Lýsa yfir vonbrigðum með lagafrumvarp

Mynd: Mast.is
Mynd: Mast.is

Á fundi sveitarstjórnar Húnavatnshrepps sem haldinn var í Blöndustöð þann 27. febrúar sl. var lögð fram bókun þar sem lýst er yfir vonbrigðum með framkomið frumvarp til laga um breytingu á lögum um dýrasjúkdóma og varnir gegn þeim, lögum um matvæli og lögum um eftirlit með fóðri, áburði og sáðvöru. Matvælaöryggi og lýðheilsa eiga alltaf að vega þyngra en viðskiptahagsmunir, segir í bókuninni.

Ennfremur segir: „Sveitarstjórn hvetur íslensk stjórnvöld að kanna hvort endurskoða megi viðkomandi ákvæði innan EES samningsins með það að markmiði að sækja um undanþágu fyrir Ísland vegna lítillar notkunar á sýklalyfjum í landbúnaði og alþjóðlegra skuldbindinga hvað varðar verndun íslenskra búfjárkynja.“

Sveitarstjórn telur að verði frumvarpið að lögum megi búast við auknum kostnaði innan heilbrigðiskerfisins vegna sýkinga af völdum fjölónæmra baktería í framtíðinni en lág sjúkdómatíðni og hreinar landbúnaðarvörur séu mikils virði. Einnig gagnrýnir sveitarstjórn hversu skammt á veg undirbúningur fyrirhugaðra mótvægisaðgerða virðist vera kominn og krefur stjórnvöld um að innflutt kjöt og egg verði ekki leyst úr tolli fyrr en MAST hefur staðfest með sýnatöku að ekki séu sýklalyfjaónæmar bakteríur til staðar í viðkomandi vörum.

Á vefnum Samráðsgátt – opið samráð stjórnvalda við almenning, segir um umrætt frumvarp:

Frumvarpið felur í sér breytingar á lögum nr. 25/1993 um dýrasjúkdóma og varnir gegn þeim, lögum nr. 93/1995 um matvæli og lögum nr. 22/1994 um eftirlit með fóðri, áburði og sáðvöru. Árið 2007 tóku íslensk stjórnvöld ákvörðun um að heimila innflutning á ófrystu kjöti frá öðrum ríkjum EES og afnema þannig skilyrði fyrir innflutningi á tilteknum landbúnaðarafurðum innan EES í því skyni að tryggja stöðu Íslands á innri markaði EES. Þá skuldbindingu staðfesti Alþingi árið 2009 en þrátt fyrir það var íslenskum lögum ekki breytt til samræmis við þá skuldbindingu. Á síðustu tveimur árum hafa bæði EFTA-dómstóllinn og Hæstiréttur Íslands staðfest að íslensk stjórnvöld hafi með þessu brotið gegn skuldbindingum sínum samkvæmt EES-samningnum. Þá hefur skaðabótaskylda íslenska ríkisins vegna þessa verið staðfest. Með hliðsjón af því er lagt til með frumvarpi þessu að núverandi leyfisveitingarkerfi verði afnumið og er markmið breytinganna að íslensk stjórnvöld standi við þær alþjóðlegu skuldbindingar sem Ísland hefur undirgengist enda mikilvægt fyrir íslensk stjórnvöld að virða skuldbindingar sínar samkvæmt EES-samningnum og dómi EFTA-dómstólsins um túlkun hans sem og dómi Hæstaréttar Íslands. Vakin er athygli á því að með frumvarpinu eru ekki gerðar breytingar á skilyrðum á innflutningi landbúnaðarafurða sem upprunnar eru utan EES.

Mikilvægt er að standa þannig að breytingum á íslenskum lögum að tryggð sé vernd lýðheilsu og búfjár auk þess sem staðið sé vörð um hagsmuni neytenda. Með vísan til þess hafa stjórnvöld undanfarið ár unnið að aðgerðaráætlun sem tekur til margra þátta og miðar að því að efla matvælaöryggi, tryggja vernd búfjárstofna og bæta samkeppnisstöðu innlendrar matvælaframleiðslu. Gripið verður til þeirra aðgerða samhliða afnámi þeirra skilyrða sem nú gilda um innflutning á kjöti og eggjum og dæmt hefur verið ólögmætt.

Síðasti dagur til að senda inn umsögn um frumvarpið í Samráðsgáttinni er í dag, 6. mars nk.

Athugasemdir eru á ábyrgð þeirra sem þær skrá.

Feykir áskilur sér þó rétt til að eyða ummælum sem metin verða sem ærumeiðandi eða ósæmileg.

Smelltu hér til að tilkynna óviðeigandi athugasemdir.

Fleiri fréttir