V-Húnavatnssýsla

Á morgun, 29. febrúar 2024, er alþjóðadagur sjaldgæfra sjúkdóma og hefur félag Einstakra barna óskað eftir að fólk glitri þeim til stuðnings. Þá verður málþingið Við höfum rödd – er þú að hlusta? einnig haldið á morgun á Hilton Reykjavík Nordica kl. 12:30-15:30 og eru allir velkomnir á það og fer skráning fram á heimasíðu félagsins, einnig er hægt að skanna QR kóða sem er inni í fréttinni sem fer með þig beint á skráningarsíðuna.

Það brá til tíðinda þann 22. febrúar þegar Katrín Jak­obs­dótt­ir, for­sæt­is­ráðherra, und­ir­ritaði reglu­gerð þess efn­is, sem staðgeng­ill mat­vælaráðherra, að flýta grásleppuveiðum. Var þessi ákvörðunin tekin í kjöl­far þess að Landssamband smábátaeigenda sendi beiðni um að flýta upphafsdegi til að ná fyrr inn á markað í Danmörku með grásleppuhrognin. 

Á heimasíðu Húnaþings vestra segir að Norska leiðangursskipið Sjovejen liggi nú við bryggju í Hvammstangahöfn. Skipið er 331 brúttótonn og er þar til að taka upp farþega á leið í fjögurra daga siglingu til Grænlands á vegum franskrar ferðaskrifstofu. Rúmar það tólf farþega. Skipið mun hafa þrjár viðkomur í höfninni í febrúar og mars.

Hverjum datt í hug að búa til félag sem heitir Félag íslenskra bílskúreigenda? allavega einhverjum á Íslandi:) En þeir hafa haldið til haga að tilkynna hvaða bæjarfélag sé með flestu bílskúrana miðað við íbúafjölda og eins og staðan er í dag þá virðist sem Skagaströnd sé komið í fyrsta sæti og eru því nýkríndir Íslandsmeistarar í bílskúrseigu. Samkvæmt Þjóðskrá býr þar 461 einstaklingur og þar er 91 bílskúr sem gerir 0,19 bílskúr per haus á Skagaströnd en næst á eftir situr Bolungarvík með 0,17 bílskúr per haus.

Nemendur á miðstigi í sköpun í Grunnskólan Húnaþings vestra á Hvammstanga hafa síðustu vikur verið að vinna verkefni um sveitarfélagið. Þau hafa farið í ótal kynningar til fyrirtækja og tekið viðtöl við stjórnendur á Hvammstanga og fengið góðar móttökur. Þau útbjuggu veggspjöld með helstu upplýsingum og langaði að gera meira eftir heimsókn Unnar sveitarstjóra sem kom með þá hugmynd að gera myndband. Það var því tekin ákvörðun um að gera myndband um Húnaþing vestra og má sjá afraksturinn í fréttinni. Frábært verkefni hjá þeim!

Fréttavefurinn Sporðaköst sem mbl.is heldur úti og sér um segir að þeir hafi tekið saman lista yfir gjöfulustu veiðistaðina í þeim laxveiðiám sem skrá veiðina ra­f­rænt á Angling iQ app­inu. Í fyrsta sæti á listanum er Klapparfljót í Þverá í Borg­ar­f­irði með 197 laxa en fast á eftir koma þrjár Húnvetnskar ár, Langhylur í Laxá á Ásum með 155 laxa, Hnausastrengur í Vatnsdalsá með 148 laxa og Grjóthylur í Miðfjarðará með 131 lax. En ef betur er að gáð þá ætti Blanda að vera í 2. sæti með 185 laxa því þar er hægt að veiða á tveimur stöðum, í Breiðunni suður, sem er í tólfta sæti með 93 laxa, og svo í Breiðunni norður, sem er í þrettánda sæti á listanum en þar náðust 92 laxar á land.  

Á heimasíðu Matvælastofnunar er varað við neyslu á eftirfarandi framleiðslulotum af skinku af vissum vörumerkjum frá Stjörnugrís vegna grun um Listeria monocytogenes. Stjörnugrís hf. hefur ákveðið í samráði við MAST að innkalla alla skinku í varúðarskyni með best fyrir dagssetningu 18. mars 2024 og fyrir þann tíma. Þetta gerir Stjörnugrís hf. af öryggisástæðum þó svo að ekki hafi allar lotur framleiddar á tímabilinu verið greindar með Listeriu.

Bændablaðið sagði frá því í gær á heimasíðu sinni að nýverið var lokið við rannsókn á líðan bænda. Þar kemur fram að einkenni þunglyndis, kvíða og streitu séu algengari hjá bændum, samanborið við aðrar stéttir.

Hestamannafélagið Þytur hélt sitt fyrsta mót í Vetrarmótaröðinni þann 9. febrúar og var þá keppt í gæðingatölti í öllum flokkum en sl. laugardag, 24. febrúar, var annað mótið haldið og keppt var í fjórgangi og T4. Á heimasíðu Hestamannafélagsins segir að þátttakan hafi verið með ágætum á báðum mótunum í flestum flokkum en pollaflokkurinn hefur aldrei verið jafn stór, svo framtíðin er björt í hestasportinu og gaman var að sjá hversu margir áhorfendur voru á svæðinu. 

Um langt árabil fyrir nokkuð löngu voru haldin skákmót árlega og nú er vilji fyrir því að reyna að taka upp þráðinn á nýjan leik. H-59 ehf. á Skagaströnd hefur í hyggju að standa árlega fyrir skákmóti sem kallast Skákmót Skagastrandar.