Að flytja heim... Áskorandapenni :: Sunna Björk Björnsdóttir Sauðárkróki
Við fjölskyldan fluttum norður, heim, úr sollinum fyrir sunnan, veturinn 2017-2018. Reyndar flutti einn fjölskyldumeðlimur í einu yfir töluvert langt tímabil en þrátt fyrir það höfum aðlagast ljómandi vel, að okkur finnst. Að búa í Skagafirði, gefur svo ótrúlega margt.
Nálægðin við náttúruna, sveitina, fólkið okkar og svo mætti lengi telja. Reiðtúrarnir sem byrja og enda í garðinum heima, sundferðirnar, fjöruferðirnar, skíðaferðirnar óteljandi í Tindastól og allt annað sem við höfum bardúsað. Það að geta lagt af stað úr vinnu kl. 16 og sótt börnin sín og vera komin heim stuttu síðar eru mikil forréttindi. Síðustu árin hef ég átt margar seinni parts mínúturnar á Hringbraut á leið heim af Landspítala með hnút í maganum um að koma enn og aftur allt of sein á leikskólann. Enn fleiri mínútum hef ég þó varið inni á bílastæði sömu stofnunar í leit að stæði, eða já bara að komast út af stæðinu. Já, smæðin er bara betri, langoftast betri.
Sem sérnámslæknir í heimilislækningum flutti ég fyrirlestur um héraðslækningar, fyrir sérnámshópinn í Reykjavík. Jú, auðvitað af skyldu, en einnig því þetta fag skiptir mig svo miklu máli, á svo vel við mig. Það að vinna í „héraði“ er töluvert fjölbreyttara starf en á höfuðborgarsvæðinu. Einnig allt öðruvísi starf. Að vinna og búa í minna samfélagi þar sem allir þekkja alla hefur bæði sína kosti og galla. Læknirinn er hluti af samfélaginu og tekur þátt í því sem einstaklingur. Hann hittir einnig í sínu starfi fjölskyldumeðlimi, vini, nágranna, gamla skólafélaga og kennara í almennri móttöku eða á vakt, þar sem hafa orðið slys eða veikindi. Þetta er sérstakt en skemmtilegt og gefandi.
Við læknar lendum oft á milli tannanna á fólki, sem kannski er hluti af starfinu. Það gerist með tímanum að það myndast skrápur. Að vera óbreyttur unglæknir á spítalanum sem sinnir sinni vinnu í einkennisklæðnaði hlaupandi á íþróttaskóm er töluvert öðruvísi en að vera heimilislæknir í eigin persónu í minna samfélagi. Með tilkomu samfélagsmiðla skrifar fólk sínar hugleiðingar og sendir þær svo út í cosmosið með að ýta á bláan hnapp, oft óritskoðað. Það kemur nú fyrir að skrifað sé um okkur lækna, stundum nafngreint en oftast ekki, orð sem ekki eru sönn eða byggð á einhverju sem á sér litla stoð í raunveruleikanum. Oft er það vegna þess að fólk er ósátt með vinnu okkar þó hún hafi verið unnin skv. klínískum leiðbeiningum og rannsóknum. Erfiðast er að geta ekki svarað fyrir sig og leiðinlegt að þurfa sem einstaklingur að mynda sér skráp og tileinka sér jafnaðargeð til að stunda sitt ævistarf. Ég ætla að enda þennan pistil á orðum sem vinkona mín af heilsugæslunni skrifaði í komment undir Facebookfærslu, ætli það hafi ekki bara verið sl. sumar: Aðgát skal höfð í nærveru sálar.
Ég skora á Helgu Elísu Þorkelsdóttur sem næsta pistlahöfund.
Áður birst í 5. tbl. Feykis 2020
Fleiri fréttir
-
Skemmtileg stund og sérlega þjóðleg
feykir.is Austur-Húnavatnssýsla, Ljósmyndavefur, Listir og menning, Mannlíf 20.04.2024 kl. 13.10Laugardaginn 6. apríl sl. var boðað til mikillar og þjóðlegrar menningarveislu í gamla fjósinu í Bólstaðarhlíð í Húnavatnssýslu þar sem fram fór viðburðurinn Hrossakjöt og kvæðaraus. Undirritaður var gestur þeirra hjóna, og ferðaþjónustubænda, Freyju Ólafsdóttur og Einars Kolbeinssonar og í stuttu máli sagt var þetta einstaklega skemmtileg stund og sérlega þjóðleg.Meira -
Er botninum náð, vísnavinir góðir?
feykir.is Skagafjörður, Listir og menning 20.04.2024 kl. 11.27Það styttist í Sæluviku Skagfirðinga og því rétt að minna á Vísnakeppni Safnahússins sem sagt var frá fyrr í mánuðinum hér í Feyki. Vísur og botnar verða að hafa borist Safnahúsi Skagfirðinga Faxatorgi 55, Sauðárkróki í síðasta lagi á miðnætti 23. apríl nk.Meira -
Umhverfisdagur FISK Seafood 2024
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 20.04.2024 kl. 00.12Umhverfisdagur FISK Seafood verður haldinn 4. maí nk. frá klukkan 10-12. Áætlað er að tína rusl á strandlengjunni á Sauðárkróki (sem verður skipt upp í svæði), Nöfunum, í Varmahlíð, á Hólum og á Hofsósi. Frá 12:15 mun FISK Seafood bjóða öllum þátttakendum að þiggja veitingar að Sandeyri 2.Meira -
Ævintýrið úti hjá liði Tindastóls
feykir.is Skagafjörður, Íþróttir 19.04.2024 kl. 23.34Strax í haust voru bara þrjú hjól undir bíl meistara Tindastóls og eftir það var nánast sama hvaða hindrun varð á vegi hans, það varð allt til að hægja ferðina. Hann hökti reyndar inn í bikarúrslit og í úrslitakeppnina þó með naumindum væri. Stólakagginn sem allir biðu eftir að hrykki í gírinn, kæmi sterkur inn á endasprettinum, var eiginlega hálf vélarvana allt tímabilið. Leikurinn í Smáranum í kvöld var reyndar góður en enn og aftur voru Stólarnir sjálfum sér verstir. Lokakarfan var Grindvíkinga og hún skipti sköpum – lokastölur 91-89. Stólarnir því snemma í sumarfrí þennan veturinn og kannski allir fegnir – þessi bíll þarf í allsherjar yfirhalningu.Meira -
Gul viðvörun á Norðurlandi vestra
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 22.24Veðurstofan hefur smellt á okkur gulri veðurviðvörun mest allan laugardaginn og fram á aðfaranótt sunnudags. Gert er ráð fyrir ört hækkandi hita og því má búast má við miklum leysingum, auknu afrennsli og vatnavöxtum í ám og lækjum. Mikilvægt er að hreinsa frá niðurföllum til að forðast vatnstjón vegna rigningar og leysingavatns. Gula viðvörunin gildir fyrir Vestfirði og allt Norðurland.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.