Fréttir

Fyrstu viku september hafa staðið yfir Evrópskir menningarminjadagar þar sem markmiðið er að miðla fjölbreyttum menningararfi þjóða til sem flestra einstaklinga og hópa með það fyrir augum að efla vitund og vitneskju um hvað einkennir bæði áþreifanlega og óáþreifanlega menningu landa.

Út er komin bókin Með grjót í vösunum eftir Svein Torfa Þórólfsson (1945–2016). Sveinn Torfi ólst upp á Skagaströnd til tíu ára aldurs en fluttist þá til Grindavíkur með fjölskyldu sinni. Í umsögn útgefanda segir að lífsbaráttan hafi verið hörð og oft mikið lagt á hans ungu herðar.

Ný fræðslumiðstöð fiskeldis Lax-Inn opnaði formlega fyrir almenningi síðastliðinn föstudag en hún er staðsett að Mýrargötu 26 á Grandagarði í Reykjavík. Þar verður hægt að kynna sér starfsemi fiskeldis með beintengingu myndavéla bæði í land- og sjóeldi á landsbyggðinni ásamt ýmsu öðru fræðsluefni um þá atvinnugrein.

Fimm mánuðir eru liðnir síðan Eva Rún Dagsdóttir, lykilleikmaður Tindastóls í körfubolta, lá mikið kvalin á gjörgæsludeild eftir að hafa fengið blóðtappa. Batinn hefur, sem betur fer, verið góður en sl. mánudag spilaði hún sinn fyrsta körfuboltaleik eftir veikindin. Hún segist ekki hafa mátt spila körfubolta fyrr en eftir mánuð hið minnsta í viðbót en fékk nýlega leyfi frá lækni sínum að spila aftur sem voru miklar gleðifréttir.

Síðasta umferðin í Pepsi Max deild kvenna fer fram nú um helgina. Það er á brattann að sækja fyrir lið Tindastóls og sennilega bara allra bjartsýnustu menn og konur sem reikna fastlega með að liðið haldi sæti sínu í deildinni. En miði er möguleiki og Stólastúlkur þurfa fyrst og síðast að einbeita sér að því að sigra lið Stjörnunnar þegar liðin mætast á sunnudaginn. Feykir tók stöðuna með Guðna Þór Einarssyni í þjálfaragengi Stólanna og hann segir að leikurinn verði lagður upp svipað og gegn Selfossi um síðustu helgi.

Rétt um kl. 23:00 sl. miðvikudagskvöld fengu Brunavarnir Skagafjarðar útkall vegna bifreiðar sem ekið hafði verið útaf Sauðárkróksbraut á milli Sauðárkróks og Varmahlíðar. Eftir því sem fram kemur á Facebooksíðu Brunavarna voru þrír einstaklingar í bifreiðinni og þurfti að beita björgunarklippum til þess að ná einum þeirra út.

Riðuveiki hefur verið staðfest á bænum Syðra-Skörðugili í Skagafirði. Um 1500 fjár eru á bænum, fullorðið fé og lömb. Þetta kemur fram á heimasíðu Matvælastofnunar.

Aðgerðastjórn almannavarna á Norðurlandi vestra segir á Facebooksíðu lögreglunnar á svæðinu og tilkynning hafi borist frá Veðurstofu Íslands um aukna rafleiðni í Vestari-Jökulsá í Skagafirði en upptakakvíslar hennar koma undan Hofsjökli norðanverðum. Vestari-Jökulsá rennur saman við Austari-Jökulsá um átta kílómetra sunnan við mynni Norðurárdals (á móts við Silfrastaði) og mynda þær saman Héraðsvötn. Þjóðvegur 1 milli Varmahlíðar og Akureyrar liggur með Héraðsvötnum á kafla.

Miðflokkurinn býður til fundar með frambjóðendum á Kaffi Krók á Sauðárkróki á morgun laugardaginn 11. september kl. 16:00. Á fundinum verða Sigmundur Davíð Gunnlaugsson, formaður flokksins og oddviti Norðausturkjördæmis, Bergþór Ólason, oddviti Norðvesturkjördæmis, Sigurður Páll Jónsson, sem skipar 2. sæti listans í Norðvesturkjördæmi ásamt Högna Elfari Gylfasyni sem skipar 5. sæti listans í Norðvesturkjördæmi.

„Tilfinningin var ólýsanleg. Langþráður draumur að rætast hjá leikmönnum, þjálfarateymi, meistaraflokksráði og stuðningsmönnum okkar. Við lögðum allt okkar í verkefnið og uppskárum eftir því. Ég er því virkilega stoltur af strákunum,“ segir Ingvi Rafn Ingvarsson, þjálfari og leikmaður Kormáks Hvatar, þegar Feykir spurði hann hvernig tilfinningin hafi verið þegar dómarinn flautaði til leiksloka á Blönduósi á þriðjudag og ljóst var að liðið hafði tryggt sér sæti í 3. deild að ári. Kormákur Hvöt spilar á morgun við lið KH á Origo-vellinum í Reykjavík en þar ræðst hvort liðið verður Íslandsmeistari í 4. deild.