Lýsir andstöðu við að gengið verði lengra í afnámi tolla
VG í Skagafirði lýsir andstöðu við að gengið verði lengra í afnámi tolla á innfluttar landbúnaðarafurðir án fyrirliggjandi úttektar á áhrifum á íslenska landbúnaðarframleiðslu og án þess að gerður hafi verið nýr búvörusamningur til lengri tíma. Þetta kemur fram í ályktun sem gerð var á aðalfundi félagsins sem haldinn var í gær, 7. október.
Í fréttatilkynningu frá VG í Skagafirði segir að matvælaframleiðsla sé ein meginstoð byggðar í Skagafirði og jafnframt að héraðið sé eitt sterkasta mjólkur og kjötframleiðslusvæði landsins. Margvíslegur þjónustuiðnaður hafi byggst upp í kringum matvælaiðnaðinn. Ferðaþjónusta og matarmenning sé mikilvæg grein í örri þróun. Þessar greinar skipta sköpum fyrir búsetu og afkomu íbúa héraðsins. Ennfremur segir að fréttir af nýgerðum milliríkjasamningi milli Íslands og Evrópusambandsins (ESB), um viðskipti með búvörur og niðurfelling tolla, veki því upp ugg um framtíðarhorfur landbúnaðar og matvælaiðnaðar í Skagafirði.
„Afnám tolla í þeim mæli sem samningarnir gera ráð fyrir geta haft ófyrirséðar afleiðingar í för með sér fyrir innlendan landbúnað og matvælavinnslu. Samningurinn við ESB virðist gerður án samráðs og í algjörri andstöðu við gildandi samninga um starfskilyrði greinarinnar sem og stefnu stjórnvalda um matvælaframleiðslu á Íslandi. Stjórnvöld virðast einnig hafa vanrækt að gera fyrirfram heildræna úttekt á áhrifum samningsins á vöruframboð þróun og samkeppnisstöðu einstakra búgreina til lengri tíma. Atvinnuöryggi og störf fjölda fólks er sett í uppnám sem og rekstur afurðastöðva og fyrirtækja í matvælavinnslu, og iðnaði,“ segir í tilkynningunni.
Lagt er til að meta áhrif á afurðaverð til bænda áður en lengra er haldið, líklega þróun á markaðshlutdeild innlendrar framleiðslu og tekjuleg áhrif að teknu tillit til áhrifa aukins markaðsaðgangs. Störf og afkoma fjölda bænda og starfsfólks í úrvinnslugreinum sé í húfi.
„Aðalfundur VG í Skagafirði skorar því á þingmenn að taka málið upp og staðfesta ekki slíka samninga nú án þess að gengið hafi verið frá nýjum samningum um starfsskilyrði landbúnaðarins til lengri tíma. Núverandi búvörusamningur rennur út í lok næsta árs. Fyrirkomulag tolla hefur verið hluti slíkra samninga og því eðlilegt að ákvarðanir um breytingar á þeim séu teknar samhliða gerð nýrra langtímasamninga um starfskilyrði landbúnaðar og matvælavinnslu í landinu,“ segir loks í ályktun VG í Skagafirði.
Fleiri fréttir
-
Bændamarkaður, rósir og vöfflur
feykir.is Skagafjörður 21.11.2025 kl. 10.55Það verður aldeilis hægt að fara á jólarúnt nk. laugardag 22. nóvember. Hinn árlegi jóla, bænda og handverksmarkaður verður í Hlöðunni á Stórhól í Lýdó og Rúnalist Gallerí, kaffihúsið Starrastöðum og handverks og sölubasar dagdvalar aldraðra er meðal þess sem um er að vera í firðinum.Meira -
Tíunda bindið af Skagfirskum æviskrám 1910-1950 komið úr prentun
feykir.is Skagafjörður, Listir og menning, Lokað efni 21.11.2025 kl. 10.19Út er komið tíunda bindið af Skagfirskum æviskrám frá tímabilinu 1910-1950 og er það Sögufélag Skagfirðinga sem gefur út. Í þessari bók eru 87 æviþættir um það bil 160 einstaklinga. Eru þá samtals komir 952 æviskrárþættir frá fyrrgreindu tímabili. Þeirri reglu hefur ævinlega verið haldið að birta ekki æviskrár fólks meðan það er lífs, þótt í allnokkrum tilfellum hafi einstaklingarnir sjálfir gefið upplýsingar um lífsferlil sinn, er síðar voru svo notaðar.Meira -
Bömmer á bömmer ofan í Grindavík
feykir.is Skagafjörður, Íþróttir, Lokað efni 21.11.2025 kl. 09.27Það voru margir búnir að bíða spenntir eftir toppslagnum í Bónus deild karla en lið Grindavíkur og Tindastóls mættust í HS Orku-höllinni í Grindavík í gærkvöldi. Þegar á hólminn kom var það bara annað liðið sem spilaði eins og topplið og það kom því miður í hlut Tindastóls að valda sínum stuðningsmönnum miklum vonbrigðum eins og sjá mátti á gráti og gnýstran tanna á samfélagsmiðlum. Heimamenn uppskáru afar öruggan 16 stiga sigur, 91-75, en þó höfðu gestirnir náð að laga stöðuna í lokafjórðungnum.Meira -
Starfamessa á Sauðárkróki
feykir.is Skagafjörður, Austur-Húnavatnssýsla, Vestur-Húnavatnssýsla 20.11.2025 kl. 13.30Starfamessa fyrir ungmenni á Norðurlandi vestra var haldin í dag 20. nóvember. Starfamessa er eitt af áhersluverkefnum Sóknaráætlunar landshlutans fyrir árið sem er að líða. Þetta er í þriðja sinn sem ungmennum í landshlutanum gefst kostur á að kynnast fjölmörgum starfsgreinum, sem hægt er að vinna við innan og utan landshlutans, bakgrunn þeirra og menntunarkröfum.Meira -
Erindið Jólin og sorgin á Löngumýri miðvikudaginn 26. nóvember kl. 18.
feykir.is Skagafjörður, Austur-Húnavatnssýsla, Vestur-Húnavatnssýsla 20.11.2025 kl. 11.42Þau leiðu mistök urðu að röng auglýsing var sett í Sjónhorn vikunnar fyrir erindi á Löngumýri miðvikudaginn 26. nóvember.Meira
