Björgunarsveitirnar styrktar
Blönduósbær og Sveitarfélagið Skagafjörður hafa tekið ákvörðun um að styrkja björgunarsveitirnar á sínum svæðum um eina milljón króna hverja en auk þess styrkir Sveitarfélagið Skagafjörður Skagfirðingasveit um hálfa milljón vegna umfangs stjórnstöðvar. Er þetta gert í kjölfar þess mikla óveðurs sem gekk yfir norðanvert landið í síðustu viku og skapaði mikið álag á björgunarsveitir á svæðinu. Áður hefur sveitarstjórn Húnaþings vestra styrkt Björgunarsveitina Húna um eina milljón króna.
Á fundi sveitarstjórnar Blönduósbæjar sem haldinn var 17. desember sl. var eftirfarandi tillaga lögð fram og samþykkt samhljóða:
„Björgunarfélagið Blanda hefur unnið þrekvirki síðastliðna viku við að aðstoða íbúa og stofnanir sveitarfélagsins sem og í nágrannasveitarfélögum, við mjög erfiðar aðstæður. Félagsmenn björgunarsveita leggja mikið á sig, oft í mjög erfiðum aðstæðum, til þess að tryggja öryggi íbúa. Það á bæði við um beina aðstoð við íbúa og ekki síst aðstoð við Rarik og Landsnet við að koma á rafmagni, sem og Heilbrigðisstofnun Norðurlands við að koma starfsfólki, sjúklingum og aðstandendum að og frá stofnuninni.
Í þakkarskyni hefur Blönduósbær ákveðið að styrkja Björgunarfélagið Blöndu um eina milljón króna vegna mikils álags síðustu daga og fara þar með að fordæmi Húnaþings vestra sem styrktu Björgunarsveitina Húna á Hvammstanga með sambærilegum hætti.“
Ennfremur skorar Blönduósbær á önnur sveitarfélög, RARIK, Landsnet, HSN og fleiri að styrkja með beinum hætti björgunarsveitir sem voru þeim innan handar í óveðrinu síðastliðna viku, við mjög erfiðar aðstæður.
Björgunarsveitum í Skagafirði þökkuð störf
Á fundi byggðarráðs Skagafjarðar sem haldinn var í gær, 18. desember, var samþykkt að styrkja björgunarsveitirnar þrjár í Skagafirði, Björgunarsveitina Gretti, Skagfirðingasveit og Flugbjörgunarsveitina í Varmahlíð, um eina milljón króna hverja. Að auki fær Skagfirðingasveit 500.000 kr. vegna umfangs stjórnstöðvar.
Í fundargerð segir:
„Það er ómetanlegt fyrir sveitarfélag að eiga að sjálfboðaliðasveitir eins og björgunarsveitirnar sem á hvaða tímum og aðstæðum sem er, eru tilbúnar að fara til aðstoðar og leggja jafnvel líf og heilsu að veði.
Byggðarráð vill einnig þakka íbúum sveitarfélagsins fyrir að virða viðvaranir sem gefnar voru út og gera viðeigandi ráðstafanir sem gerðu alla vinnu viðbragðsaðila einfaldari í þessum erfiðu aðstæðum.
Í ljósi þessa samþykkir byggðarráð að styrkja björgunarsveitirnar þrjár í Skagafirði um samtals 3.500.000 kr. sem skiptist þannig að hver sveit fær 1.000.000 kr. í sinn hlut og að auki fær Skagfirðingasveit 500.000 kr. vegna umfangs stjórnstöðvar."
Byggðaráð þakkar einnig starfsmönnum RARIK í Skagafirði fyrir ósérhlífni í þeirra störfum undanfarna daga þar sem þeir unnu fáliðaðir í mjög erfiðum aðstæðum og segir ljóst að fjölga þurfi í starfsliði RARIK á Sauðárkróki.
„Í samningi um sölu Rafveitu Sauðárkróks til RARIK voru gefin fyrirheit um fjölgun starfa og frekari innviðabyggingu sem ekki hefur gengið eftir hingað til. Þvert á móti hefur starfsfólki fækkað. Byggðarráð samþykkir að fela sveitarstjóra að óska eftir fundi með stjórn RARIK sem allra fyrst,“ segir í fundargerð byggðarráðs.
Fleiri fréttir
-
Skagamenn höfðu betur gegn Stólum í bikarnum
feykir.is Skagafjörður, Íþróttir 25.04.2024 kl. 21.04Lið Tindastóls fór á Skagann í dag og lék gegn heimamönnum í ÍA í 32 liða úrsltum Mjólkurbikarsins. Leikið var í Akraneshöllinni og fóru leikar þannig að Skagamenn, sem eru með lið í Bestu deild karla, höfðu betur og enduðu þar með bikarævintýri Stólanna. Lokatölur þó aðeins 3-0.Meira -
Erum allar ready í alvöru seríu - segir Brynja Líf
feykir.is Skagafjörður, Íþróttir, Ljósmyndavefur 25.04.2024 kl. 14.22Það hefur verið gaman að fylgjast með liði Stólastúlkna í körfunni í vetur og nú spilar liðið til úrslita um sæti í Subway-deildinni að ári. Það er mikil breyting á liðinu frá því árið áður, mörg púsl bættust í hópinn síðasta haust sem Helgi þjálfari hefur náð að sameina í heilsteypta mynd. Eitt lykilpúslið er Brynja Líf Júlíusdóttir, 16 ára stúlka frá Egilsstöðum, sem kom á Krókinn til að spila með liði Tindastóls og stunda nám á náttúruvísindabraut og í körfuboltaakademíu FNV. Hún er ein efnilegasta körfuboltastúlka landsins í sínum árgangi og í síðasta leiknum gegn Snæfelli á dögunum þá gerði hún átta af tíu stigum Tindastóls í framlengingu.Meira -
Kvenfélag Svínavatnshrepps hélt upp á 150 ára afmælið með kökuveislu af gamla skólanum
feykir.is Austur-Húnavatnssýsla, Mannlíf 25.04.2024 kl. 13.43Kvenfélag Svínavatnshrepps hélt upp á 150 ára afmæli sitt 20. apríl sl. Var öllum kvenfélagskonum í Austur-Húnavatnssýslu boðið í kaffi í Dalsmynni. Þar var mikil kökuveisla sem einkenndist af því að hafa kaffibrauð sem hugsanlega hefði getað verið á borðum er kvenfélagið var stofnað.Meira -
Gleðilegt sumar
feykir.is Skagafjörður, Austur-Húnavatnssýsla, Vestur-Húnavatnssýsla 25.04.2024 kl. 11.55„Það er komið sumar...“ sungu Mannakorn um árið og það á við í dag. Í það minnsta er sumardagurinn fyrsti í dag og þó það sé kannski ekki sami stemmari fyrir þessum degi á þessari öld og var á þeirri síðustu þá fylgir deginum oftar en ekki bjartsýni og ylur í hjarta – já, eiginlega sama hvernig viðrar.Meira -
Giggó-appið snýst um að bjarga sér | Spjallað við Kjartan Hall
feykir.is Skagafjörður, Mannlíf, Lokað efni 25.04.2024 kl. 10.38Í janúar rak blaðamaður augun í nýtt app sem kallast Giggó sem er sett fram af Alfreð. Þar sem það var gamalkunnur Skagfirðingur út að austan, lista- og íslenskumaðurinn Kjartan Hallur frá Melstað í Óslandshlíðinni, sem kynnti þetta á Facebook, var að sjálfsögðu tilvalið að senda á hann nokkrar spurningar. Kjartan Hallur er í Alfreðs teyminu og segir starf sitt hjá Alfreð fyrst og fremst vera að ritstýra, semja texta og samræma skilaboð fyrir appið, heimasíðu og þjónustuvefi Alfreðs. „Og núna hefur Giggó-appið bæst við á verkefnalistann. Þar undir er heimasíða, bloggskrif og vinna í markaðssetningu á þessu nýja verkfæri fyrir íslenska gigg-hagkerfið,“ segir hann.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.