Fréttir

Undanfarna viku hefur fjármálaráðherra farið mikinn í fjölmiðlum og í ræðusal Alþingis um íbúðabréfin og ábyrgð ríkissjóðs á þeim. Hann hefur ítrekað rætt um að vegna þess að ábyrgðin sé einföld ábyrgð en ekki sjálfskuldaábyrgð geti ríkið keyrt ÍL-sjóð í þrot og komist hjá því að greiða ógjaldfallna vexti og verðbætur af íbúðabréfunum.

Nýr miðbæjarkjarni á Selfossi var opnaður á síðasta ári og hefur vakið mikla athygli og gleður augað þó ekki hafi kannski allir verið á eitt sáttir um framkvæmdina. Nú á dögunum var boðað til íbúafundar sunnan heiða þar sem nýr áfangi í byggingu miðbæjar Selfoss var kynntur. Áætlað er að 40 ný hús muni fylla annan áfanga verkefnisins og er hugmyndin að um endurbyggingar af sögulegum húsum verði að ræða, víðsvegar að af landinu. Þar með talið Málmeyjarhúsið, gullfallegt hús sem stóð í Málmey á Skagafirði en brann um miðja síðustu öld.

Á sextugasta og fjórða kirkjuþingi Þjóðkirkjunnar, sem var sett sl. laugardag, var samþykkt tillaga um sameiningu allra prestakalla í Skagafirði í eitt, Skagafjarðarprestakall. Tekur það gildi 1. janúar 2023.

„Þetta var bæði grín og alvara til að byrja með,“ segir Eysteinn Steingrímsson, bóndi á Laufhóli, spurður út í forystuhrútinn Móra sem Eysteinn hefur haft með sér í leiðangra í Kolbeinsdal að leita eftirlegukinda.

Fjögur tilboð bárust í verkið „Sorphirða fyrir heimili, stofnanir, gámastöðvar o.fl. í Skagafirði 2023-2028“ en tilboð voru opnuð í lok september. Íslenska Gámafélagið ehf var með lægsta boð eða upp á 115,9% af kostnaðaráætlun. Einnig komu tilboð frá Kubbur ehf upp á 137%, Terra Umhverfisþjónusta 187,5% og GS Lausnir 212,5% af áætlun.

Það ríkti verðskulduð eftirvænting í loftinu þegar Hofsósingar og nærsveitungar brugðu sér í félagsheimilið Höfðaborg á Hofsósi á laugardaginn. Óhætt er að segja að það hafi verið fullt út úr dyrum. Höfðu einhverjir á orði að þetta væri bara eins og í miðbæ Reykjavíkur. Aftur var húsfyllir seinna um kvöldið og ekki síður góðar undirtektir þar. Enda kominn tími til að sýna sig og sjá aðra og hlæja svolítið hressileg eina kvöldstund.

Boðað hefur verið til sviðamessu nk. laugardag, 29. október, í Félagsheimilinu á Hvammstanga og mun allur ágóði viðburðarins mun renna til endurbyggingar Norðurbrautar, fyrstu vegasjoppunnar, sem hugmyndir eru um að komið verði fyrir á lóð Verslunarminjasafnsins ásamt Bangsabát.

Á mánudaginn skelltu nemendur Höfðaskóla á Skagaströnd, sem eru þátttakendur í valgreininni íþróttir og heilsufræði,sér á Krókinn til að taka á honum stóra sínum á Crossfit æfingu hjá Crossfit 550. Krakkarnir fengu smá fræðslu um crossfit og gerðu síðan WOD dagsins eða Work Of the Day eins og það kallast á ylhýru enskunni.

Veronika Lilja Þórðardóttir, 6 ára, dóttir Lovísu Heiðrúnar og Þórðar Grétars sem búa á Sæmundargötunni á Króknum. Í garðinum hjá þeim má oft sjá svartan fallegan hreinræktaðan Labrador sem heitir Þoka og elskar ekkert meira en að fá að heilsa þér ef þú röltir fram hjá.

Áformað er að flytja starfsemi Innheimtustofnunar sveitarfélaga til ríkisins. Meginmarkmiðið er að einfalda verkaskiptingu ríkis og sveitarfélaga en hlutverk stofnunarinnar er að innheimta meðlög. Húnahornið segir frá því í frétt að tillögur þessa efnis hafi verið kynntar í greinargerð verkefnisstjórnar, sem Sigurður Ingi Jóhannsson innviðaráðherra skipaði, á grundvelli viljayfirlýsingar ríkis og sveitarfélaga frá janúar 2021, til að skoða fýsileika á tilfærslu verkefna við innheimtu meðlaga frá sveitarfélögum til ríkisins. Megintillaga verkefnisstjórnarinnar er að færa ábyrgð á innheimtu meðlaga frá sveitarfélögunum til ríkisins.