Mikil og góð stemning á lokatónleikum Sóldísar
Kvennakórinn Sóldís bauð upp á skínandi góða Júróvisjónupphitun sl. laugardagskvöld í Höfðaborg á Hofsósi með söngprógrammi sínu sem einnig setti endapunktinn á vetrarstarfið. Kórinn hafði haldið fimm tónleika fyrir þetta kvöld bæði innan héraðs og utan.
Heimildir Feykis herma að smá efasemdir hefðu gert vart við sig hjá kórkonum um að fólk myndi fjölmenna á tónleikana þar sem að á sama tíma fór fram fjórði leikur Tindastóls í úrslitaeinvígi Subwaydeildarinnar í körfubolta gegn Njarðvík. En auðvitað eru Skagfirðingar söngelskir og létu sig ekki vanta á þessa afbragðs góðu menningardagskrá Sæluvikunnar.
Á dagskrá voru Júróvisjónlög frá ýmsum tímum, erlend sem innlend, í bland við lög sem tóku þátt í forkeppni hér á Fróni en náðu ekki þeirri vegferð sem þau sannarlega áttu skilið.
Sú nýbreytni var gerð við undirleik kórsins í vetur að auk Rögnvaldar Valbergssonar, sem alla tíð hefur leikið á slaghörpu hjá Sóldísi, fylltu frændurnir Steinn Leó Sveinsson og Sigurður Björnsson hljóminn með bassa og trommuslætti. Var það vel við hæfi með slíkt lagaval. Þá fengu margir ryk í augun þegar Kristín Halla Bergsdóttir og Anna Karítas Ingvarsdóttir bættust í undirleikinn með einkar fallegum leik á fiðlu og þverflautu í laginu Nocturne. Alls voru fjórtán lög á dagskránni og útsetti Rögnvaldur undirleikari flest þeirra og gerði með glæsibrag.
Tónleikarnir tókust mjög vel og óhætt að fullyrða að tónleikagestir skemmtu sér vel sem þökkuðu fyrir sig með standandi lófataki. Það verður spennandi að sjá hvað kórinn býður upp á næsta vetur til að toppa þetta en lítill fugl hefur hvíslað því að þar verði ekki ráðist á litla garðinn.
Hér fyrir neðan má sjá og heyra uppklappslagið sem setti jarðarberið á topp tertunnar þetta laugardagskvöld.
Fleiri fréttir
-
Valið vekur furðu vestan Þverárfjalls
feykir.is Skagafjörður, Austur-Húnavatnssýsla, Vestur-Húnavatnssýsla 26.04.2024 kl. 11.20Heimasíða RÚV flytur fréttir en þar mátti í morgun sjá athyglisverða og skemmtilega úttekt á fótboltavöllum landsins. Þar eru nefndir til sögunnar fótboltavellirnir á Sauðárkróki og á Hofsósi þó svo að þeir ágætu vellir hafi ekki komist í hóp tíu flottustu valla landsins. Blönduósvöllur og Sjávarborgarvöllur á Hvammstanga voru ekki nefndir á nafn í úttektinni og því leitaði Feykir viðbragða hjá Aðdáendasíðu Kormáks og þar stóð ekki á svörum en umsjónarmaður furðar sig á valinu.Meira -
Atli Þór fullkomnar hóp Kormáks/Hvatar
feykir.is Austur-Húnavatnssýsla, Íþróttir, Vestur-Húnavatnssýsla 26.04.2024 kl. 09.44Síðasti dagur félagaskipta í efri deildum Íslandsmótanna í knattspyrnu var nú á miðvikudaginn. Þá bætti lið Kormáks/Hvatar við sig einum leikmanni því Atli Þór Sindrason var síðasta liðsstyrking hópsins fyrir mót.Meira -
Sæluvikan að bresta á
feykir.is Skagafjörður, Listir og menning 26.04.2024 kl. 08.34„Skipulagning Sæluviku gengur vel og viðburðir eru enn að bætast við,“ segir Heba Guðmundsdóttir sem hefur veg og vanda af skipulagningu Sæluvikunnar líkt og undanfarin ár og má því mögulega kalla verkefnastjóra Sæluvikunnar. „Það verða flestir fastir liðir á sínum stað á Sæluviku og mér finnst alltaf vera metnaður og spenna fyrir því að vera með hjá þeim sem skapað hafa þá hefð að standa fyrir viðburði á Sæluviku.“Meira -
Vinnustofa um gerð loftlagsstefnu sveitarfélaga
feykir.is Austur-Húnavatnssýsla, Vestur-Húnavatnssýsla 26.04.2024 kl. 08.32SSNV stóð fyrir vinnustofu í félagsheimilinu á Hvammstanga nú í vikunni um gerð loftlagsstefnu sveitarfélaga í samtarfi við KPMG. Vinnustofan var sérstaklega fyrir Húnavatnssýslur. Góð þátttaka var á vinnustofunni og áhugaverðar umræður sköpuðust.Meira -
Áfram Hvöt er nýtt stuðningsmannalag þeirra hvítu og rauðu
feykir.is Austur-Húnavatnssýsla, Listir og menning 26.04.2024 kl. 07.47„Ungmennafélaginu Hvöt hefur lengi vantað gott stuðningsmannalag en þónokkur ár eru síðan Ekki vera löt, allir í Hvöt kom út. Þegar ég hafði samband við Einar Örn og Baldur síðsumars 2023 stóð ekki á svörum. Úr varð þessi frábæri hittari sem mun án efa fá góðar viðtökur hjá félagsmönnum Hvatar, íbúum Húnabyggðar og bara öllum öðrum. Áfram Hvöt!” segir Grímur Rúnar Lárusson, formaður Ungmennafélagsins Hvatar, í færslu á Facebook-síðu Umf. Hvatar þar sem nýtt stuðningsmannalag, Áfram Hvöt, er kynnt til sögunnar.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.