Fréttir

Fyrsta mót vetrarins í mótaröð Neista var haldið í Reiðhöllinni Arnargerði fimmtudagskvöldið 11. febrúar. Úrslit urðu þessi, samkvæmt fréttatilkynningu frá félaginu.

Kiwanisklúbburinn Drangey í Skagafirði hefur ýmislegt á prjónunum nú á þessu starfsári, að sögn Ólafs Jónssonar, framámanns í klúbbnum. „Starf klúbbsins er í blóma og má segja að hið mikla átak er við stóðum fyrir á síðasta ári skili sér í góðu starfi,“ sagði hann í samtali við Feyki á miðvikudaginn.

Sprækir Njarðvíkingar mættu í Síkið í kvöld og spiluðu hörkuleik við lið Tindastóls. Gestirnir voru lengstum skrefinu á undan með Loga Gunnars í stuði og Atkinson ólseigan en Stólarnir reyndust þó seigari á lokametrunum, náðu forystunni þegar mestu skipti og gestirnir fóru á taugum. Lokatölur 88-79 fyrir Tindastól.

Pappírsvörufyrirtækið PAPCO hefur nú gert nýjan viðskiptasamning við Fjölnet. Samkvæmt samningnum tekur Fjölnet að sér hýsingu og rekstur á öllum miðlægum kerfum og nær hann jafnframt til afritunar á öllum gögnum fyrirtækisins. Starfsmenn PAPCO fá einnig aðgang að þjónustuveri Fjölnets.

Stór sprunga í Ketubjörgum á Skaga hefur verið til umfjöllunar í fjölmiðlum síðan í byrjun síðasta árs. Nú er svo komið að sprungan er orðin 2-3 metrar á breidd á yfirborði. Svæðið var girt af með lögregluborðum sl. sumar og ferðamenn ítrekað varaðir við hættum sem af sprungunum stafa. Sprungan er í björgunum í Syðri-Bjargarvík en Ketubjörgin eru vinsæll útsýnis- og áningarstaður við vestanverðan Skagafjörð.

Í fréttatilkynningu frá Uppbyggingarsjóði Norðurlands vestra er minnt á það að umsóknarfrestur um styrki úr sjóðnum nálgist hratt, en hann rennur út næstkomandi mánudag, 15. febrúar.

Guðmar Freyr Magnússon 15 ára leikmaður Tindastóls slasaðist í fótboltaleik við KA á Akureyri um sl. helgi. Lögregla og sjúkralið var kallað á vettvang til að flytja Guðmar á sjúkrahús sem hafði fengið slæmt högg á nefið. Tilsvör Guðmars vöktu athygli á samfélags- og netmiðlum þegar Lögreglan á Norðurlandi eystra greindi frá atvikinu á Facebook-síðu sinni. „Þegar búið var að binda um sárið var hann spurður hvort hann treysti sér að standa upp og leggjast í börurnar. Þá lá ekki á svarinu: „Að sjálfsögðu! Ég er Skagfirðingur“. Feykir leit í heimsókn til Guðmars sl. mánudag.

Reynir Snær Magnússon fæddist árið 1993, alinn upp á Sauðárkróki af Aðalheiði Reynisdóttur og Magnúsi Ingvarssyni. Hljóðfærið hans er gítar. Spurður um helstu tónlistarafrek svarar hann: „Ég er nú ekki viss hvað er vert að nefna nema kannski Músíktilraunir 2012. Var þar valinn Gítarleikari Músíktilrauna sem gaf mér mikið spark til að leggja þann metnað í gítarleik sem ég geri í dag.“ Reynir býr nú í Reykjavík en er i jazzgítarnámi i Tónlistarskóla Garðabæjar og stefnir á miðpróf i vor. „Ég er að spila i nokkrum böndum en helst mætti nefna Körrent, sem spilar frekar rokkslegið popp, og Prime Cake sem er "instrumental" fusion kvartet. Svo að sjálfsögðu er ég í alskagfirsku ballsveitinni Hljómsveit kvöldsins.“

Leikfélög UMF Grettis og Kormáks munu setja upp sýninguna SÚPERSTAR í Fèlagsheimilinu Hvammstanga um komandi páska. Leikstjórn er í höndum Sigurðar Líndal Þórissonar, hljómsveitastjórn í höndum Daníels Geirs Sigurðssonar og sér Ingibjörg Jónsdóttir um skipulagningu. Frá þessu segir á vef Norðanáttar.

Það er staðreynd að veruleg fjölgun hefur átt sér stað á leigumarkaði, frá árinu 2008. 20,8% heimila voru á leigumarkaði árið 2014, samanborið við 12,9 % árið 2008. Auk þessa hafa kannanir, m.a. frá ASÍ sýnt fram á að margir þeirra sem búa á leigumarkaði, búa við verulega þungan húsnæðiskostnað. Algengt er að sá húsnæðiskostnaður nemi á bilinu 40 – 70 % af ráðstöfunartekjum.