Fréttir

Fyrsta mót KS-Deildarinnar verður haldið næstkomandi miðvikudagskvöld í Svaðastaðahöllinni á Sauðárkróki og hefst kl 19:00. Keppt verður í fjórgangi. „Mikil eftirvænting er fyrir þessu fyrsta keppniskvöldi KS-Deildarinnar. Mikið hefur verið um æfingar í Svaðastaðahöllinni að undanförnu og ljóst að liðin leggja mikið undir,“ segir í fréttatilkynningu frá Meistaradeild Norðurlands.

Stofnfundur fyrir Hestamannafélagið Skagfirðing verður haldinn í Tjarnarbæ í dag, þriðjudaginn 16. febrúar, kl. 20:00. „Hestamenn í Skagafirði eru hvattir til að mæta og taka þátt í þessum tímamótum í skagfirskri hestamennsku,“ segir í auglýsingu frá sameiningarnefndinni í Sjónhorninu.

Suðvestan ofsaveður er fram undir kl. 09 til 10 á Vestfjörðum og vestantil á Norðurlandi, en dregur smám saman úr vindi með morgninum, sunnan 8-15 annað kvöld. Frost 1 til 6 stig. Á Norðurlandi er hálka á flestum vegum og víðast hvar mjög hvasst. Ófært er á Öxnadalsheiði.

Nokkrar tillögur Norðvesturnefndarinnar svokölluðu voru samþykktar af Ríkisstjórn í desember sl. Að sögn Arnars Þórs Sævarssonar bæjarstjóra á Blönduósi var mikil samstaða á svæðinu um að koma þessum tillögum til leiðar og að þakka beri Norðvesturnefndinni, með Stefáni Vagni Stefánssyni í broddi fylkingar, fyrir þá vinnu. „Varðandi Blönduósbæ þá tókum við afstöðu til þess að miða í rauninni við að styrkja það sem fyrir er, við töldum það vænlegt til árangurs,“ sagði Arnar í viðtali við Feyki sem kom út sl. fimmtudag.

Unglingadeildin í Höfðaskóla er óðum að spjaldvæðast og samkvæmt vef Svf. Skagastrandar nú er svo komið að flestir unglinganna koma í skólann með sínar eigin spjaldtölvur. Foreldrafélag skólans ásamt sveitarstjórn Skagastrandar tóku þá ákvörðun að styrkja nemendur um 50% af kaupvirði spjaldtölvu (að hámarki 50.000) og varð sú ákvörðun til þess að flestir nemendur hafa nú eignast tæki.

Hljómsveitin Kaleo úr sveit Mosfells hefur verið í meikinu í USA síðustu misserin. Ekki er laust við að örlítið hafi hlaupið á snærið hjá þessu sterka bandi á dögunum þegar kynningarherferð vegna nýs sjónvarpsþáttar þeirra stjörnufóstbræðra Martin Scorsese og Mick Jagger, Vinyl, fór á yfirsnúning. Þannig var myndband við lag þeirra, No Good, notað sem eitt helsta kynningarefni sjónvarpsþáttarins.

Þann 3. febrúar var sjósettur fyrsti báturinn sem smíðaður er hjá fyrirtækinu Mótun á Sauðárkróki. Um er að ræða trefjaplastbát af tegundinni Gáski 1180. Ber hann nafnið Agla ÁR 79 og er í eigu fyrirtækisins AAH ehf. sem hefur aðsetur í Reykjavík.

Opnað hefur verið fyrir umsóknir þátttakenda á Handverkshátíð við Hrafnagil sem haldin verður dagana 4. – 7. ágúst næstkomandi. Líkt og undangengni ár geta þátttakendur sótt um sölubás á innisvæði, útisvæði eða í matvælatjaldi. Með umsókn skuldbindur sýnandi sig til að taka þátt í sýningunni alla 4 sýningardagana.

Grasrótarverðlaun KSÍ árið 2016 hlýtur Ungmennafélagið Tindastóll. Á Facebook-síðu KSÍ segir að Tindastóll hafi um áraraðir haldið úti knattspyrnumóti fyrir bæði stráka og stelpur með miklum sóma, Landsbankamót Tindastóls fyrir stúlkur í 6. og 7. flokki og Króksmót Tindastóls fyrir drengi í 5., 6. og 7. flokki.

Nú stendur yfir kosning um kjarasamning fyrir félagsmenn Verslunarmannafélags Skagafjarðar og þá félagsmenn Öldunnar stéttarfélags sem starfa á almennum vinnumarkaði.