Fréttir

Bjarni Jónsson (VG) og Bergþór Ólason (Miðflokki), sem báðir eru þingmenn Norðvesturkjördæmis, hafa í fimmta sinn lagt fram á Alþingi tillögu til þingsályktunar um Alexandersflugvöll á Sauðárkróki sem varaflugvöll fyrir Keflavíkur-, Reykjavíkur-, Akureyrar- og Egilsstaðaflugvelli.

Skrifstofur sýslumannsins á Norðurlandi vestra verða lokaðar föstudaginn 22. september nk. vegna sameiginlegs starfsdags sýslumannsembættanna. Beðist er velvirðingar á þeim óþægindum sem þetta kann að valda.

Á hverjum degi fáum við nú hræðilegar nýjar fréttir af umfangi þess umhverfisskaða sem strok þúsunda frjórra eldislaxa úr sjókvíum Arctic Seafarm í Patreksfirði er að valda. Upp er kominn gjörbreytt staða fyrir verndun villtra íslenskra laxastofna, sem krefst tafarlausra aðgerða.

Í tilkynningu á Facebooksíðu Körfuknattleiksdeildar Tindastóls segir að samið hafi verið við Stephen Domingo 28 ára. Hann er framherji af amerískum og nígerískum ættum. Stephen Domingo var fyrirliði nígerska landsliðsins og var í U17 USA landsliðinu sem varð heimsmeistari 2012.

Höfðingleg gjöf Lionsklúbbs Sauðárkróks, til HSN á Sauðárkróki var afhent í dag. Það voru þeir, Valgeir Kárason, Jón Eðvald Friðriksson og Halldór Hjálmarsson sem afhentu tækið fyrir hönd Lionsmanna. Nýburagulumælir/blossamælir er gjöfin sem umræðir. „Á síðustu árum höfum við þurft að senda töluvert af nýbökuðum foreldrum og nýburum á fyrstu dögum eftir fæðingu til Akureyrar til að meta nýburagulu, þar sem hér hefur ekki verið til tæki til að mæla eða meta slíkt,“ segir Anna María Oddsdóttir ljósmóðir HSN á Sauðárkóki.

Hljómsveitin Slagarasveitin frá Hvammstanga heldur tónleika í tilefni af útgáfu nýrrar plötu. Um er að ræða tólf laga plötu sem ber nafn sveitarinnar. Tónleikarnir verða tvennir. Í Iðnó Reykjavík föstudaginn 22. september og Félagsheimilinu Hvammstanga daginn eftir. Tónleikarnir hefjast báðir klukkan 20:30 og er það Ásdís Aþena ungstirni frá Hvammstanga sem opnar tónleikana. Miðasala fer fram á adgangsmidi.is og við hurð, meðan húsrúm leyfir.

Það var talsvert sjónarspil nú á föstudaginn þegar stóð var rekið til Laxárdalsréttar í gegnum Blönduós. Rétt eins og hinir fararskjótarnir þá urðu hrossin að fara yfir Blönduósbrú. Það var Haukur Suska Garðarsson, hestaferðafrömuður frá Hvammi II í Vatnsdalnum, sem fór fyrir hópnum

Hraðstefnumót Öskju hófst fyrir viku þar sem valdir bílar frá Mercedes-Benz, Kia, Honda og smart freista þess að finna verðuga lífsförunauta á landsbyggðinni. Fyrsta Hraðstefnumótið var haldið í Vestmannaeyjum en bílarnir hafa í kjölfarið haldið austur fyrir land og eru nú á norðurleið. Á fimmtudag verður Hraðstefnumót á Sauðárkrók, Ísafjörð og Stykkishólm. Öskjumenn verða á Sauðárkróki frá kl. 12-16 og verða bílarnir til sýnis á bílaplani KS við Ártorg.

Það styttist í að körfuboltavertíðin hrökkvi í gang á ný fyrir alvöru og pottþétt margur stuðningsmaðurinn sem bíður óþreyjufullur eftir því að gamanið hefjist á ný. Nú býður körfuknattleiksdeild Tindastóls öllum áhugasömum að mæta í Síkið á fimmtudaginn og halda upp á Tindastólsdaginn með stuðningsfólki, leikmönnum, þjálfurum, iðkendum og stjórnarfólki. Næstkomandi laugardagskvöld verður síðan stuðningsmannakvöld á Kaffi Krók.

Um síðustu mánaðamót lét Gísli Svan Einarsson af störfum hjá FISK Seafood eftir 35 farsæl ár í starfi. Á heimasíðu FISK Seafood segir að upphafið megi rekja til vorsins 1989 þegar Kaupfélagið fékk Gísla, sem þá var kennari við Samvinnuháskólann á Bifröst, til þess að koma norður og halda fyrirlestur um samskipti, þjónustulund og fleiri málefni. Mikil ánægja var meðal þeirra sem sóttu námskeiðið hjá Gísla og úr varð að Gísli var ráðinn í fullt starf hjá Kaupfélaginu í kaffipásu námskeiðsins.