Axel í dönsku deildina
Karfan.is segir frá því að Skagfirðingurinn Axel Kárason mun ekki leika með Tindastól næsta vetur. Hann hefur ákveðið að leika með danska liðinu Værlöse þar sem hann mun halda áfram dýralæknanámi sínu. Þetta staðfesti Axel við karfan.is
Værlöse eru nýliðar í dönsku úrvalsdeildinni og eru staðsettir í Kaupmannahöfn. Þjálfari liðsins Jonas Sörensen segir á heimasíðu Værlöse koma Axels sé frábært fyrir hið unga lið sem er að hefja baráttuna í úrvalsdeildinni. Værlöse var hluti af BF Copenhagen sem átti að verða stórlið á evrópskan mælikvarða en fór svo flatt peningalega og er Værlöse núna fyrst að koma upp aftur.
Karfan.is heyrði í Axel og spurði hvað hann væri að fara að gera í Danmörku.
Ég ætla að færa mig yfir í danska dýralæknaháskólann, aðallega því það hentar betur körfuboltafíklum að vera þar. Svo er það líka nær Íslandi og því auðveldara að sækja viðburði eins og þorrablót yfir veturinn.
En afhverju Værlöse?
Ég nefndi það við nágranna minn í vor að mig langaði til Danmerkur, og hann benti mér á að Værlöse væri að koma upp í efstu deild og gæti verið spennandi kostur. Ég kom mér í samband við þjálfarann og við vorum ekki lengi að komast að þeirri niðurstöðu að leik- og þjálfunarstílar okkar ættu samleið.
En hvernig líst þér á liðið og þjálfarann?
Maður fær svona spurningar á hverju sumri, hvort sem það er um nýja liðið, nýja útlendinginn eða nýja þjálfarann. Ég hef lært það á þessum árum að fordómarnir (jákvæðir eða neikvæðir) standast sjaldan og ætla því ekki að mynda mér neina skoðun fyrirfram.
Þekkir þú eitthvað til í dönsku deildinni?
Nákvæmlega ekki neitt.
Hægt er að skoða Körfuna.is hér
Fleiri fréttir
-
Vísnakeppni Sæluviku 2025
feykir.is Skagafjörður, Listir og menning, Mannlíf, Lokað efni 04.05.2025 kl. 14.56Við setningu Sæluviku Skagfirðinga er venja að birta úrslit í árlegri vísnasamkeppni, vonandi verður hún á Sæluvikudagskránni næstu hálfa öldina amk. Markmiðið er að fá fólk til að rifja upp kynni við skáldagyðjuna, botna fyrirfram gefna fyrriparta og yrkja vísu eða vísur um ákveðið efni. Í ár er það eftirtektarverður og ógnvekjandi stjórnunarstíll forseta nokkurs vestanhafs sem er yrkisefnið. Aukning þátttöku í prósentum talið er að nálgast efri tollamörk Trömps. Bárust okkur svör frá 21 hagyrðingi undir alls 26 dulnefnum . Sumir botnuðu alla fyrriparta ásamt því að senda inn eina eða fleiri vísur, einhverjir sendu aðeins eina stöku og allt þar á milli. Hver hafði sína hentisemi með það. Úr nógu var því að moða og erfitt verk beið dómnefndar.Meira -
Þriðja eins marks tap Stólastúlkna í röð
feykir.is Skagafjörður, Austur-Húnavatnssýsla, Íþróttir, Vestur-Húnavatnssýsla, Lokað efni 04.05.2025 kl. 12.52Eftir sigur í fyrstu umferð Bestu deildar kvenna hefur lið Tindastóls nú tapað þremur leikjum í röð en allir hafa leikirnir tapast með eins marks mun og liðið verið vel inni í þeim öllum. Í gær heimsóttu Stólastúlkur gott lið Þróttar sem hafði lúskrað á okkar liði í Lengjubikarnum 9-0. Eftir hálfrar mínútu leik í gær var staðan orðin 1-0 og margir óttuðust skell. Fleiri urðu mörkin hins vegar ekki og 1-0 sigur Þróttar niðurstaðan.Meira -
Erfið byrjun Húnvetninga í 2. deildinni
feykir.is Austur-Húnavatnssýsla, Íþróttir, Vestur-Húnavatnssýsla, Lokað efni 04.05.2025 kl. 12.34Við skulum vona að fall sé fararheill hjá knattspyrnuliði Húnvetninga því ekki sóttu þeir gull í greipar Austfirðinga í gær. Þá öttu þeir kappi við lið KFA í Fjarðabyggðahöllinni í fyrstu umferð 2. deildar karla í knattspyrnu. Þegar upp var staðið höfðu gestgjafarnir hreinlega alls ekkert verið gestrisnir, gerðu átta mörk á meðan gestirnir gerðu eitt.Meira -
Tindastólspiltar með sigur í fyrsta leik
feykir.is Skagafjörður, Íþróttir, Lokað efni 04.05.2025 kl. 02.52Keppni í 3. deild karla í knattspyrnu fór af stað nú um helgina og í gær tóku Stólarnir á móti ágætu liði Ýmis úr Kópavogi. Leikið var við nánast fáránlega góðar aðstæður á Króknum, sól í heiði, logn og 12 stiga hiti og teppið fagurgrænt. Leikurinn var ágætur og úrslitin enn betri, sigur í fyrsta heimaleik, lokatölur 2-1 fyrir Tindastól.Meira -
Það verða læti!
feykir.is Skagafjörður, Íþróttir, Lokað efni 03.05.2025 kl. 23.24Fjórði leikurinn í undanúrslitaeinvígi Tindastóls og Álftaness fór fram í Kaldalónshöllinni á Álftanesi í kvöld: Það var frábær stemning og stuðningsfólk Tindastóls fjölmennto og var í góðum gír að venju. Leikurinn var hin besta skemmtun og enn betri fyrir gestina eftir því sem á leið leikinn. Það fór svo á endanum að Stólarnir sýndu sínar bestu hliðar og tryggðu sér þriðja sigurinn í einvíginu og þar með sæti í úrslitarimmunni. Lokatölur 90-105.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.