Stórleikur í Síkinu í kvöld
Það verður hart barist í Síkinu í kvöld þegar lið Tindastóls og Keflavíkur leiða saman hesta sína í lokaumferð Dominos-deildarinnar. Liðin eru bæði með 30 stig þegar 21 umferð er lokið og ljóst að sigurliðið í kvöld endar að öllum líkindum í þriðja sæti. Staða fimm efstu liða er merkilega jöfn og talsverðar sviptingar geta orðið á stigatöflunni í kvöld.
Stórleikur kvöldsins er klárlega leikur Tindastóls og Keflavíkur. Hin liðin í toppbaráttunni eiga leiki sem fyrirfram verða að teljast þægilegir. Þannig á topplið Stjörnunnar útileik gegn Haukum, sem hafa þó reyndar helst verið í því að gera toppliðunum skráveifu. Njarðvík, sem er með 32 stig líkt og Stjarnan, fær Skallagrím í heimsókn og KR, sem er með 28 stig, fær botnlið Breiðabliks í DHL-höllina. Ef Stjarnan misstígur sig gegn Haukum þá verður Njarðvík deildarmeistari með sigri en tapi Njarðvík fyrir Borgnesingum þá gætu Stólarnir skotist upp í annað sætið nái þeir að sigra Keflavík. Ef lið Tindastóls sigrar Keflavík í kvöld en Njarðvík vinnur sinn leik þá enda Stólarnir í þriðja sæti. Tapi Stólarnir hins vegar þá eru allar líkur á því að liðið endi í fimmta sæti deildarinnar, Keflavík hirði þriðja sætið en KR skjótist upp að hlið Tindastóls en endi í fjórða sæti þar sem þeir unnu báða leikina gegn Stólunum í vetur.
Líklegasta niðurstaðan í kvöld er því sú að Stólarnir endi í þriðja eða fimmta sæti. Hvort heldur sem verður þá er ljóst að andstæðingar Tindastóls í úrslitakeppninni verða strembnir. Endi liðið í þriðja sætið mæta Stólarnir spræku liði Þórs Þorlákshöfn en hafi heimavallarréttinn. Vermi lið Tindastóls fimmta sætið þá mætast liðin sem spiluðu til úrslita í fyrravor, KR og Tindastóll. Þá hefðu Vesturbæingarnir heimavallarréttinn.
Keflvíkingar hafa spilað vel í síðustu leikjum en það er fyrrum Tindastólskappinn Sverrir Þór Sverrisson sem þjálfar liðið. Og af því að Feyki datt í hug að spyrja Rúnar Birgi Gíslason hversu marga leiki Sverrir hefði spilað fyrir Tindastól þá ku það hafa verið 52 deildarleikir, sjö í bikar og 15 í fyrirtækjabikar og svo nokkrir í playoffs! Stólarnir, sem unnu fyrri leik liðanna 78-92, hafa kannski ekki beinlínis verið sannfærandi í síðustu leikjum en þeir þrír leikir sem leiknir hafa verið síðan Alawoya kom til liðsins á ný hafa allir unnist. Það er að sjálfsögðu það sem máli skiptir. Ljóst er þó að leikmenn þurfa að stíga upp í kvöld og mæta grimmir til leiks.
Það er því mikið undir í Síkinu í kvöld og vissara fyrir stuðningsmenn að fjölmenna. Ekki er annað vitað en að leikmenn Tindastóls séu klárir í slaginn og tilbúnir í sigur. Þá verða víst Tindastóls-borgararnir á sínum stað og ættu að renna ljúft niður.
Úrslitakeppnin hefst þann 21. mars.
Fleiri fréttir
-
Umhverfisdagur FISK Seafood 2024
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 20.04.2024 kl. 00.12Umhverfisdagur FISK Seafood verður haldinn 4. maí nk. frá klukkan 10-12. Áætlað er að tína rusl á strandlengjunni á Sauðárkróki (sem verður skipt upp í svæði), Nöfunum, í Varmahlíð, á Hólum og á Hofsósi. Frá 12:15 mun FISK Seafood bjóða öllum þátttakendum að þiggja veitingar að Sandeyri 2.Meira -
Ævintýrið úti hjá liði Tindastóls
feykir.is Skagafjörður, Íþróttir 19.04.2024 kl. 23.34Strax í haust voru bara þrjú hjól undir bíl meistara Tindastóls og eftir það var nánast sama hvaða hindrun varð á vegi hans, það varð allt til að hægja ferðina. Hann hökti reyndar inn í bikarúrslit og í úrslitakeppnina þó með naumindum væri. Stólakagginn sem allir biðu eftir að hrykki í gírinn, kæmi sterkur inn á endasprettinum, var eiginlega hálf vélarvana allt tímabilið. Leikurinn í Smáranum í kvöld var reyndar góður en enn og aftur voru Stólarnir sjálfum sér verstir. Lokakarfan var Grindvíkinga og hún skipti sköpum – lokastölur 91-89. Stólarnir því snemma í sumarfrí þennan veturinn og kannski allir fegnir – þessi bíll þarf í allsherjar yfirhalningu.Meira -
Gul viðvörun á Norðurlandi vestra
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 22.24Veðurstofan hefur smellt á okkur gulri veðurviðvörun mest allan laugardaginn og fram á aðfaranótt sunnudags. Gert er ráð fyrir ört hækkandi hita og því má búast má við miklum leysingum, auknu afrennsli og vatnavöxtum í ám og lækjum. Mikilvægt er að hreinsa frá niðurföllum til að forðast vatnstjón vegna rigningar og leysingavatns. Gula viðvörunin gildir fyrir Vestfirði og allt Norðurland.Meira -
Venju samkvæmt er Stólastúlkum spáð falli
feykir.is Skagafjörður, Íþróttir 19.04.2024 kl. 15.44Það eru nokkrir fjölmiðlar sem spá fyrir tímabilið í Bestu deild kvenna í knattspyrnu og jafnan er liði Tindastóls spáð falli, ýmist 9. eða 10. sæti. Í árlegri spá fyrirliða, þjálfara og forráðamanna er liðinu spáð níunda sæti en liði Keflavíkur því neðsta. Íslandsmeisturum Vals er aftur á móti spáð titlinum og Blikum öðru sæti. Grönnum okkar í Þór/KA er síðan spáð þriðja sætinu.Meira -
Við erum ótrúlega rík af fólki | LS Lulla í spjalli
feykir.is Skagafjörður, Listir og menning, Mannlíf 19.04.2024 kl. 14.40„Litla hryllingsbúðin er skemmtilega fjölbreytt verk með miklum söng og er skemmtileg dramatísk hrollvekja,“ segir Sigurlaug Dóra Ingimundardóttir (Lulla), formaður Leikfélags Sauðárkróks, þegar Feykir spyr hana hvað hún geti sagt um Sæluvikustykki LS þetta árið. Æfingar standa nú yfir en frumsýnt verður í Bifröst á Sauðárkróki sunnudaginn í Sæluviku en samkvæmt áreiðanlegum heimildum Feykis er hér um að ræða 146. sýningu Leikfélags Sauðárkróks frá því það var endurvakið árið 1941.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.