Mark í uppbótartíma - Leiðari Feykis
Þar kom að því að við Króksarar fengum bévítans veiruna í bæinn. „Eins og Skrattinn úr Sauðánni,“ eins og kallinn sagði í denn. Mér fannst það snjöll samlíking þegar haft var eftir einum sem sat í sóttkví að þetta var eins og að fá á okkur mark í uppbótartíma. Það gerist ekki meira svekkjandi.
En ég hef ekki heyrt neinn vera með ásakanir á hendur þeim sem báru smitið norður enda ekki sanngjarnt. Sýktur einstaklingur í borginni hafði fengið neikvæða svörun úr skimun og taldi sig því vera lausan við kórónuveiruna. Foreldri að norðan heimsækir viðkomandi og flytur veiruna í vinnufélaga sem situr með honum í bíl norður á Krók en sá er í viðtali á forsíðu.
Í kjölfarið dreifir veiran sér á milli manna og fjöldi manns kominn í sóttkví og einangrun og sér ekki fyrir endann á þeim ósköpum þegar þessi pistill er í smíðum. Þetta atvik sýnir hve lævís agnarlitli óvinurinn er og getur gert mikinn usla.
Það er margt í þessum heimsfaraldri sem kemur á óvart. Mér sýnist falskt öryggi liggja víða líkt og með skimun sem gefur neikvæða niðurstöðu en viðkomandi reynist samt smitaður. Oft hefur verið bent á að grímunotkun sé ekki eins góð vörn og ætla mætti þar sem flestir umgangast hana rangt með óþarfa snertingum og endurtekinni eða langri notkun.
Annað sem fólk hefur bent á er að þegar upp kemur hópsmit á höfuðborgarsvæðinu stendur öll þjóðin saman og herðir sóttvarnaraðgerðir um allt land en ef sami fjöldi smitast norður í landi er héraðið skilgreint sem hættusvæði og situr eftir meðan allir aðrir fá aukið frelsi.
Þá virðist veiran, þrátt fyrir að vera bráðsmitandi, gera mikinn mannamun. Þannig hefur það gerst svo ég viti, oftar en einu sinni og oftar en tvisvar, að ekki er sjálfgefið að sambúðarfólk smitist. Frekar að það smiti, eða smitist af vinnufélögum eða kunningjum. Það finnst mér undarlegur andskoti en fagna því svo sem alveg. Það lítur bara ekki nógu vel út svona út á við.
En uppbótartíminn er ekki alveg liðinn: „Bítum í skjaldarrendur!“ eins og Bjarni Felixson sagði svo eftirminnilega í íþróttalýsingum sínum, berjumst eins og ljón og verum betri en enginn. Það er næsta víst að við sigrum þennan andstæðing. Og munum að fara varlega og vanda okkur í sóttvörnunum.
Góðar stundir
Páll Friðriksson
Fleiri fréttir
-
Gleðilegt sumar
feykir.is Skagafjörður, Austur-Húnavatnssýsla, Vestur-Húnavatnssýsla 25.04.2024 kl. 11.55„Það er komið sumar...“ sungu Mannakorn um árið og það á við í dag. Í það minnsta er sumardagurinn fyrsti í dag og þó það sé kannski ekki sami stemmari fyrir þessum degi á þessari öld og var á þeirri síðustu þá fylgir deginum oftar en ekki bjartsýni og ylur í hjarta – já, eiginlega sama hvernig viðrar.Meira -
Giggó-appið snýst um að bjarga sér | Spjallað við Kjartan Hall
feykir.is Skagafjörður, Mannlíf, Lokað efni 25.04.2024 kl. 10.38Í janúar rak blaðamaður augun í nýtt app sem kallast Giggó sem er sett fram af Alfreð. Þar sem það var gamalkunnur Skagfirðingur út að austan, lista- og íslenskumaðurinn Kjartan Hallur frá Melstað í Óslandshlíðinni, sem kynnti þetta á Facebook, var að sjálfsögðu tilvalið að senda á hann nokkrar spurningar. Kjartan Hallur er í Alfreðs teyminu og segir starf sitt hjá Alfreð fyrst og fremst vera að ritstýra, semja texta og samræma skilaboð fyrir appið, heimasíðu og þjónustuvefi Alfreðs. „Og núna hefur Giggó-appið bæst við á verkefnalistann. Þar undir er heimasíða, bloggskrif og vinna í markaðssetningu á þessu nýja verkfæri fyrir íslenska gigg-hagkerfið,“ segir hann.Meira -
Rabb-a-babb 225: Atli Freyr
feykir.is Skagafjörður, Rabb-a-babb 25.04.2024 kl. 09.11Atli Freyr Rafnsson frá Króknum fékk það verðuga verkefni að svara Rabb-a-babbi í Feyki og var það frekar strembin fæðing en útkoman svona ljómandi góð. Atli Freyr er fæddur árið 1997 eða um það leyti sem Tiger Woods vann sitt fyrsta Master mót og fyrsti þáttur af South Park fór í loftið.Meira -
Sumardagurinn fyrsti á Hvammstanga
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 24.04.2024 kl. 14.50Í Húnaþingi vestra hefur sumardagurinn fyrsti verið haldinn hátíðlegur allt frá árinu 1957 og í ár verður engin breyting á því þegar félag eldri borgara í samstarfi við Hestamannafélagið Þyt og hefst með ókeypis sirkussýningu í Þytsheimum klukkan 12:00.Meira -
Sóldísir í Gránu
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 24.04.2024 kl. 11.32Kvennakórinn Sóldís heldur lokatónleika söngársins í Gránu á Sauðárkróki í kvöld, miðvikudaginn 24.apríl, svo nú er síðasti séns að hlusta á kórinn flytja lög Magnúsar Eiríkssonar.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.