Arnar Björns valinn í lokahóp Íslands fyrir EuroBasket
EuroBasket 2025, Evrópukeppnin í körfuknattleik, er að skella á en Ísland leikur í Póllandi í sínum riðli og hefur leik fimmtudaginn 28. ágúst. Í dag var íslenski landsliðshópurinn kynntur til sögunnar en liðið hefur æft stíft síðustu vikurnar og nú er búið að tálga utan af hópnum. Það er gleðilegt að einn Tindastólsmaður er í landsliðshópnum því Arnar Björnsson verður með á EuroBasket og full ástæða til að óska okkar manni til hamingju!
Riðlakeppnin spilast frá 28.ágúst og lýkur fimmtudaginn 4.september, 16 liða úrslitin og það sem eftir verður móts fer fram í Riga í Lettlandi og úrslitaleikur mótsins verður sunnudaginn 14. september. Í riðli Íslands eru einnig lið Frakklands, Slóveníu, Póllands, Belgíu og Ísrael.
Síðasti æfingaleikurinn fyrir mót verður spilaður í Litháen á fimmtudaginn og verður hann sýndur í beinni útsendingu á RÚV.
Í fréttatilkynningu frá KKÍ segir að EuroBasket verða gerð góð skil á miðlum RÚV bæði hér heima og í Póllandi. Stofan verður með upphitun fyrir og eftir alla leiki Íslands og alls verða 40 leikir í beinni útsendingu. Auk leikja í riðlakeppni þá verða allir leikir frá 16-liða úrslitum í beinni á RÚV og RÚV2.
Leikmenn Íslands:
Elvar Már Friðriksson – Marousso, Grikkland – 78
Haukur Helgi Pálsson – Álftanes – 79
Hilmar Smári Henningsson – Stjarnan – 24
Jón Axel Guðmundsson – Burgos, Spáni – 39
Kári Jónsson – Valur – 39
Kristinn Pálsson – Valur – 41
Martin Hermannsson – Alba Berlin, Þýskaland – 81
Orri Gunnarsson – Stjarnan – 15
Styrmir Snær Þrastarson – Belfius-Mons, Belgía – 24
Sigtryggur Arnar Björnsson – Tindastóll – 41
Tryggvi Hlinason – Bilbao, Spánn – 73
Ægir Þór Steinarsson – Stjarnan - 95
Rétt er að benda á að tölurnar fyrir aftan nöfn leikmanna og félagslið vísa ekki í aldur leikmanna heldur landsleikjafjölda.
Landsliðsþjálfari er sem fyrr Craig Pedersen en aðstoðarþjálfarar hans eru Baldur Þór Ragnarsson, fyrrum þjálfari Tindastóls og tengdasonur Skagafjarðar, og Viðar Örn Hafsteinsson sem hefur þjálfar lið Hattar Egilsstöðum svo lengi sem elstu menn muna. Liðinu fylgir stór hópur aðstoðarfólks sem sinnir bæði líkamlegum og andlegum þáttum og alls kyns aðrir reddarar og forsvarsmenn.
Einn þeirra leikmanna sem missir af vélinni til Póllands er Vesturbæingurinn Almar Atlason sem er mikið efni, enda skagfirskur í báðar ættir og því gjörsamlega sprungulaus. Til að allt fari nú fram samkvæmt settum reglum og fallegu fordæmi þá mun Varmhlíðingurinn Rúnar Birgir Gíslason vera að störfum á vegum FIBA Europe sem eftirlitsmaður en hann mun starfa í riðlinum sem verður spilaður í Tampere í Finnlandi.
Allar upplýsingar um EuroBasket má finna hérns:https://www.fiba.basketball/en/events/fiba-eurobasket-2025
Fleiri fréttir
-
Auglýst eftir tilnefningum til umhverfisverðlauna í Húnaþingi vestra
feykir.is Vestur-Húnavatnssýsla, Mannlíf 19.08.2025 kl. 14.12Líkt og fyrri ár stendur til að Húnaþing vestra veiti umhverfisviðurkenningar í flokkunum Umhverfi og aðkoma sveitabæja/fyrirtækjalóða annars vegar og umhverfi og garðar einkalóða/sumarbústaðalóða hins vegar. Á heimasíðu sveitarfélagiins er skorað á þá sem vita af görðum eða svæðum sem eiga slíka viðurkenningu skilið að senda inn tilnefningar.Meira -
Sveit GSS sigraði 3. deildina eftir æsilega keppni
feykir.is Skagafjörður, Íþróttir, Lokað efni 19.08.2025 kl. 13.42Íslandsmót golfklúbba 2025 í 3. deild karla fór fram á Hlíðarendavelli hjá Golfklúbbi Skagafjarðar dagana 15.-17. ágúst. Alls voru átta klúbbar sem tóku þátt en eftir æsispennandi úrslitaleik milli liða Golfklúbbs Skagafjarðar og Golfklúbbs Húsavíkur, þar sem úrslit réðust í bráðabana, þá höfðu Skagfirðingarnir betur og fara upp um deild, spila í 2. deild að ári.Meira -
Allt að falla í ljúfa löð í Hegranesi
feykir.is Skagafjörður, Mannlíf, Lokað efni 19.08.2025 kl. 12.22Nú síðustu misserin hefur verið tekist á um afdrif félagsheimila í Skagafirði en hugmyndir voru um að selja þrjú þeirra. Sölu á Ljósheimum var slegið á frest en til stóð að selja félagsheimilið í Hegranesi og Skagasel á Skaga. Íbúar í Hegranesi voru afar ósáttir við þessa fyrirætlun og nú, eftir töluverð átök um fyrirhugaða sölu, hefur verið ákveðið að ganga til samninga við íbúasamtökin. Hins vegar verður leitast eftir því að selja Skagasel.Meira -
Dómarar júní og júlímánaðar verðlaunaðir
feykir.is Skagafjörður, Íþróttir 19.08.2025 kl. 12.13Í júníbyrjun sagði Feykir frá því að Barna- og unglingaráð knattspyrnudeildar Tindastóls hafi verðlaunað Svetislav Milosevic fyrir það að vera leikjahæsti dómari maímánaðar en nú er komið að því að tilkynna þá dómara sem voru leikjahæstir í júní og júlí. Það eru þeir Baldur Elí Ólason og Styrmir Snær Rúnarsson sem náðu þeim flotta árangri enda voru þeir einstaklega duglegir á línunni í sumar en einnig flautaði Styrmir leik hjá 4. flokki. Strákarnir eru báðir leikmenn Tindastóls í 3. flokki og fengu þeir gjafabréf á N1 í verðlaun fyrir dugnaðinn. Feykir lagði fyrir þá nokkrar spurningar.Meira
