A-Húnavatnssýsla

Framkvæmdir eru í fullum gangi við byggingu gagnavers Borelias Data Center á Blönduósi en stutt er síðan fyrsta skóflustungan var tekin. Unnið er við að moka grunn fyrsta hússins sem reist verður en það mun verða 640 m2 að stærð.

Höfðaskóli hefur undanfarið tekið þátt í verkefni í samvinnu við Textílsetrið á Blönduósi og er markmið þess að auka þekkingu og innsýn nemenda í það hve samofin ullin og prjónaskapur er þjóðararfi og sögu landsins.

Arionbanki á Blönduósi mun stytta opnunartíma sinn frá og með 5. júní næstkomandi og verður útibú hans þá opið frá klukkan 10:00 til 12:00 og 12:30 til 15:00 alla virka daga. Núverandi opnunartími er frá klukkan 9:00-12:00 og 13:00-16:00 virka daga.

Sjóvá Kvennahlaup ÍSÍ verður haldið í 29. skipti næsta laugardag, 2. júní, en það var þann 30. júní árið 1990 sem fyrsta hlaupið var haldið. Búist er við góðri þátttöku að vanda en á síðasta ári voru um 12 þúsund hlauparar með á 91 hlaupastað á landinu. Samkvæmt upplýsingum á heimasíðu hlaupsins verður hlaupið á átta stöðum á Norðurlandi vestra en vert er að geta þess að á Hofsósi og Borðeyri verður hlaupið á sunnudag og í Fljótum viku síðar, þann 10. júní. Hægt er að nálgast upplýsingar um vegalengdir og skráningu á heimasíðu hlaupsins.

Í júní tekur nýr afgreiðslutími gildi í hluta af útibúum Landsbankans, þar með talin á Hvammstanga og á Skagaströnd. Segir í tilkynningu frá bankanum að með þeirri aðgerð sé þjónustan í útibúunum aðlöguð að breyttum aðstæðum í bankaþjónustu en viðskiptavinir kjósa í auknum mæli að nota stafrænar lausnir til að sinna bankaviðskiptum og fara því sjaldnar í útibú en áður.

Matvælastofnun telur líkur á að nú fari að bregða til hins betra hvað veðurfar snertir og hefur sent frá sér svohljóðandi tilkynningu: Nú horfir til betra veðurs og jafnast fátt á við það að njóta góðs grillmatar undir sólinni í sumarbústaðnum eða útilegunni. Höfum hugfast að ef ekki er rétt staðið að grillun þá geta sjúkdómsvaldandi örverur eða heilsuspillandi efni spillt gleðinni. Hugar þú að eftirfarandi þegar þú grillar?

Golfkennarinn þekkti, John Garner sem heimsótti golfklúbbana á Blönduósi og Sauðárkróki í fyrra og kenndi íþróttina, er nú væntanlegur aftur á Blönduós þar sem hann mun bjóða upp á kennslu í golfi fyrir börn frá 10 ára aldri. Fyrsti kennsludagur verður sunnudagurinn 3. júní en í framhaldi af því kemur hann á þriggja vikna fresti. Æfingatímar með leiðbeinanda verða tvisvar í viku. Sumarnámskeið fyrir börn og unglinga kostar 7.500 krónur. Fyrsti tíminn er ókeypis og geta allir sem áhuga hafa komið og prófað. Golfklúbburinn i lánar kylfur.

Sjávarlíftæknisetrið BioPol ehf. á Skagaströnd hefur allt frá árinu 2012 fylgst með eðlis- og líffræðilegum þáttum sjávar fyrir utan Skagaströnd yfir vor- og sumarmánuðina. Tekin hafa verið sýni vikulega í því skyni að mæla hitastig og seltu sjávar á mismunandi dýpi og fylgst hefur verið með tegundasamsetningu og fjölda svifþörunga. Þá hafa einnig verið tekin sérstök sýni tilað fylgjast með stærð og magni kræklingalirfa. Sérstakur starfsmaður var þjálfaður í upphafi til þess að fara í gegnum lirfusýnin og hefur sami aðili því sinnt þeim talningum frá upphafi.

Nú er rykið farið að setjast eftir spennandi sveitarstjórnarkosningar og fólk víða farið að spá í spilin með framhaldið. Sumstaðar náðu framboð hreinum meirihluta eins og í Húnaþingi, Blönduósi og Skagaströnd en í Húnavatnshreppi og í Skagafirði þurfa menn að setjast niður og ræða samstarf. Í Akrahreppi og Skagabyggð var óhlutbundin kosning.

Ég fór í mínar fyrstu göngur á Auðkúluheiði árið 1998, seinni göngur, sem farnar eru eftir réttir til að smala því fé sem eftir hefur orðið eftir fyrri göngur. Við fórum saman við pabbi heitinn en hann hafði ekki farið í mörg ár og langaði til að líta á heiðina aftur.