Fréttir

Á fundi fræðslunefndar Sveitarfélagsins Skagafjarðar þann 2. febrúar 2016 ítrekaði nefndin fyrri bókanir sínar um mikilvægi þess að framkvæmdum við nýja deild leikskólans Birkilundar verði hraðað svo sem verða má. Lýsti nefndin jafnframt áhyggjum af því hve verkið hefur dregist.

Nú er komið að vetrarfríi í skólunum í Skagafirði og breytist opnunartími sundlaugarinnar í Varmahlíð á meðan það stendur yfir. Fimmtudaginn 11. febrúar verður opið milli kl 14 og 21 og föstudaginn 12. febrúar verður lokað.

Málefni aldraðra á Blönduósi voru til umræðu á fundi Öldungaráðs Blönduósbæjar þann 28. janúar sl. Í fundargerð kemur fram að þar hafi m.a. verið rætt um að koma þurfi upp aðstöðu fyrir eldri borgara til tómstundaiðju, skipulagðar sætaferðir fyrir eldri borgara innan sveitarfélagsins og aukið samstarf við grunnskóla. Jafnframt kom til umræðu með hvaða hætti sveitarfélagið gæti aukið upplýsingaflæði til eldri borgara.

Alþingismennirnir Einar Kristinn Guðfinnsson og Haraldur Benediktsson boða til almenns fundar á Kaffi Krók, Sauðárkróki miðvikudaginn 10. febrúar nk. kl. 20. Á fundinn mætir einnig Ari Edvald, forstjóri MS og formaður atvinnumálanefndar Sjálfstæðisflokksins.

Það snjóar á Norðurlandi en samkvæmt vef Vegagerðarinnar eru þó flestir vegir vel færir og hreinsun vega langt komin. Enn er þó þungfært á Siglufjarðarvegi. Norðan 8-15 og él er á Ströndum og Norðurlandi vestra. Lægir smám saman á morgun. Frost 2 til 10 stig.

Þrír ungir menn á Hvammstanga standa fyrir svo kölluðu Pallaballi á Hvammstanga, helgina fyrir páska. Allur ágóðinn af dansleiknum rennur til kaupa á ómtæki fyrir Heilbrigðisstofnun Vesturlands á Hvammstanga.

Meistaradeild Norðurlands kynnir nú til leiks þriðja liðið sem hefur boðað þátttöku sína í KS deildinni í vetur, en það er Hofstorfan / 66°norður. Liðstjóri er Elvar E. Einarsson og með honum eru Bjarni Jónasson, Lilja Pálmadóttir og Gústaf Ásgeir Hinriksson, en sá síðastnefndi kemur inn fyrir Tryggva Björnsson.

Minjastofnun Íslands auglýsti tvær stöður lausar í starfstöð sinni á Sauðárkróki á dögunum, annars vegar starf arkiteksts og hins vegar fornleifafræðings. Þá var staða fornleifafræðings við Minjastofnun í Reykjavík einnig auglýst laus til umsóknar. Umsóknarfrestur rann út þann 1. febrúar sl. Samkvæmt vef Minjastofnunar bárust 13 umsóknir um störfin þrjú og er verið að vinna úr umsóknum.

Á vef Sveitarfélagsins Skagafjarðar kemur fram að íbúum sveitarfélagsins hefur fjölgað undanfarið ár. Samkvæmt tölum úr þjóðskrá fór íbúafjöldinn lægst niður í 3884 íbúa í nóvember sl. en fjöldi íbúa var 3910 þann 1. janúar 2015 og eru nú orðnir 3928 talsins.

Undirbúningsvinna vegna ljósleiðaravæðingar Húnavatnshrepps er nú í fullum gangi. Með ljósleiðara kerfi munu íbúar sveitarfélagsins geta notið sömu eða betri fjarskiptagæða en þekkist í þéttbýli á Íslandi, hvort sem litið er til gagnaflutnings, internets, sjónvarps, síma eða annarra stafrænna samskipta.