Umferðarslysum hefur fækkað verulega á Norðurlandi vestra
Á liðnu ári var lögð aukin áhersla á umferðaröryggismál hjá Lögreglunni á Norðurlandi vestra og var sérstök umferðardeild sett á fót innan embættisins sem hafði það að megin markmiði að ná niður umferðarhraða í umdæminu og fækka þar með umferðarslysum. Í ljósi árangursins sem náðist á árinu er stefnan sett á að auka eftirlitið enn frekar á árinu sem nú er að hefjast. Þetta kemur fram í Facebookfærslu á síðu Lögreglunnar á Norðurlandi vestra.
Umferðarslysum fækkaði verulega í umdæminu á síðasta ári eða um tæp 26%, fóru úr 171 árið 2017 í 136 árið 2018. Á sama tíma fjölgaði kærðum umferðarlagabrotum úr 3.054 árið 2017 í 7.332 árið 2018. Af þeim voru brot vegna hraðaksturs 6.874 en voru 2.797 árið 2017, árið 2016 voru þau 1.243 og 811 árið 2015.
Er það mat lögreglunnar að aukinn sýnileiki lögreglu á þjóðvegum í umdæminu samhliða öflugu hraðaeftirliti skili sér í auknu umferðaröryggi líkt og að var stefnt. Nú hefur verið ákveðið að eftirlit verði hert enn frekar á árinu 2019 og hefur lögreglumönnum í umferðardeild embættisins verið fjölgað. „Er það von okkar að hægt verði að ná enn betri árangri í fækkun umferðarslysa á því ári sem nú er að fara af stað,“ segir á Facebooksíðu Lögreglunnar á Norðurlandi vestra.
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.