Furðar sig á málflutningi Sambands íslenskra sveitarfélaga

Bergmann Guðmundsson formaður Kennarasambands Norðurlands. Mynd: PF

Bergmann Guðmundsson kennari við Árskóla á Sauðárkróki og formaður Kennarasambands Norðurlands vestra furða sig á málflutningi Sambands íslenskra sveitarfélaga í miðjum kjaraviðræðum en sambandið gaf út yfirlýsingu fyrr í vikunni m.a. um að byrjunarlaun grunnskólakennara hafi hækkað sem nemur um 34% í síðustu samningum.

„Að mínu mati er hér um einhvers konar hugsunarleysi að ræða eða hreinlega mistök af hálfu Sambandsins að koma með þessa yfirlýsingu á þessum tímapunkti í kjaraviðræðum Sambandsins við Félag Grunnskólakennara. Vona ég að þetta endurspegli ekki viðhorf viðsemjenda okkar og að þeir muni draga þessa yfirlýsingu til baka og einbeita sér að því að ganga að samningum við FG með þeim hætti að kennarar megi vel við una. Ég vísa einnig í yfirlýsingu samninganefndar FG sem segir allt sem segja þarf um afstöðu félagsmanna til þessarar yfirlýsingar.

Yfirlýsing Sambands íslenskra sveitarfélaga vegna kjarasamninga við Félag grunnskólakennara er eftirfarandi: 

Í ljósi umræðu um launastöðu grunnskólakennara þá vill Samband íslenskra sveitarfélaga koma eftirfarandi á framfæri:

Síðasti kjarasamningur sem gerður var við Félag grunnskólakennara hafði gildistímann 1. maí 2014 – 31. maí 2016.  Í þeim kjarasamningi var samið um breytingar á vinnutímakafla kjarasamnings og launahækkanir sem ætlað var að rétta af launastöðu grunnskólakennara gagnvart öðrum háskólamenntuðum starfsmönnum sveitarfélaga. 

Þær launahækkanir leiddu til þess að meðaldagvinnulaun félagsmanna hafa hækkað um 30% á samningstímanum.  Byrjunarlaun grunnskólakennara hafa á sama tíma hækkað sem nemur um 34% en aðilar voru sammála um nauðsyn þess að hækka byrjunarlaun til að bregðast við lítilli ásókn í kennaranámið.

Kjarasamningar grunnskólakennara voru lausir frá 1. júní 2016 og hefur samninganefnd Sambands íslenskra sveitarfélaga í tvígang undirritað kjarasamning við Félag grunnskólakennara frá þeim tíma, annarsvegar í lok maí 2016 og hinsvegar í lok ágúst 2016.  Þeir samningar hefðu tryggt kennurum sambærilegar hækkanir og samið hefur verið um við aðra hópa á vinnumarkaði vegna áranna 2016-2018.  Báðir samningarnir voru felldir í atkvæðagreiðslu kennara.

Nýútskrifaður grunnskólakennari með fimm ára háskólamenntun og án starfsreynslu fær í dag grunnlaun sem nema 418.848 kr. á mánuði.  Nýútskrifaður grunnskólakennari sem tekur að sér umsjónarkennslu fær  441.435 kr. í grunnlaun.

Grunnskólakennari sem lokið hefur 5 ára háskólanámi og hefur 15 ára starfsreynslu fær í dag 490.818 kr. í grunnlaun  og 517.787 kr. starfi viðkomandi sem umsjónarkennari.

Meðaldagvinnulaun félagsmanna í Félagi grunnskólakennara eru um 480.000 kr. í dag. 

Þegar meðaldagvinnulaun annarra háskólamenntaðra starfsmanna sveitarfélaga eru skoðuð þá hallar ekki á grunnskólakennara í þeim samanburði. 

Hér að neðan eru  upplýsingar um dagvinnulaun helstu starfsheita í kjarasamningi grunnskólakennara miðað við 5 ára háskólanám.  Af heildarfjölda kennara sinna tæp 60% umsjónarkennslu.

Taflan byggir á launastöðu í launatöflu A í kjarasamningi aðila en allir nýráðnir kennarar taka laun eftir henni ásamt þeim kennurum sem hafa afsalað sér kennsluafslætti en það eru um 90% kennara.

Hér að neðan sést launaþróun dagvinnulauna hjá Félagi grunnskólakennara í samanburði við launaþróun á opinberum vinnumarkaði annarsvegar og á almennum vinnumarkaði hinsvegar tímabilið mars 2013 til mars 2016. 

Yfirlýsing frá samninganefnd Félags grunnskólakennara:

Í yfirlýsingu frá Sambandi íslenskra sveitarfélaga vegna kjarasamninga við Félag grunnskólakennara er birt línurit sem á að sýna að meðaldagvinnulaun félagsmanna FG hafi hækkað töluvert umfram laun starfsmanna á almennum og opinberum vinnumarkaði frá mars 2013 til mars 2016. Í yfirlýsingunni er þeirri mikilvægu staðreynd sleppt að kostnaðaráhrif kjarasamninganna á þessu tímabili voru mun minni en launahækkanirnar. Flestir kennarar afsöluðu sér t.d. kennsluafslætti (sem leiðir til meiri kennslu), gerðar voru breytingar á viðverutíma kennara, launapottur var færður inn í grunnlaun, aukin vinna færð á uppbrotsdaga og fleira. Allt þetta leiðir til lægri launakostnaðar sveitarfélaganna nú þegar og einnig þegar litið er til lengri tíma. Það má því vera ljóst að framsetning sveitarfélaganna á launaupplýsingum vegna grunnskólakennara í gær var afar villandi.

Félag grunnskólakennara telur annars mjög mikilvægt að samningsaðilar séu ekki að eyða orku og tíma í orðaskak í fjölmiðlum heldur beiti kröftum sínum í að ná ásættanlegri niðurstöðu í þeim kjaraviðræðum sem nú standa yfir undir stjórn sáttasemjara.