A-Húnavatnssýsla

Innlausn greiðslumarks í sauðfé og úthlutun til þeirra framleiðenda sem óskuðu eftir kaupum hefur farið fram og segir á vef atvinnuvega- og nýsköpunarráðuneytisins að framkvæmdin sé í samræmi við breytingar sem gerðar voru á sauðfjársamningi við endurskoðun hans sl. vetur og tóku gildi þann 19. nóvember sl.

Þriðjudaginn 7. janúar komu saman til fundar 14 félagar í Veðurklúbbnum á Dalbæ. Farið var yfir spágildi síðasta mánaðar og voru allir sammála um það að „skotið“ sem spámenn áttu von á var öflugra og hraustara en við var búist. „Engu líkara en það væri „heimahlaðið skot,““ eins og einum félaga varð að orði en því miður gekk síðasta spá ekki eftir.

Enn er vonskuveður víða á landinu, appelsínugul eða gular viðvaranir í gildi í nokkrum landshlutum og hefur Veðurstofan gefið út gult ástand fyrir Strandir og Norðurland vestra. Þar er nú suðvestan hríð með vindhraða á bilinu 18 til 23 m/s, hvassast á Ströndum. Búast má við éljagangi með skafrenningi og er lélegt skyggni, einkum í éljum, og áfram slæm akstursskilyrði. Afmarkaðar samgöngutruflanir og lokanir á vegum eru líklegar. Fólki er bent á að sýna varkárni og fylgjast með færð á vegum, segir á Veður.is.

Dýralæknum á bakvakt á Norðurlandi vestra hefur verið fjölgað um óákveðinn tíma úr einum í tvo af Matvælastofnun en reynslan sýnir að vaktsvæðið sé of víðfeðmt og illfært á veturna til að einn dýralæknir geti sinnt öllum útköllum, einkum þegar illa viðrar. Tilefnið var gul viðvörun vegna óveðurs.

Blönduósbær óskar eftir að ráða starfsmann í starf launafulltrúa á skrifstofu sveitarfélagsins. Um er að ræða 100 % starf, eða eftir nánara samkomulagi, og er vinnutími frá 8:00 – 16:00. Launafulltrúi sér um launavinnslu sveitarfélagsins ásamt öðrum almennum skrifstofustörfum.

Bílum verður fylgt yfir Holtavörðuheiði til klukkan 20 í kvöld, eftir því sem fram kemur á vef Vegagerðarinnar. Eftir það verður lokað í kvöld og nótt og staðan endurmetin í fyrramálið.

Þessa vikuna vinna átta nemendur úr arkitektúrdeild Listaháskóla Íslands hörðum höndum að hugmyndavinnu fyrir notkun og húsakost Kvennaskólans á Blönduósi og þeirri starfsemi sem þar er til húsa. Verkefnið er unnið undir leiðsögn Birtu Fróðadóttur arkitekts og kennara við arkitektúrdeild LHÍ.

Garnaveiki var staðfest á bænum Reykjum í Húnavatnshreppi skömmu fyrir jól. Í tilkynningu frá Matvælastofnun kemur fram að sjúkdómurinn hefur greinst í sauðfé á tveimur öðrum bæjum í Húna- og Skagahólfi síðastliðin tíu ár. Garnaveiki er ólæknandi smitsjúkdómur í jórturdýrum en hægt er að verja sauðfé og geitur fyrir sjúkdómnum með bólusetningu og halda smitálagi í lágmarki. Á bæjum þeim sem garnaveiki greinist á gilda ýmsar takmarkanir sem lúta að því að hindra smitdreifingu.

Sagnamaðurinn Magnús Ólafsson frá Sveinsstöðum verður með þrjár sögustundir á Landnámssetrinu í Borgarnesi í janúarmánuði sem bera heitið Öxin - Agnes og Friðrik. Þar mun Magnús segja frá einum dramatískasta atburði Íslandssögunnar – síðustu aftökunni á Íslandi sem fram fór við Þrístapa í Vatnsdalshólum þann 12. janúar árið 1830 kl 14 þegar þau Friðrik Sigurðsson og Agnes Magnúsdóttir voru líflátin.

Enn er vonskuveður um mestallt land og vegir víða ýmist ófærir eða lokaðir. Holtavörðuheiðin er ófær sem og fjallvegir á Norðurlandi, Siglufjarðarvegur og Ólafsfjarðarmúli. Veðurstofan gerir ráð fyrir suðvestan hríðarveðri áfram, vindi víða 20-28 m/s, éljagangi og skafrenningi með lélegu skyggni. Víðtækar samgöngutruflanir líklegar, lokanir á vegum og ekkert ferðaveður á meðan viðvörunin er í gildi. Fólki er bent á að sýna varkárni og fylgjast með veðurspám.