Skagafjörður

Það hefur ekki farið framhjá mörgum að fjölmiðlar landsins berjast í bökkum í sí harðnandi rekstrarumhverfi. Veitist það mörgum erfitt og hafa þeir týnt tölunni síðustu misseri. Pappírsfjölmiðlar eru fáir og bjartsýnustu menn að verða svartsýnir á framtíð þeirra. Margt er tínt til þegar ástæðna er leitað og flest allt gott og gilt.

Sumardagurinn fyrsti er í dag og óskar Feykir lesendum gleðilegs sumars. Þessi ágæti dagur virðist ætla að bjóða upp á sumarveður í dag, hitinn á Norðurlandi vestra víðast hvar á bilinu 10-14 gráður, glampandi sól og suðvestanátt, samkvæmt spá Veðurstofunnar. Það er því ekkert því til fyrirstöðu að fagna komu sumars með því að stökkva í stuttbuxur í tilefni dagsins. Þeir sem vilja halda daginn hátíðlegan gætu kíkt á Hvammstanga í dag en þar er að venju dagurinn tekinn með trompi.

Einvígi Njarðvíkinga og Tindastóls í undanúrslitum Subway-deildarinnar hefst í Ljónagryfjunni í Njarðvík í kvöld og ekki laust við að fiðringur sé farinn að gera vart við sig hjá stuðningsmönnum Stólanna. Oft hafa væntingar verið miklar og eflaust hafa einhverjir lært það af reynslunni að spenna væntingabogann ekki of hátt. En lið Tindastóls hefur verið að spila vel, er með meistara Pavel í brúnni og sagt er að trúin flytji fjöll. Kannski er komið að Tindastóli? Feykir hafði samband við Brynjar Þór Björnsson, fyrrum leikmann Stólanna og margfaldan meistara úr Vesturbænum, og hann er bjartsýnn á gengi Tindastólsliðsins.

Kristín Sigurrós Einarsdóttir hefur verið ráðin í starf forstöðumanns Héraðsbókasafns Skagfirðinga en hún tekur við starfinu af Þórdísi Friðbjörnsdóttur sem mun láta af starfi forstöðumanns í sumar. Í frétt á vef Skagafjarðar kemur fram að starf forstöðumanns felur í sér allt sem viðkemur starfsemi bókasafns svo sem rekstur, mannaforráð, gerð fjárhagsáætlana, innkaup, grisjun, stjórnun, skipulag safnkennslu, umsýslu og fleira. Forstöðumaður kemur fram fyrir hönd safnsins og sér um kynningarmál þess, skipuleggur þjónustu safnsins og leiðir faglega starfsemi þess.

Rúta með fimmtán manns innanborðs valt út í Svartá við Saurbæ í gamla Lýtingsstaðahreppi í Skagafirði um hálf þrjú í dag. Mbl.is hefur eftir Svavari Atla Birgissyni, slökkviliðsstjóra hjá Brunavörnum Skagafjarðar, að enginn sé í lífshættu en nokkrir munu þó vera alvarlega slasaðir.

Besta deild kvenna fer í gang næstkomandi þriðjudag og þar verða Stólastúlkur í eldlínunni því lið Tindastóls fær Keflavík í heimsókn á Krókinn og hefst leikurinn kl. 18:00. Feykir tók púlsinn á Donna Sigurðssyni, þjálfara Tindastóls, og sagði hann að upphaf Bestu deildarinnar legðist frábærlega í sig.

31. ársþing SSNV fór fram síðastliðinn föstudag á Hótel Laugarbakka. Þó Miðfjörðurinn hafi tekið vel á móti gestum þá fór ársþingið fram í skugga tíðinda af riðutilfellum á svæðinu. Þingið notaði tækifærið og skoraði á Matvælaráðherra að fara án tafar í breytingar á reglugerð um útrýmingu á riðuveiki og bætur vegna niðurskurðar. Jafnframt þurfi að leggja meiri áherslu á fyrirbyggjandi aðgerðir og tryggja fjármagn til rannsókna.

Atvinnulífssýning verður haldin í íþróttahúsinu á Sauðárkróki 20. - 21. maí nk. líkt og áður hefur verið sagt frá. Feykir spurði Sigfús Ólaf Guðmundsson, verkefnastjóra atvinnu-, menningar- og kynningarmála hjá sveitarfélaginu Skagafirði, hvernig gengi að selja pláss. „Skráningin gengur vel og er í fullum gangi. Síðast voru um 60 fyrirtæki og stefnum við á þá tölu í ár,“ segir Sigfús Ólafur. Síðast var atvinnulífssýning á Sauðárkróki vorið 2018.

Skeifudagurinn fer fram í hestamiðstöð Landbúnaðarháskólans Íslands á Hvanneyri að Mið-Fossum Sumardaginn fyrsta og hefst kl. 13 með fánareið og setningu. Skeifudagurinn dregur nafn sitt af verðlaununum sem veitt eru af Morgunblaðinu sem vildi með þessu framtaki sýna hug sinn til þessarar fornu og fögru íþróttar, hestamennskunnar. Skeifuna hlýtur sá nemandi sem efstur stendur á prófi í tamningu og reiðmennsku. Auk Skeifunnar er einnig keppt um Gunnarsbikarinn, Eiðfaxabikar, Ásetuverðlaun Félags tamingarmanna og Framfaraverðlaun Reynis.

Lið Tindastóls sem spilar í Bestu deild kvenna í sumar hefur óvænt náð að styrkja hópinn en Sofie Dall Henriksen hefur gengið til liðs við Stólastúlkur. Að sögn Donna þjálfara var Sofie fyrir tilviljun að vinna á Króknum hjá Mjólkursamlaginu. „Við fengum veður af því frá yfirmanni hennar að þarna væri stelpa sem hefur áður verið að spila fótbolta.“