Upprifjun á tveggja vikna hjálparstarfi Björgunarfélagsins Blöndu
Björgunarsveitir á Norðurlandi höfðu í mörg horn að líta meðan veðrið vonda geystist yfir landið á dögunum, eins og komið hefur fram í fréttum. Á Facbook-síðu Björgunarfélagsins Blöndu á Blönduósi hefur verið birt upplýsandi upprifjun á því sem á daga sjálfboðaliða þess hefur drifið síðastliðinn hálfan mánuð, og ætti að minna fólk á hve gott starf er innt af hendi af þessum hjálparsveitum okkar.
„Þetta byrjaði allt saman á einföldu verkefni sunnudags seinnipart 8. des. Þá sóttum við fasta ferðalanga sem komnir voru að Dúfunefsfelli á Kjalvegi. Google maps hafði sagt að Kjalvegur væri fljótlegasta leiðin suður á land :) ekki í fyrsta skipti og líklegast ekki í það síðasta.
Mánudagskvöldið 9. des fór í undirbúning fyrir óveðrið sem átti eftir að dynja á okkur. Allt var gert klárt í bækistöðvum okkar, tæki, tól og mannskapur.
Á þriðjudeginum uppúr kl 10 mættu síðan fyrstu félagar í hús og voru klárir fyrir komandi verkefni. Fyrsta útkall barst okkur uppúr hádegi og við tók síðan fljótlega eftir það stanslausar aðstoðarbeiðnir fram á miðvikudagskvöld. Við vorum með 5-6 hópa á fullu allan þann tíma og fengum einnig aðstoð frá félögum okkar í HSSR á snjótroðaranum Bola. Mannskapurinn fékk kærkomna hvíld aðfaranótt fimmtudagsins en þá höfðu nokkrir verið á fótum í 36 klst samfleytt. Fimmtudagurinn tók svo við með áframhaldandi verkefnum, þar á meðal mokstur af fjárhúsþökum, hrossasmölun, viðgerðir á tækum o.fl. o.fl. Á föstudeginum byrjuðu síðan leitir og mokstur á hrossum víðsvegar um sýsluna og urðu þau allnokkur verkefnin tengt því. Laugardagurinn og sunnudagurinn fóru einnig í að leita að hrossum á sleðum sveitarinnar. Farið var í Langadalsfjall, fram í Svartárdal og fram á Rugludal meðal annars. Rarik menn nutu einnig aðstoðar okkar á sunnudeginum en þá keyrðum við fyrir þá búnað út á Skaga. Á mánudeginum kom svo aðstoðarbeiðni um að sækja rollur í sjálfheldu upp á háls fyrir ofan Syðri Löngumýri í Blöndudal og fór jeppa- og sleðahópur í það.
Þriðjudagurinn 17. des komin 1 vika síðan fyrstu verkefni fóru að berast í hús og þá sendum við sleðahóp frá okkur að smala hrossahóp til byggða sem vitað var um á Vatnadal fyrir ofan Vatnahverfi. Vinnukvöld á miðvikudagskvöldi fór í yfirferð á tækjum og búnaði og viðgerðir á því sem hafði bilað í látunum. Einnig var byrjað að undirbúa flugeldavertíð sem er á næstu grösum. Fimmtudagurinn var síðan kærkominn frídagur :) en það entist bara til kl 01 á aðfaranótt föstudags en þá hafði farið útaf flutningabíll í Langadal og var farið að undirbúa með tryggingarfélagi að afferma hann um morguninn. Fór galvaskur hópur félaga af stað kl 12 á föstudeginum í að afferma vagninn en hann var fullur af kæli- og matvöru sem þurfti að komast norður sem fyrst. Gekk það verkefni mjög vel og búið var að tæma hann um kl 18.
Má segja að félagar okkar séu búnir að vinna þrekvirki síðastliðna daga og gífurlegt álag verið á starfsemi félagsins. Við þökkum allan þann stuðning og hlýhug sem við höfum fengið undanfarna daga :) Er það von okkar að félagar fái frí með fjölskyldum sínum yfir hátíðirnar.
Til gamans þá höfum við tekið saman hvað félagar eru búnir að láta af hendi margar klst. í aðstoð og starf félagsins, frá sunnudagskvöldi 8. des. til föstudagskvölds 20. des. Komnar eru 848 klst.“
Hægt er að sjá fleiri myndir HÉR
Fleiri fréttir
-
Skagamenn höfðu betur gegn Stólum í bikarnum
feykir.is Skagafjörður, Íþróttir 25.04.2024 kl. 21.04Lið Tindastóls fór á Skagann í dag og lék gegn heimamönnum í ÍA í 32 liða úrsltum Mjólkurbikarsins. Leikið var í Akraneshöllinni og fóru leikar þannig að Skagamenn, sem eru með lið í Bestu deild karla, höfðu betur og enduðu þar með bikarævintýri Stólanna. Lokatölur þó aðeins 3-0.Meira -
Erum allar ready í alvöru seríu - segir Brynja Líf
feykir.is Skagafjörður, Íþróttir, Ljósmyndavefur 25.04.2024 kl. 14.22Það hefur verið gaman að fylgjast með liði Stólastúlkna í körfunni í vetur og nú spilar liðið til úrslita um sæti í Subway-deildinni að ári. Það er mikil breyting á liðinu frá því árið áður, mörg púsl bættust í hópinn síðasta haust sem Helgi þjálfari hefur náð að sameina í heilsteypta mynd. Eitt lykilpúslið er Brynja Líf Júlíusdóttir, 16 ára stúlka frá Egilsstöðum, sem kom á Krókinn til að spila með liði Tindastóls og stunda nám á náttúruvísindabraut og í körfuboltaakademíu FNV. Hún er ein efnilegasta körfuboltastúlka landsins í sínum árgangi og í síðasta leiknum gegn Snæfelli á dögunum þá gerði hún átta af tíu stigum Tindastóls í framlengingu.Meira -
Kvenfélag Svínavatnshrepps hélt upp á 150 ára afmælið með kökuveislu af gamla skólanum
feykir.is Austur-Húnavatnssýsla, Mannlíf 25.04.2024 kl. 13.43Kvenfélag Svínavatnshrepps hélt upp á 150 ára afmæli sitt 20. apríl sl. Var öllum kvenfélagskonum í Austur-Húnavatnssýslu boðið í kaffi í Dalsmynni. Þar var mikil kökuveisla sem einkenndist af því að hafa kaffibrauð sem hugsanlega hefði getað verið á borðum er kvenfélagið var stofnað.Meira -
Gleðilegt sumar
feykir.is Skagafjörður, Austur-Húnavatnssýsla, Vestur-Húnavatnssýsla 25.04.2024 kl. 11.55„Það er komið sumar...“ sungu Mannakorn um árið og það á við í dag. Í það minnsta er sumardagurinn fyrsti í dag og þó það sé kannski ekki sami stemmari fyrir þessum degi á þessari öld og var á þeirri síðustu þá fylgir deginum oftar en ekki bjartsýni og ylur í hjarta – já, eiginlega sama hvernig viðrar.Meira -
Giggó-appið snýst um að bjarga sér | Spjallað við Kjartan Hall
feykir.is Skagafjörður, Mannlíf, Lokað efni 25.04.2024 kl. 10.38Í janúar rak blaðamaður augun í nýtt app sem kallast Giggó sem er sett fram af Alfreð. Þar sem það var gamalkunnur Skagfirðingur út að austan, lista- og íslenskumaðurinn Kjartan Hallur frá Melstað í Óslandshlíðinni, sem kynnti þetta á Facebook, var að sjálfsögðu tilvalið að senda á hann nokkrar spurningar. Kjartan Hallur er í Alfreðs teyminu og segir starf sitt hjá Alfreð fyrst og fremst vera að ritstýra, semja texta og samræma skilaboð fyrir appið, heimasíðu og þjónustuvefi Alfreðs. „Og núna hefur Giggó-appið bæst við á verkefnalistann. Þar undir er heimasíða, bloggskrif og vinna í markaðssetningu á þessu nýja verkfæri fyrir íslenska gigg-hagkerfið,“ segir hann.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.