Litlu mátti muna að illa færi er gangnamaður lenti í sjálfheldu
Gangnamaður lenti í sjálfheldu í klettabelti í fjalllendi í Unadal í austanverðum Skagafirði sl. föstudag. Björgunarsveitir í Skagafirði, auk fjallabjörgunarfólks í Eyjafirði, voru kallaðar út og segir í Facebook-færslu Skagfirðingasveitar að verkefnið hafi verið krefjandi. „Til allrar lukku komst þyrlan fljótlega á vettvang og sigmaður hennar seig eftir manninum,“ segir í færslunni.
„Þarna er um gagnamann að ræða sem kemst í sjálfheldu og allar sveitir í Skagafirði voru kallaðar út og fjallabjörgunarmenn úr Eyjafirði, af svæði 11 eins og það er kallað. Svo kom þyrlan og hífði manninn upp,“ segir Hafdís Einarsdóttir, formaður Skagfirðingasveitar.
Hún segir manninn ekki hafa slasast mikið en orðinn kaldur og hrakinn og ekki mátt muna miklu að illa færi. „Hann hefði ekki getað beðið mikið lengur því hann var í hættulegum aðstæðum. Þetta stóð mjög tæpt. Hann hefði ekki mátt fara af stað því hætta var á að hrapa í klettunum.“
Að sögn Hafdísar var maðurinn skorðaður í þröngum gilskorningi og vatn sem rann undir hann og því orðinn blautur en óslasaður en fær síðar grjóthrun á sig. Eftir skoðun hjá lækni var hann kominn til síns heima síðar um kvöldið.
Alls voru 38 manns skráðir í atvikið frá björgunarsveitum á svæðum 10 og 11 og stóð til að rýna í atvikið í gærkvöldi en þá eru allir verkferlar í kringum verkefnið skoðaðir til að vera enn betur búin næst ef svipað atvik kunni henda.
Betur fór en á horfði í fyrstu því björgunarþyrlur Gæslunnar voru að störfum annars staðar á landinu. Hafdís segir að þegar hringt var eftir þyrlu hafi þeim verið sagt að nokkur verkefni væru í forgangi áður en hún kæmi til þeirra. Af þeim sökum var fjallabjörgunarfólk af Eyjafjarðasvæðinu fengið á svæðið.
„Þannig að þyrlan kom frekar óvænt. Við sáum fram á að hún kæmi síðar og bjuggumst við að við þyrftum jafnvel að fara í það að bjarga manninum gangandi. Það voru því gleðifréttir að vita af henni á leiðinni en það var mjög mikið að gera hjá gæslunni þennan dag. Þetta hefði getað orðið gríðarstórt verkefni hefði þyrlan ekki komist,“ segir Hafdís og giskar á að það hefði tekið að minnsta kosti klukkutími að nálgast manninn ef þyrlan hefði mætt á svæðið.
Fleiri fréttir
-
Lið Tindastóls sló út Subway-deildar lið Snæfells
feykir.is Skagafjörður, Íþróttir 18.04.2024 kl. 22.53Það var gleði og gaman í Síkinu í kvöld en sennilega þó ekki síður stress og naglanögun fram á síðustu sekúndu framlengingar þegar Tindastóll og Snæfell mættust í fjórða leik einvígis síns um réttinn til að spila um sæti í efstu deild. Leikurinn var jafn og spennandi allan tímann en gestirnir náðu góðum kafla snemma í fjórða leikhluta, náðu 13 stiga forystu og virtust ætla að tryggja sér oddaleik í Stykkishólmi. Lið Tindastóls gafst ekki upp og náði að jafna í blálokin og tryggja sér framlengingu þar sem heimaliðið reyndist sterkara. Lokatölur 82-78 og rjúkandi stemning hjá Stólastúlkum.Meira -
Jordyn Rhodes komin með leikheimild
feykir.is Skagafjörður, Íþróttir 18.04.2024 kl. 18.42Tindastóll teflir fram liði í þriðja skipti í efstu deild kvennafótboltans eftir ansi gott tímabil síðastliðið sumar. Besta deildin hefst nú á sunnudag og þá kemur FH í heimsókn á Krókinn. Það vita allir að það er bara ein Murr en hún hefur nú skipt um heimavöll og spilar með Fram í sumar í Lengjudeildinni. Jordyn Rhodes tekur hennar stöðu í fremstu víglínu og eru miklar vonir bundnar við hana.Meira -
Snjódýpt í Fljótum yfir meter að jafnaði
feykir.is Skagafjörður, Ljósmyndavefur 18.04.2024 kl. 14.31„Tíðarfarið hefur verið nokkuð óvenjulegt frá 21. mars en allar helgar síðan þá hafa skollið á norðan stórhríðir en lítill snjór var annars þennan vetur,“ segir Halldór Gunnar Hálfdansson, bóndi á Molastöðum í Fljótum en hann sér einnig um skólaakstur í sveitinni. Halldór bætir við að það sé nokkuð óvenjulegt að fá svona mikinn snjó seint og segir að yfirleitt þegar snjóþungt sé í Fljótum hafi sá snjór verið að safnast allan veturinn, oft frá því í október.Meira -
Máttur menntunar | Álfhildur Leifsdóttir skrifar
feykir.is Skagafjörður, Aðsendar greinar 18.04.2024 kl. 13.45Það hefur lengi verið sagt að menntun sé máttarstólpi samfélagsins. Fjöreggið. Skólakerfið okkar á að vera öflugasta jöfnunartækið, þar eiga allir að hafa sömu tækifærin. En er það svo? Við getum vissulega fagnað þeim breytingum að fríar skólamáltíðir verða að veruleika, aðgerð sem jafnar leikinn að einhverju leyti og er breyting til batnaðar fyrir öll.Meira -
Enskumælandi ráð Mýrdalshrepps hlaut Landstólpa Byggðastofnunar
feykir.is Skagafjörður, Austur-Húnavatnssýsla, Vestur-Húnavatnssýsla 18.04.2024 kl. 12.56Enskumælandi ráð Mýrdalshrepps er handhafi Landstólpans, samfélagsviðurkenningar Byggðastofnunar, árið 2024. Alls bárust 26 tilnefningar víða af landinu. Viðurkenningin var afhent á ársfundi Byggðastofnunar sem fram fór í Bolungarvík og er þetta í þrettánda sinn sem viðurkenningin er veitt.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.