Lítil notkun endurskinsmerkja
Nýlega stóð VÍS fyrir könnun á endurskinsmerkjanotkun hjá tveimur ólíkum hópum, annars vegar nemendum unglingadeildar í grunnskóla og hins vegar starfsmönnum á vinnustað. Niðurstaða þeirrar könnunar sýndi að aðeins um 20% nota endurskinsmerki eða tveir af hverjum tíu. Frá þessu er greint á vef VÍS.
Í könnuninni kemur fram að unglingarnir standa sig þó örlítið betur en fullorðna fólkið en 76% þeirra voru án endurskins meðan 86% fullorðna fólksins voru endurskinslaus. Munaði þar mest um endurskin á skólatöskum unglinganna.
Aðrar niðurstöður úr könnuninni voru á þessa leið:
- Endurskin var á töskum 8% unglinga en 1% hjá þeim fullorðnu.
- 6% unglinga voru með hangandi endurskin en 5% fullorðinna.
- Yfirhafnir unglinga voru með endurskini frá framleiðanda í 9% tilfella en 6% fullorðinna.
- Endurskin á skóm og endurskin á fleiri en einum stað var frá 0% til 1% hjá báðum hópum.
„Góður sýnileiki er gríðarlega mikilvægur fyrir alla vegfarendur. Með endurskini sér ökumaður gangandi og hlaupandi einstaklinga allt að fimm sinnum fyrr. Sá aukatími sem ökumanni gefst til að koma í veg fyrir slys er gríðarlega mikilvægur. Nú í dimmasta skammdeginu er mikilvægt að allir hugi að sýnileika sínum, jafnt börn sem fullorðnir, en úrval endurskins er mikið og ætti ekki að stoppa neinn. Best er þó að velja ávallt fatnað sem er með endurskini þegar hann er keyptur því þá er ekki hætta á að endurskinið gleymist eða týnist þó vissulega sé hætta á að það dofni með árunum," segir á vef VÍS.
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.