Ljótasti sigur í heimi en sigur þó lykilatriðið

Darrel Lewis skilar boltanum í körfu Hattar í fyrsta leikhluta. Hann var stigahæstur með 20 stig og átti 7 stoðsendingar.

Hann var ekki fallegur leikur Tindastóls og Hattar í Síkinu í kvöld í Dominos-deildinni í körfubolta og sérstaklega voru heimamenn flatir. Það var nánast eins og menn nenntu þessu ekki og ef eitthvað bit hefði verið í Hattarmönnum þá hefðu þeir stolið þessu undir lokin. Það góða við leikinn er að hann er búinn og skilaði tveimur stigum á töfluna til Tindastóls.

Það bar til tíðinda í byrjun leiks að Kaninn hjá Stólunum, Jerome Hill, skoraði körfu með stökkskoti en fljótlega náðu gestirnir yfirhöndinni. Helgi Björn fékk opin færi sem hann setti niður og Mirko Virijevic var ólseigur. Gestirnir komust í 8-15 og Hreinsi Birgis setti niður þrist og breytti stöðunni í 10-18. Hittni Stólanna minnti á byrjun leiksins gegn Haukum á dögunum en Lewis og Helgi sáu þó um að minnka muninn í 17-18 fyrir lok fyrsta leikhluta. Bestu kaflar Tindastóls komu í öðrum leikhluta og eftir þriggja mínútna leik var staðan orðin 29-22. Þegar ein og hálf mínúta var eftir setti Pálmi Geir niður þrist og kom Stólunum í 42-28 og í hálfleik var staðan álitleg, 42-30.

Addú, sem spilaði í kvöld eftir að hafa fengið heilahristing á dögunum, kom Stólunum fjórtán stigum yfir, 47-33 snemma í þriðja leikhluta. Þá fór Tobin Carberry loksins að láta til sín taka í sókn Hattar en Stólarnir gerðu honum mjög erfitt fyrir í fyrri hálfleik en kappinn gerði þá aðeins tvö stig. Hann er eldsnöggur, með magnaðan stökkkraft, skjótur að skjóta og nú þurftu þreytulegir Tindastólsmenn að fara að eltast við hann. Þegar rúm hálf mínúta var eftir af leikhlutanum minnkaði hann muninn í fjögur stig, 60-56, en annar gullfallegur þristur Helga Margeirs á stuttum tíma gaf Stólunum smá andrými. Staðan 63-56.

Flake, sem spilaði ágætlega og dritaði niður nokkrum skotum í leiknum, kom Tindastóli í 65-56 en Carberry dró vagninn fyrir gestina og minnkaði muninn í 69-65 þegar fimm mínútur voru eftir. Tindastólsmenn voru að spila illa í fjórða leikhluta, misstu boltann kæruleysislega í sókninni, náðu hvorki takti í sókn né vörn og leikmenn voru í raun að gera sig seka um að klúðra þægilegum færum allan leikinn. Síðustu fimm mínúturnar voru því óþarflega spennandi – og ömurlegar – fyrir stuðningsmenn Stólanna sem horfðu upp á sína menn erfiða á öllum vígstöðvum. Sem betur fer var 3ja stiga nýting gestanna afar döpur þannig að þegar þeir áttu kost á því að jafna leikinn úr opnum færum fyrir utan þá klikkaði miðið. Loftboltar virtust reyndar tískuskotið hjá báðum liðum. Já, þetta var ekki gott. Síðustu mínútuna dvöldu Tindastólsmenn talsvert á vítalínunni og voru sex síðustu stig liðsins skoruð þaðan. Carberry minnkaði í þrjú stig, 78-75, þegar 20 sekúndur voru eftir en Pétur tryggði sigur Tindastóls með tveimur vítum. Lokatölur 80-75.

Sem fyrr segir voru stigin tvö eiginlega það eina sem Stólarnir gátu glaðst yfir í kvöld. Jerome Hill var, líkt og í fyrri leikjum sínum, hörmulegur og það væri synd að segja að hann styrki liðið. Helgi Viggós og Darrel Flake stóðu fyrir sínu en aðrir náðu sér ekki á strik. Lewis var þó að venju stigahæstur. Lið Hattar hafði tapað öllum leikjum sínum í deildinni til þessa og það læddist að manni sá grunur að Stólarnir hafi vanmetið þá. Sem betur fer voru það aðeins Carberry, sem gerði 26 stig í síðari hálfleik, og Virijevic sem fundu fjölina sína fyrir utan að Helgi Björn hitti ágætlega í upphafi leiks.

Eftir þrjá tapleiki í röð í deildinni, sem kannski hafa dregið nokkuð úr mönnum, kom þó loks sigur í hús hjá Stólunum en það virðist sem Jou Costa, nýr þjálfari liðsins sem ekki hefur enn tekið við liðinu, hafi talsvert starf fyrir höndum að koma liðinu aftur á sigurbraut.

Stig Tindastóls: Lewis 20, Helgi Viggós 15, Flake 13, Helgi Margeirs 6, Svavar 6, Hill 6, Arnþór 6, Pálmi 3, Pétur 3 og Viðar 2.

Tölfræði af síðu KKÍ >