til að hljóta kosningarétt á þessum degi árið 1915, fyrir 110 árum síðan og því ber að fagna. Enn fremur þykir mér aðdáunarvert að Ísland skuli ennþá tróna á toppi lista Alþjóðaefnahagsráðsins yfir jafnrétti kynjanna í meira en áratug samkvæmt nýjustu skýrslu sem birt var í síðustu viku.Meira -
Króksmót ÓB um helgina
feykir.is Skagafjörður, Íþróttir, Mannlíf, Lokað efni 19.06.2025 kl. 11.40Sumarmót knattspyrnudeildar Tindastóls eru tvö á ári: 6. flokkur stúlkna keppir helgina 21. – 22. júní 2025 en 6.-7. flokkur drengja 9.-10. ágúst 2025. Núna um helgina eru það sem sagt stelpurnar sem spreyta sig í boltanum. Spilaður er 5 manna bolti og er hver leikur 2x8 mínútur. Fyrstu leikir hefjast kl. 9:00 á laugardegi og er áætlað að síðustu leikjum ljúki fyrir kl. 15:00 á sunnudegi. Um 300 leikir verða spilaðir á þessum tíma þannig nóg verður um að vera.Meira -
Óskað eftir tilnefningum til samfélagsverðlauna í Húnaþingi vestra
feykir.is Vestur-Húnavatnssýsla, Mannlíf 19.06.2025 kl. 09.19Félagsmálaráð Húnaþings vestra óskar eftir tilnefningum frá íbúum sveitarfélagsins um aðila til samfélagsviðurkenninga fyrir verk sín eða störf í þágu samfélagsins. Í frétt á Húnahorninu segir að allir komi til greina, jafnt einstaklingar, fyrirtæki sem og félagasamtök sem hafa með gjörðum sínum og framgöngu látið gott af sér leiða og verið öðrum góð fyrirmynd.Meira -
Sjónhorn og Feykir koma út í dag
feykir.is Skagafjörður, Austur-Húnavatnssýsla, Vestur-Húnavatnssýsla 19.06.2025 kl. 09.01Feykir og Sjónhorn fara í dreifingu í dag, fimmtudaginn 19. júní, en þjóðhátíðardagurinn setti strik í reikninginn varðandi prentun og dreifingu og blöðin því að berast í hús degi síðar en vanalega. Sjónhornið var reyndar komið á netið í gær en rafræn útgáfa Feykis varð aðgengileg nú í morgun.Meira
