Skíðavertíðinni lokið í Tindastól – Engin skíðahátíð um páskana
Nú er útséð með það að ekkert verður úr páskagleðinni sem vera átti á skíðasvæði Tindastóls og formlegri vígslu nýju lyftunnar frestað enn einu sinni. Viggó Jónsson, staðarhaldari, segir allan snjó horfinn og ekkert hægt við því að gera. „Gríðarleg vonbrigði og mikið fjárhagslegt tjón,“ segir hann.
„Við áttum von á miklum fjölda um páskana en verðum bara að gráta í koddann. Verðum að játa okkur sigraða þó það sé erfitt,“ segir Viggó og Sigurður Bjarni Rafnsson, formaður skíðadeildar Tindastóls tekur undir: „Þetta er alveg í takt við veturinn, þetta byrjaði í raun aldrei.“ Þeir segja að vonin hafi glæðst í upphafi vetrar þegar mikill snjór kom í fjallið en þegar átti að fara að opna í byrjun desember hafi þessi frábæra hláka komið tekið nánast allt upp.
Þá fór mikill tími í uppsetningu nýju lyftunnar og kannski ekki safnað saman nægum snjó né hann framleiddur. „Ég hélt að þetta væri alltaf að koma en maður brennir sig ekki á sama soðinu tvisvar. Það er ekkert annað að gera en að safna þessu í reynslubankann,“ segir Viggó sem segist geta verið vitur eftir á. „Það hefði verið hægt að framleiða djöfulinn ráðalausan í haust og þá ef, hefði og kannski, værum við í betri málum.
Sigurður tekur ekki undir með Viggó og telur það hefði ekki haft neitt að segja miðað við hvernig veturinn hefur leikið skíðadeildina. „Veturinn var þannig,“ segir Sigurður Bjarni.
Það leynir sér ekki að þeir félagar eru gríðarlega vonsviknir með stöðu mála ekki síst þar sem nýja lyftan hefur fengið fádæma góða umsögn og vitað er um marga sem ætluðu að heimsækja Skagafjörðinn um páskana og fara á skíði. „Margir verða svekktir þegar þetta verður tilkynnt,“ segir Sigurður svo það er best að bíða ekki með það.
Fleiri fréttir
-
Umhverfisdagur FISK Seafood 2024
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 20.04.2024 kl. 00.12Umhverfisdagur FISK Seafood verður haldinn 4. maí nk. frá klukkan 10-12. Áætlað er að tína rusl á strandlengjunni á Sauðárkróki (sem verður skipt upp í svæði), Nöfunum, í Varmahlíð, á Hólum og á Hofsósi. Frá 12:15 mun FISK Seafood bjóða öllum þátttakendum að þiggja veitingar að Sandeyri 2.Meira -
Ævintýrið úti hjá liði Tindastóls
feykir.is Skagafjörður, Íþróttir 19.04.2024 kl. 23.34Strax í haust voru bara þrjú hjól undir bíl meistara Tindastóls og eftir það var nánast sama hvaða hindrun varð á vegi hans, það varð allt til að hægja ferðina. Hann hökti reyndar inn í bikarúrslit og í úrslitakeppnina þó með naumindum væri. Stólakagginn sem allir biðu eftir að hrykki í gírinn, kæmi sterkur inn á endasprettinum, var eiginlega hálf vélarvana allt tímabilið. Leikurinn í Smáranum í kvöld var reyndar góður en enn og aftur voru Stólarnir sjálfum sér verstir. Lokakarfan var Grindvíkinga og hún skipti sköpum – lokastölur 91-89. Stólarnir því snemma í sumarfrí þennan veturinn og kannski allir fegnir – þessi bíll þarf í allsherjar yfirhalningu.Meira -
Gul viðvörun á Norðurlandi vestra
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 22.24Veðurstofan hefur smellt á okkur gulri veðurviðvörun mest allan laugardaginn og fram á aðfaranótt sunnudags. Gert er ráð fyrir ört hækkandi hita og því má búast má við miklum leysingum, auknu afrennsli og vatnavöxtum í ám og lækjum. Mikilvægt er að hreinsa frá niðurföllum til að forðast vatnstjón vegna rigningar og leysingavatns. Gula viðvörunin gildir fyrir Vestfirði og allt Norðurland.Meira -
Venju samkvæmt er Stólastúlkum spáð falli
feykir.is Skagafjörður, Íþróttir 19.04.2024 kl. 15.44Það eru nokkrir fjölmiðlar sem spá fyrir tímabilið í Bestu deild kvenna í knattspyrnu og jafnan er liði Tindastóls spáð falli, ýmist 9. eða 10. sæti. Í árlegri spá fyrirliða, þjálfara og forráðamanna er liðinu spáð níunda sæti en liði Keflavíkur því neðsta. Íslandsmeisturum Vals er aftur á móti spáð titlinum og Blikum öðru sæti. Grönnum okkar í Þór/KA er síðan spáð þriðja sætinu.Meira -
Við erum ótrúlega rík af fólki | LS Lulla í spjalli
feykir.is Skagafjörður, Listir og menning, Mannlíf 19.04.2024 kl. 14.40„Litla hryllingsbúðin er skemmtilega fjölbreytt verk með miklum söng og er skemmtileg dramatísk hrollvekja,“ segir Sigurlaug Dóra Ingimundardóttir (Lulla), formaður Leikfélags Sauðárkróks, þegar Feykir spyr hana hvað hún geti sagt um Sæluvikustykki LS þetta árið. Æfingar standa nú yfir en frumsýnt verður í Bifröst á Sauðárkróki sunnudaginn í Sæluviku en samkvæmt áreiðanlegum heimildum Feykis er hér um að ræða 146. sýningu Leikfélags Sauðárkróks frá því það var endurvakið árið 1941.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.