Skagafjörður

Á heimasíðu Húnaþings vestra segir að rétt upp úr kl. átta í gærmorgun, 1. nóvember 2023, barst slökkviliði Brunavarna Húnaþings vesta tilkynning um eld í iðnaðarhúsnæði á Hvammstanga. Fyrstu upplýsingar voru óljósar og óstaðfest hvort einhver væri í húsinu. Allt tiltækt lið var kallað út en alls tóku 15 manns frá slökkviliðinu þátt í verkefninu. Þegar á staðinn var komið lagði svartan reykjarmökk frá einu bili í húsinu. Kom strax í ljós að bilið var mannlaust en gaskútar og mikill eldsmatur voru í rýminu. Notaðar voru hitamyndavélar til þess að staðsetja eldinn og gekk greiðlega að slökkva. Farið var í að reykræsta rýmið og einnig annað rými við hliðina. Ljóst er að um töluvert tjón er að ræða vegna reyks og sóts.

Sigrún Erla Snorradóttir söngnemandi Tónlistarskóla Austur Húnvetninga verður ein af tíu sem keppa til úrslita í þáttaröðinni Jólastjarnan 2023 sem sýnd verður á Rúv. Sá sem sigrar þessa keppni hlýtur titilinn Jólastjarnan 2023 sem mun svo spreyta sig á hinum árlegu jólatónleikum Björgvins Halldórssonar, Jólagestir Björgvins, ásamt aragrúa af stjörnum þann 16. desember.

Í vikunni sagði ruv.is frá því að aldrei fyrr hefði Fjölbrautaskóli Norðurlands vestra staðið frammi fyrir þeirri áskorun að þurfa að nýta gáma, skólaganga og kaffistofu kennara fyrir kennslu. En undanfarin ár hefur nemendum skólans fjölgað umtalsvert og þá sérstaklega í verknáminu.

Sjónhorn vikunnar kom út í gær og í því er alls konar sniðugt.... t.d. er 20% afsláttur af fötum og skóm í Kaupfélag Skagfirðinga og ýmsir viðburðir sem verða á næstunni auglýstir. Menningarfélagið Grána er með fullt á dagskrá hjá sér eins og tónleikana Jólin í Gránu og svo eru Jólin Heima í Miðgarði. Þá er dagskrá Skagafjarðarprestakalls fyrir nóvember auglýst svo fátt eitt sé nefnt. Mæli með að skrolla í gegnum blaðið svo það fari nú ekkert framhjá þér sem er að gerast á þessu svæði á næstunni.  

Rakel Kemp Guðnadóttir, dóttir Kristbjargar Kemp og Guðna Kristjánssonar, er fædd og uppalin á Sauðárkróki, kona Maríu Önnu Kemp Guðmundsdóttur og eru þær mæður þriggja drengja, elstur er Stefán Þór þrettán ára, Davíð Örn er níu ára og yngstur er Guðni Freyr fjögurra ára.

Í síðustu viku réðist minkur til inngöngu í hænsnakofann á Tyrfingsstöðum á Kjálka í Skagafirði og drap þar fimm hænur og einn hana. Er þetta í annað skiptið á þessu ári sem minkur ræðst á hænsnin á bænum en fyrripart júlí sl. drap annar minkur fjórar hænur á bænum.

Halloween er yfirleitt fagnað þann 31. október en á Króknum var slegið í grikk og gott göngu seinnipartinn á laugardeginum í blíðskaparveðri með dass af smá kulda. Krakkarnir létu það að sjálfsögðu ekki á sig fá og fóru af stað alls konar skrímsli, draugar og furðuverur að sníkja smá gotterí. Feykir fór af stað á kústinum og tók nokkrar myndir ásamt því að fá í lið með sér Ragndísi Hilmarsdóttur sem var einnig með myndavélina á lofti.

Á heimasíðu Grunnskóla austan Vatna segir að textasamkeppnin Fernuflug var haldin meðal íslenskra grunnskólanema í 8. - 10. bekk í septembermánuði og voru sendir inn 1.200 textar. Það er gaman að segja frá því að textar frá tveimur nemendum GaV voru valdir til birtingar á mjólkurfernum MS en alls verða birtir 48 textar.

Meistaraflokkur karla tók á móti Val sl. föstudagskvöld og var bæði geggjuð mæting og stemning í Síkinu sem minnti helst á úrslitaeinvígið í vor. Fyrir leikinn voru Helga Rafni Viggóssyni þökkuð störf hans fyrir fèlagið og fékk treyjan hans sinn stað uppi í rjáfri en hann hefur spilað hvorki meira né minna en 22 tímabil fyrir félagið. Geri aðrir betur. Farið verður yfir feril Helga Rafns í kynningarblaði Körfuknattleiksdeildar Tindastóls, Stóllinn 2023/2024, sem kemur út á næstu vikum og verður dreift í öll hús á Króknum. 

Meistaraflokkur kvenna spilaði sinn fyrsta heimaleik í Síkinu sl. laugardag þegar þær fengu ungmennaflokk Stjörnunar í heimsókn. Lokatölur voru 85-65 fyrir Stólastúlkum og náðu þær þar með í sinn fyrsta sigur í vetur.