Sæluvikan blásin af
Ekkert verður af Sæluviku sem ráðgert hafði verið að halda í lok september þar sem atvinnu-, menningar- og kynningarnefnd ákvað á fundi sínum í gær að aflýsa henni. Segir á heimasíðu Sveitarfélagsins Skagafjarðar að þyngst vegur í þeirri ákvörðun hertar sóttvarnaraðgerðir almannavarna og ekki fyrirséð hvenær þeim verður aflétt.
Í síðustu viku tók stjórn Leikfélag Sauðárkróks ákvörðun um að fresta sýningu á nýju leikriti Péturs Guðjónssonar, sem æfingar voru hafnar á sl. vetur. Ráðgert hafði verið að frumsýna í Sæluviku, sem var svo frestað fram á haustið. Til stóð að taka þráðinn upp á ný fyrir haustið en nú er útséð með það og ekki sýnt fyrr en í næstu Sæluviku.
Þrátt fyrir að Sæluviku 2020 hafi verið aflýst var ákveðið að veita Samfélagsverðlaun Skagafjarðar 2020 en þau hafa síðustu ár verið veitt á setningu Sæluviku. Verður auglýst eftir tilnefningum fljótlega segir á skagafjordur.is
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.