Skagafjörður

Langþráðum áfanga er náð hjá Skagfirðingum því rennibrautin í sundlauginni í Varmahlíð er komin í gagnið og öllum opin frá klukkan 17:00 í dag, fimmtudag. Hér er um fyrstu alvöru rennibraut að ræða í héraðinu þrátt fyrir fjölda sundlauga víðs vegar um fjörðinn.

Vegna góðrar aðsóknar hefur Leikfélag Sauðárkróks ákveðið að henda í tvær aukasýningar á Ævintýrabókinni eftir Pétur Eggerz. Búið er að sýna átta sýningar og verður sú 9. á morgun föstudag 19.október klukkan 18:00. Seinni aukasýningin verður sunnudaginn 21. október klukkan 15 og hefur hún verið auglýst sem allra síðasta sýning svo það er um að gera að panta miða í tíma.

N4 fór í Tindastólinn á dögunum og ræddi við Viggó Jónsson um nýju skíðalyftuna sem liggur alla leið upp á topp Tindastóls. Eins og sést á meðfylgjandi myndbandi blasir útsýnið yfir fjörðinn fagra og jafnvel yfir í næstu sýslur. Skíðaleiðirnar sem hægt verður að renna sér eftir geta orðið fjölmargar í framtíðinni og mikil eftirvænting hjá skíðafólki.

Arnar Geir Hjartarson, kylfingur úr Golfklúbbi Sauðárkróks, gerir það gott í háskólagolfinu í Bandaríkjunum. Dagana 15.-16. október lék hann í Lindenwood Belleville Invite mótinu sem fram fór í bandaríska háskólagolfinu og komst á verðlaunapall.

Vatnstjón vegna leka út frá ofnum eru algeng á íslenskum heimilum en 3ja hvern dag er slíkt tjón tilkynnt til VÍS en á heimasíðu þess kemur fram að oft megi sjá fyrirboða slíks tjóns á ofnum, til dæmis ryðbletti eða útfellingar á samskeytum. Það er því mikilvægt að skoða ofnana og skipta þeim út, ef þessi einkenni eru sýnileg.

Um hundrað þúsund gestir komu í heimsókn á sýninguna Íslenskur landbúnaður 2018 er haldin var í Laugardalshöll um helgina. Slík aðsókn hefur vart sést á sýningu á Íslandi. Að sögn Ólafs M. Jóhannessonar framkvæmdastjóra sýningarinnar voru undirtektir afar jákvæðar:

Í gær var fimmtugasta og jafnframt síðasta íbúðin afhent nýjum eigendum sem Búhöldar, félag um byggingu húsa fyrir eldri borgara á Sauðárkróki, var með í smíðum. Þá hafa risið alls 25 parhús á þess vegum á 18 árum en fyrsta íbúðin var afhent árið 2000.

Krækjur frá Sauðárkróki tóku þátt í keppni í 2. deild Íslandsmótsins í blaki um helgina og var spilað á Neskaupstað. Krækjurnar, sem keppa undir merkjum Umf. Hjalta, gerðu sér lítið fyrir og unnu alla sex leiki sína 2-0 og töpuðu því ekki einni hrinu á mótinu.

Búið er að ráða í verkefnastöðurnar tvær sem Svf. Skagafjörður auglýsti lausar fyrr í haust. Tíu sóttu um aðra verkefnastjórastöðuna en fimmtán um hina. Tíu manns sóttu um en einn dró umsókn til baka vegna verkefnastjórastöðunnar sem var titluð deildarstjóri en þar var Sigfús Ólafur Guðmundsson ráðinn. Fimmtán sóttu um en tveir drógu umsókn til baka vegna hinnar stöðunnar, verkefnastjóri 3, og var Heba Guðmundsdóttir ráðin.

Síðastliðinn mánudag var dregið í fyrstu umferð bikarkeppni KKÍ og við sama tilefni var kynnt nýtt nafn keppninnar en Geysir bílaleiga er nýr samstarfsaðili KKÍ og ber bikarkeppnin því nafnið Geysis-bikarinn næstu tvö árin.