Árbók Ferðafélags Íslands 2016 um Skagafjörð austan vatna er komin út
Árbók Ferðafélags Íslands árið 2016 er komin út. Fjallar hún að þessu sinni um Skagafjörð austan Vatna - Frá Hjaltadal að Úlfsdölum. Með þessari árbók lýkur þriggja binda umfjöllun Páls Sigurðssonar prófessors og fyrrum forseta Ferðafélagsins um Skagafjörð. Fyrsta bindi, Skagafjörður vestan Vatna – Frá Skagatá að Jökli, kom út 2012 og annað bindi, Skagafjörður austan Vatna – Frá Jökli að Furðuströndum, kom út 2014.
Höfundurinn, sem er Skagfirðingur að uppruna, tvinnar saman landlýsingar og sögu héraðsins líkt og tíðkast hefur í árbókum Ferðafélags Íslands. Af nógu er að taka: hrikalegt landslag Tröllaskagans og óteljandi dalir og afdalir; djásnin Drangey, Málmey og Þórðarhöfði; stórmerkilegt mannlíf og menning, ekki síst tengd biskups- og háskólasetrinu að Hólum í Hjaltadal, Vesturfarasafninu á Hofsósi og Listasetrinu Bæ. Þjóðlegur fróðleikur og þjóðsögur skipa líka háan sess.
Bókin er 254 blaðsíður. Um 220 ljósmyndir og yfir 20 uppdrættir og töflur bæta mjög við fræðslugildi bókarinnar og eru lesendum áreiðanlega til ánægju- og yndisauka. Að vanda teiknaði Guðmundur Ó. Ingvarsson kortin og Jóhann Óli Hilmarsson, sem fór um héraðið þvert og endilangt og sótti þangað myndefni, tók flestar ljósmyndirnar en tæplega tveir tugir annarra ljósmyndara eiga einnig myndir í bókinni.
Sérstakur kafli er í bókinni eftir Árna Hjartarson jarðfræðing um skagfirska jarðfræði og landslag en doktorsritgerð hans (2004) fjallaði einmitt um Skagafjarðarmislægið og jarðsögu þess.
Fjölmargir aðrir komu að gerð bókarinnar auk höfundar, ritstjóra og ritnefndar. Nefna má Daníel Bergmann sem lagði skerf til myndvinnslunnar, Helga Magnússon sem las yfir textann, Hjalta Pálsson sem bæði betrumbætti myndatexta og lagði til margar ljósmyndir og Kristján Eiríksson sem gaf góð ráð varðandi Drangeyjarkort. Ritstjóri árbókarinnar er Gísli Már Gíslason, og ritnefnd skipa auk hans Eiríkur Þormóðsson og Guðrún Kvaran en þau hafa bæði lagt árbókum Ferðafélagsins lið í áratugi.
Árbækur Ferðafélags Íslands hafa komið út árlega í óslitinni röð frá árinu 1928. Í hverri bók er oftast staðháttalýsing afmarkaðs svæðis og sögulegt efni tengt því. Nær nú efni bókanna um landið allt, víða í annað eða jafnvel þriðja sinn. Árbækurnar, 89 að tölu, eru því í raun altæk Íslandslýsing á meira en fimmtán þúsund blaðsíðum.
Þess má geta að um það leiti sem árbókin 2014 kom út var opnuviðtal í Feyki við höfundinn, Pál Sigurðsson. Í Morgunblaðinu í dag er heilsíðuumfjöllun þar sem Sigurður Bogi Sævarsson ræðir við Pál.
Fleiri fréttir
-
Fornbílaeigendur í messu á Flugumýri 17. júní
feykir.is Skagafjörður, Mannlíf, Lokað efni 18.06.2025 kl. 15.55Það hefur um árabil verið siður fornbílaunnenda í Skagafirði að mæta á fákum sínum í messu í Blönduhlíðina á 17. júní. Stundum hefur þessi messa verið á Miklabæ, líka á Silfrastöðum en í ár var messað á Flugumýri. Forvígismenn þessa uppátækis eru Agnar á Miklabæ og Jón í Miðhúsum.Meira -
Rúnar Birgir á EuroBasket í haust
feykir.is Skagafjörður, Íþróttir, Lokað efni 18.06.2025 kl. 14.50Nei, Varmhlíðingurinn geðþekki, Rúnar Birgir Gíslason, hefur ekki verið valinn til þátttöku á EuroBasket með íslenska landsliðinu í körfubolta í haust. En sannarlega verður kappinn þar því þau ánægjulegu tíðindi bárust KKÍ nú fyrir skömmu að honum hefur verið raðað sem eftirlitsmanni á EuroBasket karla í haust. „Það verða því ekki bara strákarnir okkar sem taka þátt í mótinu fyrir Íslands hönd í Póllandi heldur verður okkar fulltrúi í einu hinna landanna sem eru gestgjafar í mótinu,“ segir í frétt á vef KKÍ.Meira -
Þrjár Tindastólsstúlkur í U19 landsliðshópnum
feykir.is Skagafjörður, Austur-Húnavatnssýsla, Íþróttir, Vestur-Húnavatnssýsla, Lokað efni 18.06.2025 kl. 14.39Nú styttist í EM kvenna sem fram fer í Sviss. Ísland er að sjálfsögðu með lið á EM og það er Glódís Perla Viggósdóttir, sem rekur ættir sínar til Skagastrandar, sem er fyrirliði Íslands. Í síðustu viku tilkynnti síðan Þórður Þórðarson, landsliðsþjálfari U19 kvenna, val sitt á landsliðshópi fyrir tvo æfingaleiki nú í lok mánaðarins. Þar á lið Tindastóls þrjá fulltrúa.Meira -
Fjármagn tryggt til að hefjast handa við verknámshús
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir, Lokað efni 18.06.2025 kl. 14.05Eins og fram hefur komið hefur verið til samningur í rúmlega ár milli ríkis og sveitarfélaga um viðbyggingu við verknámshús FNV. og þriggja annarra verkmenntaskóla. Sveitarfélögin á Norðurlandi vestra höfðu skuldbundið sig til að standa við sinn hluta fjármögnunnar eða 40% heildarkostnaðar og gert ráð fyrir því í sínum fjárhagáætlunum fyrir árið 2025.Meira -
Það þarf að mæta nemendum þar sem þeirra hæfileikar og áhugi eru
feykir.is Skagafjörður, Mannlíf, Lokað efni 18.06.2025 kl. 09.54Það eru mikil tímamót í skólastarfi á Sauðárkróki nú í sumar. Í síðasta Feyki var rætt við skólameistara, aðstoðarskólameistara og annan áfangastjóra Fjölbrautaskóla Norðurlands vestra sem nú láta af störfum og eiga að baki samtals ríflega 100 ára starfsævi. Þá var skólastjóri Árskóla, Óskar G. Björnsson, kvaddur af samstarfsfólki og nemendum við skólaslit á dögunum en Óskar hefur verið skólastjóri Árskóla alla tíð síðan Gagnfræðaskóli og Barnaskóli Sauðárkróks voru sameinaðir undir einn hatt árið 1998. Já, 27 farsæl ár að baki sem skólastjóri hjá þessum öðlingi. Það var því ekki annað hægt en að leggja nokkrar spurningar fyrir Óskar.Meira
