Ný efnistökusvæði í Staðaröxl og Gilsbungu

Hér sést línan sem segir til um hve mikið Staðaröxlin gæti lækkað að framkvæmdum loknum. Mynd: PF

Skipulags- og byggingarnefnd ákvað á fundi sínum þann 8. mars sl. vegna Aðalskipulags Skagafjarðar að skoðaðir yrðu 12 námukostir sem kæmu til greina að bæta við í aðalskipulag Sveitarfélagsins Skagafjarðar. Er það gert til að bregðast við efnisþörf sem kemur til m.a. vegna styrkingar raforkukerfisins í sveitarfélaginu sem og að huga þarf að nýjum námukostum þar sem verulega hefur saxast á efni á Gránumóum. Nú er það ljóst að vænlegasta tillagan og einnig sú hagkvæmasta er að efnistakan verði í Staðaröxl og síðar í Gilsbungu.

Ljóst er að framkvæmdin mun hafa mikil náttúruleg áhrif þegar yfir lýkur bæði hvað varðar óafturkræfar aðgerðir sem og breytingu á náttúru og veðurfari næsta umhverfis. Áætlað er að efnistakan hefjist næsta haust og muni duga næstu 40 árin. Fyrsti áfangi verður veglagning upp frá bænum Gili, upp með Gilsgili að norðan og inn Gilsdrag og vestur fyrir Staðaröxl. Þar munu fyrstu malarnámur verða staðsettar og munu ekki sjást frá byggð fyrr en eftir 18 ár í fyrsta lagi. Næstu tvö árin þar eftir mun toppur fjallsins verða tekinn niður í 450 m h.y.s. og síðar Gilsbunga. Þegar yfir lýkur munu fjöllin verða í slútti við önnur fjöll allt frá Grísafelli, fremst í Sæmundarhlíð og út að Hlíðarenda norðan Molduxa.

Þessar aðgerðir munu hafa mjög mikil og jákvæð áhrif á landbúnað undir þessum fjöllum því sólar mun gæta mun lengur á daginn en hún hverfur yfirleitt bak við þau um nónleytið (klukkan 3) á daginn. Það mun hafa gríðarleg áhrif á fóðurframleiðslu hjá þeim kúabúum sem þar eru starfrækt. Þá munu vindkviður sem gjarna ná sér á strik niður brattar hlíðarnar heyra sögunni til en þær hafa valdið búsifjum í verstu veðrum.

Indriði Þór Einarsson, sviðsstjóri veitu- og framkvæmdasviðs, segir fleira jákvætt mætti tína til. Eins og staðan er núna eru efstu hlutar fjallanna gróðurlausir melar eða urð og grjót en síðar verður hægt að rækta upp svæðið sem hefur mikla þýðingu fyrir beitarafréttinn í Vesturfjöllum. Hann segir hugmyndina að þessu ekki nýja af nálinni því Ingvar Gýgjar Jónsson fyrrum byggingafulltrúi og bóndi á Gýgjarhóli sem einmitt stendur undir Staðaröxl, mun hafa lagt svipað til fyrir mörgum árum. Þá var þessi aðgerð ekki talin framkvæmanleg en nú eru aðrir tímar og ekki síst betri tíð með batnandi veðri allan ársins hring.

 Aðspurður sagðist Ingvar, eðli máli samkvæmt, vera meðmæltur þessu. „Ég hefi viljað að þessi framkvæmd hefði farið af stað á sínum tíma. Það munar geysilega miklu með grassprettu og ekki síst kornrækt, sem er útilokuð eins og er í dag, á þessu svæði með því að greiða leið sólargeislanna að ræktarlöndunum. Ef verkefnið hefði farið af stað upp úr 1980 væri hér miklu lífvænlegra í sveitinni,“ segir Ingvar.

HÉR er hægt að sjá nánar um verkið.

ATH ÞESSI "FRÉTT" ER APRÍLGABB!