Mestu atvinnutekjur á Norðurlandi vestra árið 2015 komu úr opinberri stjórnsýslu

Meðalatvinnutekjur á Norðurlandi vestra 2008 og 2015. Töflur úr skýrslu Byggðastofnunar.

Verulegur samdráttur varð á Norðurlandi vestra í atvinnutekjum bæði í Húnavatnssýslum og í Skagafirði samkvæmt skýrslu Byggðastofnunar Atvinnutekjur 2008-2015 eftir atvinnugreinum og svæðum. Í skýrslunni er gefin mynd af þróun atvinnutekna á landinu eftir atvinnugreinum kyni, landshlutum og svæðum. Atvinnutekjur á Norðurlandi vestra námu tæpum 18,4 milljörðum kr. á árinu 2015 og höfðu dregist saman um 260 milljónir að raunvirði frá árinu 2008 eða um 1,4%. Í Húnavatnssýslum drógust atvinnutekjur saman um 3,0% og íbúum fækkaði um rúmlega 200 eða 6,6%, mest í Húnaþingi vestra og á Skagaströnd. Í Skagafirði drógust atvinnutekjur saman um 0,4% og íbúum fækkaði um ríflega 130 eða 3,3%. 

Meðalatvinnutekjur á Norðurlandi vestra voru um 4,1 milljón kr. sem er rúmlega 90% af landsmeðaltali árið 2015. Allnokkur munur var á milli svæðanna þar sem í Húnavatnssýslum voru meðalatvinnutekjur um 85% af landsmeðaltali en um 95% í Skagafirði. Í Húnavatnssýslum höfðu meðaltekjurnar hækkað frá árinu 2008 um tæp 3% að raunvirði en um tæp 2% í Skagafirði.

Mestu atvinnutekjur á Norðurlandi vestra árið 2015 komu úr opinberri stjórnsýslu og almannatryggingum, tæp 14%. Í Húnavatnssýslum var hlutfallið ríflega 16% sem líklega skýrist af starfsstöðvum Vinnumálastofnunar á Skagaströnd og Hvammstanga og sektarinnheimtu á Blönduósi. Fræðslustarfsemi er með 12,5% af atvinnutekjum á svæðinu. Í Skagafirði er hlutfallið 14% sem skýrist af Fjölbrautaskóla Norðurlands vestra og Háskólanum á Hólum. Þriðja stærst í atvinnutekjum eru verslun og viðgerðir ökutækja með 10%. Þar er hlutfallið rúmlega 7% í Húnavatnssýslum á meðan það er tæp 12% í Skagafirði. Heilbrigðis- og félagsþjónusta er síðan með tæp 9%.  Framleiðsla án fiskvinnslu er með 8,5% af atvinnutekjum á svæðinu, fiskveiðar með 8%, landbúnaður með 6,5% og fiskvinnsla ríflega 6%. 

Norðurlandi vesta er sundurgreint í tvennt. Annars vegar sveitarfélögin Húnaþing vestra, Húnavatnshreppur, Blönduósbær, Sveitarfélagið Skagaströnd og Skagabyggð sem eru í Húnavatnssýslum og Sveitarfélagið Skagafjörður og Akrahreppur sem eru í Skagafjarðarsýslu.

Atvinnutekjur 2008-2015  

Í Húnavatnssýslum var samdráttur í atvinnutekjum um 3% eða ríflega 220 milljónir að raunvirði á tímabilinu 2008 til 2015. Atvinnutekjur árið 2015 námu 7,2 milljörðum kr. Mestu atvinnutekjurnar árið 2015 voru greiddar í opinberri stjórnsýslu og almannatryggingum um 1.180 milljónir kr. Þá koma fiskveiðar og fræðslustarfsemi með um 740 milljónir kr. hvor grein. Rúmlega 700 milljónir kr. voru í atvinnutekjur af heilbrigðis- og félagsþjónustu og tæplega 700 milljónir í framleiðslu án fiskvinnslu. Atvinnutekjur í landbúnaði voru tæplega 600 milljónir kr. Mestur samdráttur á tímabilinu var í byggingastarfsemi og mannvirkjagerð 242 milljónir kr. (35%), í heilbrigðis- og félagsþjónustu 170 milljónir kr. (19%) og í fiskveiðum 150 milljónir kr. (17%). Aukning varð í fiskvinnslu upp á 187 milljónir kr. (146%) og í landbúnaði 164 milljónir kr. (38%)49.  

Í Skagafirði drógust atvinnutekjur saman um 50 milljónir kr. að raunvirði á milli áranna 2008 og 2015 eða 0,4%. Mestar atvinnutekjur á árinu 2015 komu úr fræðslustarfsemi með tæpan 1,6 milljarð kr., opinber stjórnsýsla og almannatryggingar 1,3 milljarð kr. og síðan verslun og viðgerðir ökutækja 1,3 milljarð kr. Þar á eftir koma heilbrigðis- og félagsþjónusta með 880 milljónir kr., framleiðsla án fiskvinnslu með tæplega 860 milljónir kr., fiskvinnsla með 850 milljónir kr. og fiskveiðar með 730 milljónir kr. Mest aukning á milli áranna 2008 og 2015 var í fiskvinnslu rúmar 450 milljónir kr. (115%), í landbúnaði rúmar 150 milljónir kr. (35%), í veitinga- og gistirekstri 140 milljónir kr. (86%) og í verslun og viðgerðum ökutækja 100 milljónir kr. (9%).  Samdráttur varð mestur í byggingastarfsemi og mannvirkjagerð 410 milljónir kr. (34%), í fiskveiðum ríflega 300 milljónir kr. (29%) og í heilbrigðis- og félagsþjónustu 190 milljónir kr. (18%).