Íslandsmeistaramót í Skagafirði og tvö lið í WOW Cyclothon - Hjólreiðafélagið Drangey stendur í stórræðum
Það verður nóg að gera hjá liðsmönnum Hjólreiðafélagsins Drangeyjar í Skagafirði en nk. sunnudag, 23. júní, mun félagið standa fyrir Drangeyjarmótinu, sem er hluti af Íslandsmeistaramóti í hjólreiðum. Þremur dögum síðar taka tvö lið frá klúbbnum þátt í WOW Cyclothon.
Feykir ræddi fyrir helgi við þá félaga Pétur Inga Björnsson og Hallbjörn Björnsson, stjórnarmenn í Drangey og var þá um 60 skráningar komnar í Drangeyjarmótið en þeir gerðu ráð fyrir því að þeim ætti eftir að fjölga. Keppt er í sex styrkleikaflokkum karla og kvenna og geta allir tekið þátt. Farið er af stað frá Húsi frítímans á Sauðárkróki en fyrsti hópurinn er ræstur kl. 7:30 en sá síðasti kl. 8:00.
Hjólað er fram braut í Varmahlíð og út Blönduhlíð að vegamótum Siglufjarðarvegar og Sauðárkróksbrautar. Þar skiptast hóparnir, annars vegar þeir sem fara stystu leiðina og upp á Krók og þeir sem taka lengri leiðina og hjóla út í Hofsós, taka hring þar og til baka og upp á Krók. Kvennaflokkurinn endar við Hús frítímans en masterskarlarnir halda áfram alla leið upp í skíðalyftu og hafa þá hjólað 125 km og þar af rúmlega tvo km í klifur. Þess má geta að frá Króknum og upp í skíðalyftu er nánast öll leiðin upp í móti og síðasti kaflinn brött og löng brekka.
Pétur Ingi segir að það sem þykir spennandi við Skagafjörð sem keppnissvæði í Íslandsmeistaramótinu er hve skemmtilegar hjólaleiðir er hægt að bjóða upp á. „Við eigum þær margar í Skagafirði, og ekki mikil umferð miðað við það sem gerist fyrir sunnan.“
WOW Cyclothon
Það er skammt stórra högga á milli því aðeins þremur dögum síðar ætla 20 einstaklingar, í tveimur tíu manna liðum undir merkjum Drangeyjar, að leggja af stað frá Reykjavík og hjóla hringinn í kringum landið í WOW Cyclothon.
„Allt eru þetta Skagfirðingar og nær jafnt kynjahlutfall í liðunum. Við keppum saman þessi lið að því leyti að 18 munu hjóla og tveir keyra bílinn. Það eru alltaf tveir sem hjóla í einu,“ segir Pétur og bætir við: „Breytingin hjá okkur frá fyrri keppni er að við eignuðumst langferðabíl sem við breyttum í hjólreiðalangferðabíl, þar sem öll hjólin komast inn og hjólafólkið getur hvílt sig.“
Þeir sem vilja fylgjast með geta gert það á Facebooksíðu Hjólreiðafélagsins Drangeyjar og wowcyclothon.is/
Að sögn þeirra Péturs og Hallbjörns er mikill áhugi á hjólreiðum í Skagafirði og hópurinn stór sem hjólar reglulega og telur klúbburinn um 40 félaga.
Fleiri fréttir
-
Alvarleg vanræksla á nautgripum kærð til lögreglu
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 10.05Í tilkynningu á vef Matvælastofnunar er greint frá því að MAST hafi kært til lögreglu alvarlega vanrækslu eftir að 29 nautgripir fundust dauðir í gripahúsi við eftirlit á lögbýli á Norðurlandi vestra. Í kjölfarið aflífuðu starfsmenn stofnunarinnar 21 grip til viðbótar á staðnum sökum slæms ástands, allt gripi sem voru hýstir í húsinu.Meira -
Nærandi ferðaþjónusta | Freyja Rut Emilsdóttir skrifar
feykir.is Skagafjörður, Aðsendar greinar 19.04.2024 kl. 09.03Nærandi ferðaþjónusta er hugtak sem fær sífellt meiri athygli í umræðunni bæði hér á Íslandi sem og um heim allan. Hugtakið felur í sér markvissar aðgerðir sem fólk og fyrirtæki geta gripið til með það að markmiði að hafa jákvæð áhrif á nærumhverfi og náttúru og skilja þannig við áfangastaðinn, samfélagið og náttúruna í betra ástandi en áður. Þannig er farið skrefi lengra en sjálfbærni þar sem markmiðið er að skilja ekki við umhverfið í verra ástandi en áður og ganga ekki á auðlindir framtíðar.Meira -
Liðsheildin skilaði þessum sigri - segir Helgi þjálfari
feykir.is Skagafjörður, Íþróttir 19.04.2024 kl. 03.09„Þessi leikur var mjög jafn og spennandi allan tímann, algjör naglbítur tveggja góðra liða sem bæði lögðu allt i að vinna,“ sagði Helgi þjálfari Margeirs þegar Feykir bað hann að lýsa leik Tindastóls og Snæfells í gærkvöldi. „Frábær stemning í húsinu en Snæfell var með flotta stuðningsmannasveit og Síkið vel mannað og stuðningsmannasveitin í essinu sínu,“ en samkvæmt leikskýrslu voru um 300 áhorfendur í húsinu sem gerist ekki á hverjum degi í kvennaboltanum.Meira -
Lið Tindastóls sló út Subway-deildar lið Snæfells
feykir.is Skagafjörður, Íþróttir 18.04.2024 kl. 22.53Það var gleði og gaman í Síkinu í kvöld en sennilega þó ekki síður stress og naglanögun fram á síðustu sekúndu framlengingar þegar Tindastóll og Snæfell mættust í fjórða leik einvígis síns um réttinn til að spila um sæti í efstu deild. Leikurinn var jafn og spennandi allan tímann en gestirnir náðu góðum kafla snemma í fjórða leikhluta, náðu 13 stiga forystu og virtust ætla að tryggja sér oddaleik í Stykkishólmi. Lið Tindastóls gafst ekki upp og náði að jafna í blálokin og tryggja sér framlengingu þar sem heimaliðið reyndist sterkara. Lokatölur 82-78 og rjúkandi stemning hjá Stólastúlkum.Meira -
Jordyn Rhodes komin með leikheimild
feykir.is Skagafjörður, Íþróttir 18.04.2024 kl. 18.42Tindastóll teflir fram liði í þriðja skipti í efstu deild kvennafótboltans eftir ansi gott tímabil síðastliðið sumar. Besta deildin hefst nú á sunnudag og þá kemur FH í heimsókn á Krókinn. Það vita allir að það er bara ein Murr en hún hefur nú skipt um heimavöll og spilar með Fram í sumar í Lengjudeildinni. Jordyn Rhodes tekur hennar stöðu í fremstu víglínu og eru miklar vonir bundnar við hana.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.