Takk Ómar Bragi!

feykir.is Skagafjörður 03.08.2026 kl. 14.48 oli@feykir.is
Á myndinni hér að ofan má sjá Auði Ingu Þorsteinsdóttur, framkvæmdastjóra UMFÍ, ásamt Ómari, Maríu og Jóhanni Steinari með mótsgesti í bakgrunni. Jón Gautur Hannesson tók myndina fyrir UMFÍ.
Á myndinni hér að ofan má sjá Auði Ingu Þorsteinsdóttur, framkvæmdastjóra UMFÍ, ásamt Ómari, Maríu og Jóhanni Steinari með mótsgesti í bakgrunni. Jón Gautur Hannesson tók myndina fyrir UMFÍ.

Eins og fram hefur komið á Feyki var Unglingalandsmóti UMFÍ slitið á Sauðárkróki fyrir miðnætti í gærkvöldi í blankalogni. Frá því er sagt á síðu UMFÍ að Jóhann Steinar Ingimundarson, formaður UMFÍ, heiðraði Ómar Braga Stefánsson, framkvæmdastjóra móta UMFÍ, við mótsslitin en þetta er síðasta mótið sem hann leiðir eftir rúmlega 20 ára starf.

Fram kemur í fréttinni að fyrsta mótið sem Ómar stýrði var á Sauðárkróki árið 2004 og síðan þá hafa þau verið á ýmsum stöðum á hverju ári. Það var við hæfi að síðasta mótið hans við stjórnvölinn hafi einmitt verið haldið á Sauðárkróki. Auk þess að stýra Unglingalandsmótunum hefur Ómar jafnframt verið framkvæmdastjóri Landsmóts UMFÍ 50+ og fulltrúi UMFÍ á fleiri viðburðum, eins og til dæmis Drulluhlaup UMFÍ sem verður í Mosfellsbæ um miðjan ágúst.

„Þúsundir barna og ungmenna hafa á liðnum árum tekið þátt í Unglingalandsmóti og notið þeirra upplifana sem mótið skapar. Ómar Bragi hefur um árabil verið einn af helstu drifkröftum mótsins. Hann hefur lagt metnað sinn í þróun þess, staðið vörð um gildi þess og haft skýra sýn á hvernig það gæti áfram verið vettvangur þar sem ungt fólk hittist, hreyfir sig, eignast vini og skapar minningar,“ sagði Jóhann Steinar og benti á að það birtist í gleði mótsgesta, vináttunni sem þar myndast og öllum þeim jákvæðu minningum sem kynslóðir þátttakenda taka með sér út í lífið.

Jóhann benti jafnframt á að enginn vinni verkefni af þessari stærðargráðu einn, það krefjist kvöld- og helgarvinnu, ferðalaga og ótal stunda sem annars væru með fjölskyldunni. Að því sögðu bað Jóhann þau Ómar og María Björk Ingvadóttur, konu hans, að koma upp saman og fögnuðu mótsgestir þeim innilega.

Unglingalandsmót UMFÍ á Sauðárkróki gekk afskaplega vel. Þátttakendur á aldrinum 11-18 ára voru tæplega 1.100 talsins af öllu landinu sem kepptu í meira en 20 íþróttagreinum á daginn og sóttu ýmsa afþreyingu milli leikja og á kvöldin. Á mótinu var hugað að því að bjóða upp á eitthvað fyrir sem flesta, þar á meðal foreldrablak fyrir slitin síðdegis í gær.

Lögregla og björgunarsveit var á vakt alla helgina og höfðu tiltölulega lítið að gera. Mótinu var slitið með tónleikum Skagfirðinganna í Úlfur Úlfur, brekkusöng og flugeldasýningu af Nöfunum ofan við íþróttasvæðið á Sauðárkróki.

Heimild: Facebook-síða UMFÍ

Til baka

Fleiri fréttir

  • Haukur Skúli í miðjum sprettinum. SKJÁSKOT

    Haukur Skúli skaust upp á Nafirnar á innan við 22 sekúndum

    feykir.is Skagafjörður, Íþróttir, Mannlíf, Lokað efni 03.08.2026 kl. 16.39 oli@feykir.is
    Kynslóðirnar kepptu saman að því að ná besta tímanum í tröppuspretti á Unglingalandsmótinu síðastliðinn laugardag en þátttakendur voru frá fimm ára aldri og upp í 64. Brattar tröppurnar upp á Nafirnar ofan við íþróttasvæðið eru 163 talsins eða næstum jafnmargar þátttakendunum, sem voru 143. Sigurvegarinn reyndist Haukur Skúli Óttarsson, ungur og sprækur keppandi úr Eyjafjarðarsveit, en hann fór Klaufaganginn á 21,73 sekúndu sem er nú eiginlega fáránlega góður tími.
    Meira
  • Raggý og David stírðu hópdansi í Grænuklauf. MYND AF FB SÍÐU UMFÍ

    Mótinu slitið og aðstoð óskast við frágang

    feykir.is Skagafjörður 03.08.2026 kl. 10.47 bladamadur@feykir.is
    Unglinalandsmótinu var slitið í gærkvöldi og þá tekur við tiltektin. Núna í hádeginu, kl. 12:00, hefst frágangur við íþróttasvæðið. Aðstoð óskast þar sem margar hendur vinna létt verk.
    Meira
  • Nokkrir eldhressir keppendur í tröppuhlaup komnir upp á Nafir. MYND: UMFÍ

    Unglingalandsmóti lýkur í kvöld með flugeldasýningu

    feykir.is Skagafjörður, Íþróttir, Mannlíf 02.08.2026 kl. 12.24 oli@feykir.is
    Það er runninn upp lokadagur Unglingalandsmótsins á Sauðárkróki og ekki væsir um keppendur og gesti veðrið hefur heldur betur verið með þeim í liði, aðeins á föstudaginn sem dimmt var yfir og þokuloft en annars bara glampandi sól og nauðsynlegur norðanandvari til kælingur. Að sögn Pálínu Óskar í móttstjórn hefur mótshaldið gengið ljómandi vel og skráningar í allar greinar skilað sér vel. Hún segir gleðilegt að þátttaka sé góð í öllum greinum og sömuleiðis í þeirri afþreyingu sem boðið er upp á.
    Meira

  • Ungmennafélagið Fram á Skagaströnd fær styrk til strandhreinsunar

    feykir.is Austur-Húnavatnssýsla, Mannlíf 02.08.2026 kl. 11.36 oli@feykir.is
    Ungmennafélagið Fram á Skagaströnd hefur fengið 733 þúsund króna styrk frá Umhverfis- og orkustofnun til strandhreinsunar. Húnahornið segir frá því að stofnunin úthlutaði styrkjum nýverið til 18 verkefna en umsóknir voru 24 talsins. Heildarfjárhæð styrkjanna er tæplega 30 milljónir króna og eru þeir veittir á grundvelli aðgerðar 17 í aðgerðaráætlun umhverfis- og auðlindaráðuneytisins í plastmálefnum Úr viðjum plastsins. Sjá má alla styrkthafa hér.
    Meira
Yfirlit frétta