Heyr himna smiður – 50 ár frá lagasmíði
Víða leynast handskrifuð bréf hugsaði ég þegar ég horfið á fréttirnar um daginn, en þar var sagt frá óþekktu bréfi Davíðs Stefánssonar sem nú var að koma fram fyrir augu almennings. Þá mundi ég eftir að ég átti bréf frá Þorkeli Sigurbjörnssyni, er hann svarað erindi mínu um hvernig lag hans, Heyr himna smiður varð til.
Forsagan er að ég var í Menningar- og framfarafélagi kvenna í Skagafirði og eitt verkefnið sem okkur var úthlutað var að kynna laga- og eða textahöfund og það var aðeins þetta eina lag sem ég vildi taka fyrir í mínu verkefni.
Ég hafði fengið að gjöf geisladiskinn Sálmar lífsins með þeim Sigurði Flosasyni og Gunnari Gunnarsyni, þar sem útsetning þeirra á lagi Þorkels með kirkjuorgeli og saxafóni tekst snilldarlega.
Þorkell Sigurbjörnsson, mynd af netinu
Ég sendi Þorkeli bréf (bjóst ekki við að fá svar) og bað hann að segja mér frá því hvernig lagið varð til. Kolbeinn Tumason orti sálminn árið 1208, en það er eins og þeir félagar hafi setið hlið við hlið og ráðfært sig hvor við annan um þetta mikla tónverk.
En ég fékk svar um hæl og það handskrifað, því að prentarinn hans Þorkels var bleklaus og svarbréf hans var svona:
8. maí 2001
Ágæta Sigrún Alda
Þú gafst ekki upp neitt nákvæmt heimilisfang – en ég treysti því að þú eigir ekki margar alnöfnur í bænum svo að þessar línur komist til skila. (Prentarinn var bleklaus í dag og ég vona að þú getir lesið hrafnasparkið.)
Þegar ég var unglingur í Gagnfræðaskóla Austurbæjar að læra undir landspróf, þá var íslenskukennarinn Guðrún Helgadóttir (síðar skólastýra Kvennaskólans) dásamlegur og strangur kennari. (Þá voru þéringar við lýði).
Hún lét okkur læra og leggja á minnið óteljandi ljóð og tilvitnanir úr íslenskri tónmenntasögu og þ.á.m. þennan fyrsta sálm, sem við vitum að Íslendingur reyndi að yrkja á móðurmálinu. Svo líða árin og „unglingagraftarbólur hverfa“.
Vorið 1972 var ég í nefnd með gamla kennaranum mínum úr Tónlistarsk. í Rvík. Honum var tíðrætt um þennan sálm Kolbeins Tumasonar. Það var orðið seinfært heim eftir þennan fund – upp Öskjuhlíðina – bílar að renna og spóla o.s.frv. Þá varð lagið til í mínum huga, (seinasta hendingin fyrst). Þegar ég komst svo heim í Kópavog, var ekkert annað eftir en að hripa þessar nótur á blað.
Nokkrum dögum seinna sýndi ég dr. Róbert þessar nótur. Hann varð svo glaður, að hann hreinritaði með sinni listaskrift lagið og sendi til organista og söngstjóra. Blessuð sé minning hans.
Textinn er aðalatriðið. Með fullri virðingu fyrir þeim Sigurði og Gunnari, sem báðir voru fyrrverandi nemendur mínir til Tónlistask. í Rvík. – þá finnst mér að þú ættir að spila fyrir Framfarafélagið frumgerð lagsins t.d. með Hamrahlíðar, Langholts, eða Mótettukórunum.
Bestur óskir og kveðjur, Þorkell Sigurbjörnsson
Hér fyrir neðan má svo heyra Mótettukór Hallgrímskirkju flytja lag Þorkels við sálm Kolbeins Tumasonar Heyr himnasmiður.
Fleiri fréttir
-
Umhverfisdagur FISK Seafood 2024
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 20.04.2024 kl. 00.12Umhverfisdagur FISK Seafood verður haldinn 4. maí nk. frá klukkan 10-12. Áætlað er að tína rusl á strandlengjunni á Sauðárkróki (sem verður skipt upp í svæði), Nöfunum, í Varmahlíð, á Hólum og á Hofsósi. Frá 12:15 mun FISK Seafood bjóða öllum þátttakendum að þiggja veitingar að Sandeyri 2.Meira -
Ævintýrið úti hjá liði Tindastóls
feykir.is Skagafjörður, Íþróttir 19.04.2024 kl. 23.34Strax í haust voru bara þrjú hjól undir bíl meistara Tindastóls og eftir það var nánast sama hvaða hindrun varð á vegi hans, það varð allt til að hægja ferðina. Hann hökti reyndar inn í bikarúrslit og í úrslitakeppnina þó með naumindum væri. Stólakagginn sem allir biðu eftir að hrykki í gírinn, kæmi sterkur inn á endasprettinum, var eiginlega hálf vélarvana allt tímabilið. Leikurinn í Smáranum í kvöld var reyndar góður en enn og aftur voru Stólarnir sjálfum sér verstir. Lokakarfan var Grindvíkinga og hún skipti sköpum – lokastölur 91-89. Stólarnir því snemma í sumarfrí þennan veturinn og kannski allir fegnir – þessi bíll þarf í allsherjar yfirhalningu.Meira -
Gul viðvörun á Norðurlandi vestra
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 22.24Veðurstofan hefur smellt á okkur gulri veðurviðvörun mest allan laugardaginn og fram á aðfaranótt sunnudags. Gert er ráð fyrir ört hækkandi hita og því má búast má við miklum leysingum, auknu afrennsli og vatnavöxtum í ám og lækjum. Mikilvægt er að hreinsa frá niðurföllum til að forðast vatnstjón vegna rigningar og leysingavatns. Gula viðvörunin gildir fyrir Vestfirði og allt Norðurland.Meira -
Venju samkvæmt er Stólastúlkum spáð falli
feykir.is Skagafjörður, Íþróttir 19.04.2024 kl. 15.44Það eru nokkrir fjölmiðlar sem spá fyrir tímabilið í Bestu deild kvenna í knattspyrnu og jafnan er liði Tindastóls spáð falli, ýmist 9. eða 10. sæti. Í árlegri spá fyrirliða, þjálfara og forráðamanna er liðinu spáð níunda sæti en liði Keflavíkur því neðsta. Íslandsmeisturum Vals er aftur á móti spáð titlinum og Blikum öðru sæti. Grönnum okkar í Þór/KA er síðan spáð þriðja sætinu.Meira -
Við erum ótrúlega rík af fólki | LS Lulla í spjalli
feykir.is Skagafjörður, Listir og menning, Mannlíf 19.04.2024 kl. 14.40„Litla hryllingsbúðin er skemmtilega fjölbreytt verk með miklum söng og er skemmtileg dramatísk hrollvekja,“ segir Sigurlaug Dóra Ingimundardóttir (Lulla), formaður Leikfélags Sauðárkróks, þegar Feykir spyr hana hvað hún geti sagt um Sæluvikustykki LS þetta árið. Æfingar standa nú yfir en frumsýnt verður í Bifröst á Sauðárkróki sunnudaginn í Sæluviku en samkvæmt áreiðanlegum heimildum Feykis er hér um að ræða 146. sýningu Leikfélags Sauðárkróks frá því það var endurvakið árið 1941.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.