„Það væri öllum til hagsbóta ef samvinna sveitarfélaganna í landshlutanum yrði enn þéttari“

Pétur Bergþór Arason sveitarstjóri Húnabyggðar. AÐSEND MYND

„Við höfum allt þetta kjörtímabil verið að vinna að gríðarlega mikilvægum verkefnum t.d. þeim sem snúa að breytingu á orkulögum og nýrri byggðarlínu sem snerta hagsmuni allra íbúa núna og um langa framtíð, þau verkefni halda áfram og þótt trollið sé orðið fullt þá þarf að koma því upp á dekk og aflanum í land þannig að hægt sé að búa til verðmæti. Þetta hefur verið verkefnið og verður ennþá næstu misseri,“ segir Pétur Bergþór Arason, sveitarstjóri Húnabyggðar, aðspurður um hver mikilvægustu verkefnin séu sem sveitarfélagið hyggst vinna að á þessu ári. Pétur er þriðji sveitarstjórinn á Norðurlandi vestra sem svarar spurningum Feykis þetta vorið.

Pétur segir að hvað fjárfestingar varðar þá haldi sveitarfélagið áfram því uppbyggingarstarfi sem það hafi verið í en þetta og síðustu ár hafa um 400 milljónir verið settar árlega í ýmiskonar viðhalds- og nýframkvæmdaverkefni. „Þar er ekkert eitt sem stendur upp úr heldur höfum við verið að reyna að gera eitthvað í öllum málaflokkum og eignunum okkar til þess að hlutirnir drappist ekki niður sem er alltaf dýrara í lok dags.“

Hvernig munu verkefni þessa árs bæta daglegt líf íbúa í samfélaginu? „Nánast allt sem við gerum endar sem þjónusta við íbúa og það hefur t.d. mikið fjármagn farið í Íþróttamiðstöðinna sem er stórt hús og dýrt í rekstri. Nýtt gólf í íþróttahúsinu hefur slegið í gegn og húsið er nú notað sem aldrei fyrr og blakið er nýja æðið hérna. Nýtt klórkerfi og ný gufa er komin í sundlaugina sem er vinsæl og í ár verður haldið áfram þar, af nógu er að taka. Gatnagerð mun halda áfram, vatnsveitan og fráveitan bæði í þéttbýli og dreifbýli sem og led-væðing götulýsingar í þétt- og dreifbýli.

Við höfum allt þetta kjörtímabil verið í mikilli baráttu hvað varðar samgöngumál og sú barátta mun halda áfram þar sem langt er í land þar hvað okkur og þennan landshluta varðar. En tvö nokkuð stór verkefni verða í gangi í ár í Vatnsdal og út á Skaga sem munu hafa mikla þýðingu fyrir íbúana okkar.“

Hverjar eru stærstu áskoranirnar sem sveitarfélagið stendur frammi fyrir við framkvæmd þessara verkefna? „Innviðaverkefnin eru nánast endalaus og stærsta áskorunin þar er vöntun á fjármagni til að halda í horfinu, standast þær kröfur sem gerðar eru í dag og mæta þeirri byggðarþróun sem við erum að vinna að. Það er gömul saga og ný að ríkið fjármagnar illa þau verkefni sem falin eru sveitarfélögum og stóra verkefnið okkar þetta kjörtímabil hefur verið að setja grunnstoðir undir fjárhag sveitarfélagsins og framtíðar atvinnu- og byggðarþróun Húnabyggðar til skemmri og lengri tíma litið. Það eru mjög góðar horfur á því að það hafi tekist mjög vel og við erum því mjög bjartsýn hvað þetta og næstu ár varðar.“

Það er kosningaár og það kemur fyrir að skipt sé um sveitarstjóra á þeim tímamótum. Gefur þú kost á þér til áframhaldandi starfa í þínu sveitarfélagi? „Það er búið að vera heiður fyrir mig að koma aftur heim og vera með í þeirri endurskipulagningu og uppbyggingu sem staðið hefur yfir og ég veit að það hefur tekist að koma hlutunum á þann stað að hægt sé að fara í alvöru sókn eftir mjög langan varnarleik. Stundum er sagt í boltanum að leikurinn sé steindautt jafntefli og þannig hefur það svolítið verið, en ég er mjög bjartsýnn fyrir hönd svæðisins að nýjir og bjartir tímar séu framundan. Það verður verkefni nýrrar sveitarstjórnar að ganga frá ráðningu sveitarstjóra og satt best að segja er ég að einbeita mér að því sem við erum að gera núna, hitt kemur í ljós.“

Nú þegar líður að lokum kjörtímabilsins hvaða verkefni ert þú ánægðastur með að hafi komist í verk eða unnið að? „Ég er mjög stoltur af þeim árangri sem ég og mitt teymi höfum náð á síðustu fjórum árum. Þegar ég segi mitt teymi þá á ég við alla starfsmenn Húnabyggðar, sem hafa hver á sinn hátt lagt sig fram um að búa til góða þjónustu fyrir íbúa og gert það faglega og skynsamlega á allan hátt. Allur árangur sem við höfum náð hefur byggt á þessu sameiginlega átaki okkar allra.

Verkefnin hafa verið risavaxin samhliða því að reka sveitarfélagið og þjónustu þess eins og vanalega, en sameining Húnavatnshrepps og Blönduósbæjar hefur verið mjög flókið verkefni og síðan sameininingin við Skagabyggð. Að mínu mati voru þessar sameiningar löngu tímabærar aðgerðir og það er morgunljóst að við stöndum mun sterkar saman en í sundur. Samhliða þessu höfum við verið að slíta þremur byggðarsamlögum en slit þeirra voru einnig löngu tímabær og við stöndum einnig sterkari eftir þær aðgerðir. Sameining sveitarfélaganna og slitin á byggðarsamlögunum ein og sér hefðu verið ærið verkefni, en við þurftum að reka sveitarfélagið samhliða þessu og vinna með alsherjar tiltekt og endurskipulagningu innan sveitarfélagsins ásamt öðru og því hafa þessi síðustu fjögur ár verið ævintýraleg svo ekki sé meira sagt.

Stærstu verkefnin samhliða þessu öllu sem eru um leið, að mínu mati, mestu hagsmunamál íbúanna hér frá því að rafmagnið og síminn komu eru breytingar á orkulögum er varðar fasteignagjöld orkufélaga, lagnaleið og framkvæmdir við nýja byggðalínu og uppbygging nýrrar fjölorkustöðvar og lágvöruverslunar. Þessi verkefni munu gjörbreyta öllu landslagi hér í Húnabyggð og á svæðinu öllu hvað varðar atvinnuuppbyggingu og byggðarfestu.“

Ef þú fengir að láta drauma þína rætast hvað vildirðu sjá gerast næstu fjögur árin í þínu sveitarfélagi? „Það væri öllum til hagsbóta ef samvinna sveitarfélaganna í landshlutanum yrði enn þéttari, sveitarfélögin eru öll af vilja gerð en mér finnst persónulega vanta aðeins upp á að við vinnum sem eitt, en þannig getur það vel verið og þannig ætti það að vera. Þá væri alveg hægt að sjá fleiri sameiningar á svæðinu, en það verða íbúarnir að vilja sjálfir.

Ég sé fyrir mér nýja fjölorkustöð og lágvöruverslun sem verður algjör bylting fyrir íbúa svæðisins. Sú uppbygging mun styrkja alla byggð í Húnabyggð og t.d. uppbygginguna í gamla bænum en sú uppbygging mun taka á sig endanlega mynd á næstu árum. Við verðum komin með nýtt og frábært tjaldsvæði sem mun slá í gegn og göngubrú yfir ósinn mun rísa og styrkja alla uppbyggingu er varðar ferðamennsku og upplifun íbúa. Þá væri ekki óraunhæft að sjá fyrir sér tvo græna tækniiðngarða og Textílmiðstöðin mun spila mikilvægt hlutverk í nýsköpun og vinnslu/endurvinnslu textíls á svæðinu. Reflinn verður komin upp til sýnis, einnig á stafrænu formi og verður ásamt öðrum hlutum tengdum Vatnsdælu ferðamannasegull í hjarta Blönduóss. Ferðamannaiðnaðurinn mun ná vopnum sínum frá Skagatá að Hveravöllum og uppbygging hefst í þeim geira af alvöru með byggingu stórs hótels og fyrirtækja sem sérhæfa sig í að selja upplifun. Einhverskonar starfsemi verður komin í gamla sláturhúsið, hvort sem að það verður iðnaður, menning eða blóðböð. Nýr þjónustukjarni fyrir fólk með fötlun verður risinn og almennt verður mikið að gera í nýbyggingum í þéttbýli og dreifbýli enda hagvöxtur í Húnabyggð. Þetta voru bara nokkur dæmi sem auðvelt er að sjá fyrir sér og svo má láta sig dreyma um að við hefjumst handa við að reisa fjölnota knattspyrnuhöll, svona fyrir afganginn.

Fyrir utan allt þetta gerist síðan alltaf eitthvað annað sem maður átti alls ekki von á, þannig að það verður ef af líkum lætur nóg að gerast í Húnabyggð næstu árin,“ segir Pétur að lokum.