Félag foreldra langveikra barna og barna með ADHD/ADD í Skagafirði stofnað
Félag foreldra langveikra barna og barna með ADHD/ADD í Skagafirði var formlega stofnað, mánudagskvöldið 6. september s.l. í Húsi Frítímans á Sauðárkróki. Sérstakir gestir voru Ingibjörg Karlsdóttir formaður ADHD samtakanna og Ragna Marinósdóttir framkvæmdastjóri Umhyggju.
Á vefsíðu Svf. Skagafjarðar segir að það sé mikið gleðiefni að nú sé orðinn til vettvangur fyrir frekara foreldrasamstarf þessa hóps en allir foreldrar eiga það sameiginlegt að vilja að börnum þeirra líði vel.
Foreldrar, forsjáraðilar og aðrir aðstandendur langveiks barns eða barns með ADHD/ADD geta sótt um aðild að félaginu. Almennir félagsfundir verða haldnir mánaðarlega, fyrsta mánudag hvers mánaðar og útlit fyrir spennandi dagskrá þar sem fróðleikur og skemmtun verður í bland.
Með stofnun þessa félags er einu af markmiðum Fléttunnar náð, en Fléttan er verkefni til að efla þjónustu við langveik börn og börn með ADHD/ADD og styrkt af félags- og tryggingamálaráðuneytinu.
Markmið hins nýstofnaða félags eru:
- - að vera samstarfsvettvangur foreldra
- - að gæta hagsmuna langveikra barna og barna með ADHD/ADD og fjalla um mál sem snerta almenna/opinbera þjónustu þeirra, t.d. skóla-, frítíma- og félagsþjónustu.
- - að miðla upplýsingum og standa fyrir fræðslu um hina ýmsu sjúkdóma eða raskanir og stuðla að opinberri umræðu.
- - að hafa samstarf við opinbera aðila í Skagafirði um velferð langveikra barna og barna með ADHD/ADD
- - að gefa þessum fjölskyldum tækifæri til að hittast og eiga góðar stundir saman.
Nýkjörinn formaður félags foreldra langveikra barna og barna með ADHD/ADD er Kristján Örn Kristjánsson, ritari er Sigríður Sóley Guðnadóttir og Ólöf Arna Pétursdóttir er gjaldkeri. Varamenn í stjórn eru Eva Óskarsdóttir og Ólafur Smári Sævarsson. Áhugasamir foreldrar eða aðrir aðstandendur eru hvattir til að bætast í hópinn. Þeir geta sett sig í samband við einhvern ofannefndan eða Hönnu Dóru, starfsmann Fléttunnar í síma 455-6000 eða hannadora@skagafjordur.is
Fleiri fréttir
-
Vísnakeppni Sæluviku 2025
feykir.is Skagafjörður, Listir og menning, Mannlíf, Lokað efni 04.05.2025 kl. 14.56Við setningu Sæluviku Skagfirðinga er venja að birta úrslit í árlegri vísnasamkeppni, vonandi verður hún á Sæluvikudagskránni næstu hálfa öldina amk. Markmiðið er að fá fólk til að rifja upp kynni við skáldagyðjuna, botna fyrirfram gefna fyrriparta og yrkja vísu eða vísur um ákveðið efni. Í ár er það eftirtektarverður og ógnvekjandi stjórnunarstíll forseta nokkurs vestanhafs sem er yrkisefnið. Aukning þátttöku í prósentum talið er að nálgast efri tollamörk Trömps. Bárust okkur svör frá 21 hagyrðingi undir alls 26 dulnefnum . Sumir botnuðu alla fyrriparta ásamt því að senda inn eina eða fleiri vísur, einhverjir sendu aðeins eina stöku og allt þar á milli. Hver hafði sína hentisemi með það. Úr nógu var því að moða og erfitt verk beið dómnefndar.Meira -
Þriðja eins marks tap Stólastúlkna í röð
feykir.is Skagafjörður, Austur-Húnavatnssýsla, Íþróttir, Vestur-Húnavatnssýsla, Lokað efni 04.05.2025 kl. 12.52Eftir sigur í fyrstu umferð Bestu deildar kvenna hefur lið Tindastóls nú tapað þremur leikjum í röð en allir hafa leikirnir tapast með eins marks mun og liðið verið vel inni í þeim öllum. Í gær heimsóttu Stólastúlkur gott lið Þróttar sem hafði lúskrað á okkar liði í Lengjubikarnum 9-0. Eftir hálfrar mínútu leik í gær var staðan orðin 1-0 og margir óttuðust skell. Fleiri urðu mörkin hins vegar ekki og 1-0 sigur Þróttar niðurstaðan.Meira -
Erfið byrjun Húnvetninga í 2. deildinni
feykir.is Austur-Húnavatnssýsla, Íþróttir, Vestur-Húnavatnssýsla, Lokað efni 04.05.2025 kl. 12.34Við skulum vona að fall sé fararheill hjá knattspyrnuliði Húnvetninga því ekki sóttu þeir gull í greipar Austfirðinga í gær. Þá öttu þeir kappi við lið KFA í Fjarðabyggðahöllinni í fyrstu umferð 2. deildar karla í knattspyrnu. Þegar upp var staðið höfðu gestgjafarnir hreinlega alls ekkert verið gestrisnir, gerðu átta mörk á meðan gestirnir gerðu eitt.Meira -
Tindastólspiltar með sigur í fyrsta leik
feykir.is Skagafjörður, Íþróttir, Lokað efni 04.05.2025 kl. 02.52Keppni í 3. deild karla í knattspyrnu fór af stað nú um helgina og í gær tóku Stólarnir á móti ágætu liði Ýmis úr Kópavogi. Leikið var við nánast fáránlega góðar aðstæður á Króknum, sól í heiði, logn og 12 stiga hiti og teppið fagurgrænt. Leikurinn var ágætur og úrslitin enn betri, sigur í fyrsta heimaleik, lokatölur 2-1 fyrir Tindastól.Meira -
Það verða læti!
feykir.is Skagafjörður, Íþróttir, Lokað efni 03.05.2025 kl. 23.24Fjórði leikurinn í undanúrslitaeinvígi Tindastóls og Álftaness fór fram í Kaldalónshöllinni á Álftanesi í kvöld: Það var frábær stemning og stuðningsfólk Tindastóls fjölmennto og var í góðum gír að venju. Leikurinn var hin besta skemmtun og enn betri fyrir gestina eftir því sem á leið leikinn. Það fór svo á endanum að Stólarnir sýndu sínar bestu hliðar og tryggðu sér þriðja sigurinn í einvíginu og þar með sæti í úrslitarimmunni. Lokatölur 90-105.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.