Samfélagið okkar :: Áskorendapenninn Sigríður Ólafsdóttir Víðidalstungu
Í upphafi langar mig til að þakka kærlega fyrir áskorunina, ég er nefnilega þeim hæfileika gædd að vera aldrei andlausari í skrifum en þegar skorað er á mig að skrifa eitthvað, hæfileiki sem væri nú líklega sérstakt rannsóknarefni en það er annað mál.
Í þessum pistli langar mig til að fjalla um náunga- og nágrannakærleik. Það er nefnilega fyrirbæri sem mér finnst stundum vera eilítið vanmetið en skiptir samt svo ótrúlega miklu máli.
Hér í sveitarfélaginu eigum við marga góða nágranna, reyndar eru allir okkar sveitungar góðir nágrannar. Auðvitað getum við stundum þrætt um hina ýmsustu hluti, bara eins og gerist innan allra sveitarfélaga hef ég trú á, en það er einmitt það sem gerir samfélagið okkar svo gott að við getum leyft okkur að greina á um allskonar hluti. Við þrætum og rífumst og erum ósammála um margt og mikið en þegar svo eitthvað bjátar á þá stöndum við öll saman.
Það er að mínu mati það sem býr til samfélag, það er að fólk taki höndum saman og styðji hvert við annað. Samfélag snýst nefnilega ekki um að vera alltaf sammála um allt, samfélag snýst um að taka utanum hvert annað sama þó að fólk hafi misjafnar skoðanir. Við erum jú öll einstaklingar og það væri óeðlilegt ef við værum alltaf sammála um allt, samfélag hins vegar samþykkir misjafnar skoðanir á málum og heldur samt saman.
Ég hef svosum ekki búið mjög víða. Í þessi skipti sem ég flutti að heiman var það ýmist vegna skóla eða vinnu, í hvert skipti stefndi hugurinn heim aftur og það er af því að það er bara svo ákaflega gott að búa í Húnaþingi vestra. Hér hjálpumst við að þegar þarf, sinnum hvert öðru þegar þarf, við tökum fagnandi á móti fólki sem vill flytja í sveitarfélagið. Ég hvet ykkur hér með til að flytja í Húnaþing vestra!
Ég skora á Sofiu B. Krantz, nágranna minn, að koma með pistil næst.
Áður birst í 10. tbl. Feykis 2021
Fleiri fréttir
-
Skemmtileg stund og sérlega þjóðleg
feykir.is Austur-Húnavatnssýsla, Ljósmyndavefur, Listir og menning, Mannlíf 20.04.2024 kl. 13.10Laugardaginn 6. apríl sl. var boðað til mikillar og þjóðlegrar menningarveislu í gamla fjósinu í Bólstaðarhlíð í Húnavatnssýslu þar sem fram fór viðburðurinn Hrossakjöt og kvæðaraus. Undirritaður var gestur þeirra hjóna, og ferðaþjónustubænda, Freyju Ólafsdóttur og Einars Kolbeinssonar og í stuttu máli sagt var þetta einstaklega skemmtileg stund og sérlega þjóðleg.Meira -
Er botninum náð, vísnavinir góðir?
feykir.is Skagafjörður, Listir og menning 20.04.2024 kl. 11.27Það styttist í Sæluviku Skagfirðinga og því rétt að minna á Vísnakeppni Safnahússins sem sagt var frá fyrr í mánuðinum hér í Feyki. Vísur og botnar verða að hafa borist Safnahúsi Skagfirðinga Faxatorgi 55, Sauðárkróki í síðasta lagi á miðnætti 23. apríl nk.Meira -
Umhverfisdagur FISK Seafood 2024
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 20.04.2024 kl. 00.12Umhverfisdagur FISK Seafood verður haldinn 4. maí nk. frá klukkan 10-12. Áætlað er að tína rusl á strandlengjunni á Sauðárkróki (sem verður skipt upp í svæði), Nöfunum, í Varmahlíð, á Hólum og á Hofsósi. Frá 12:15 mun FISK Seafood bjóða öllum þátttakendum að þiggja veitingar að Sandeyri 2.Meira -
Ævintýrið úti hjá liði Tindastóls
feykir.is Skagafjörður, Íþróttir 19.04.2024 kl. 23.34Strax í haust voru bara þrjú hjól undir bíl meistara Tindastóls og eftir það var nánast sama hvaða hindrun varð á vegi hans, það varð allt til að hægja ferðina. Hann hökti reyndar inn í bikarúrslit og í úrslitakeppnina þó með naumindum væri. Stólakagginn sem allir biðu eftir að hrykki í gírinn, kæmi sterkur inn á endasprettinum, var eiginlega hálf vélarvana allt tímabilið. Leikurinn í Smáranum í kvöld var reyndar góður en enn og aftur voru Stólarnir sjálfum sér verstir. Lokakarfan var Grindvíkinga og hún skipti sköpum – lokastölur 91-89. Stólarnir því snemma í sumarfrí þennan veturinn og kannski allir fegnir – þessi bíll þarf í allsherjar yfirhalningu.Meira -
Gul viðvörun á Norðurlandi vestra
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 22.24Veðurstofan hefur smellt á okkur gulri veðurviðvörun mest allan laugardaginn og fram á aðfaranótt sunnudags. Gert er ráð fyrir ört hækkandi hita og því má búast má við miklum leysingum, auknu afrennsli og vatnavöxtum í ám og lækjum. Mikilvægt er að hreinsa frá niðurföllum til að forðast vatnstjón vegna rigningar og leysingavatns. Gula viðvörunin gildir fyrir Vestfirði og allt Norðurland.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.