Fréttir

Þeir sem ferðast mikið á milli landshluta hér á Norðurlandi yfir vetrartímann er bent á að Vegagerðin býður öllum sem óska eftir því að fá tilkynningar í gegnum SMS um hættustig vegna snjóflóða á Siglufjarðarvegi og Ólafsfjarðarmúla að hafa samband í síma 1777 eða með tölvupósti á netfangið umferd@vegagerdin.is. Það er því um að gera að nýta sér þessa þjónustu því það er aldrei að vita nema þetta eigi eftir að koma sér vel þegar og ef hætta stafar á á þessu svæði.  

Í byrjun desember tilkynnti Íslandsbanki hvaða frumkvöðlum var úthlutað úr Frumkvöðlasjóði Íslandsbanka þetta árið og voru alls 14 verkefni valin. Þau fengu á bilinu eina til fimm milljónir og var heildarupphæð styrkjanna sem afhentir voru 50 milljónir króna. 

Í tilefni þess að fuglaskoðunarhúsið á Spákonufellshöfða er fullbúið efnir Sveitarfélagið Skagaströnd til nafnasamkeppni meðal áhugasamra. Hægt verður að skila inn tillögum til 3. janúar nk. og mun sveitarstjórn taka ákvörðun um nafngiftina sem verður birt við formlega opnun hússins næsta vor og er æskilegt er að nafnið hafi tengingu við hönnun, staðsetningu eða tilgang hússins. 

Eins og undanfarin ár stendur Feykir fyrir kjöri á manni ársins á Norðurlandi vestra. Gefst íbúum á svæðinu og öðrum lesendum Feykis kostur á að velja úr hópi þeirra sem tilnefndir voru af lesendum. Átta tilnefningar bárust sem teknar voru til greina í kjörið.

Að þessu sinni er það Skagstrendingurinn Sóley Sif Jónsdóttir sem svarar Tón-lystinni en hún er fædd árið 2007, dóttir Jóns Ólafs Sigurjónssonar, slökkviliðsstjóra á Skaga-strönd, og Hugrúnar Sifjar Hallgrímsdóttur, organista og tónlistarskólastjóra, en þau hjónin eru fólkið á bakvið Útfararþjónustuna Hugsjón á Skagaströnd. Sóley Sif spilar mest á píanó en hún syngur einnig og svo spilar hún á trommur.

Húnahópurinn hélt sína árlegu jólagleði í Sundlaug Sauðárkróks í gærmorgun og allir kátir og hressir í pottinum að henni lokinni. Hópurinn vildi fá að óska öllum gleðilegra jóla og farsæls komandi árs. Það er mikil tilhlökkun í hópnum sem getur ekki beðið eftir að framkvæmdum við laugina ljúki svo hægt sé að fara í rennibrautina að loknum góðum sundsprett. Þá hvetur hópurinn alla til að fara í sund á nýja árinu því sund er mikil heilsubót, en það vita auðvitað allir.

Vísir.is birti í morgun topp tíu listann yfir besta íþróttafólk ársins á Íslandi að mati Samtaka íþróttafréttamanna ásamt þeim þrem einsaklingum sem tilnefndir eru sem þjálfari ársins 2023 og þau þrjú lið sem tilnefnd eru sem lið ársins 2023.

Allt er breytingum háð, helgihald í Skagafirði um þessi jól og áramót er með eilítið breyttu sniði þetta árið. Messum hefur fækkað talsvert enda gefur auga leið að ekki er hægt að halda óbreyttum hætti með færra fólk í brúnni. Jólin eru hátíð ljóss og friðar og kirkjan á sérstakan stað í hjörtum margra sérstaklega á jólunum. Jólasálmarnir eru hver öðrum fallegri og hátíðarsvörin sungin sem gefur stundinni einstakt og hátíðlegt yfirbragð. Kyrrðin í kirkjunni á jólunum er eitthvað alveg sérstök.

Í tilkynningu frá Skagafjarðarveitum segir að vegna kulda og mikillar notkunar á heitu vatni þessa dagana hefur verið lokað fyrir rennsli í Sundlaugina á Hofsósi. Áfram verður heitt vatn í pottunum og þeir opnir, en laugin sjálf verður köld.

Fullt var út úr dyrum á tónleikum Jólahúna á Blönduósi síðasta sunnudag. Tónleikarnir eru hugarfóstur Skúla heitins Einarssonar frá Tannstaðabakka en hann lést eftir baráttu við krabbamein 2021. Kærleikur og samstaða eru einkunnarorð þessara tónleika og hægt er að fullyrða að það er það sem þeir standa fyrir.