Stanslaust fjör frá fimmtudegi til sunnudags

Skagfirskir lummudagar verðar haldnir um næstu helgi, en þeir eiga fimm ára afmæli í ár. Feykir náði tali af Sigríði Ingu Viggósdóttur, framkvæmdastjóra hátíðarinnar, þar sem hún var nýkomin af fundi og á kafi í undirbúningi ,sem hún segir ganga vel.

Að sögn Sigríðar Ingu verður hátíðin með hefðbundnu sniði. Hún segir Lummudaga hafa ákveðna sérstöðu þar sem ekki sé veitt miklu fjármagni í hátíðina og því sé allt heimatilbúið sem að henni snýr, og það sé virkri þátttöku Skagfirðinga að þakka að náðst hafi að halda Lummudaga í þessi fimm ár. Helsta nýjung hátíðarinnar í ár er Árnahlaupið, en það er hlaupið til heiðurs Árna Stefánssyni íþróttakennara sem verður sextugur í ár. Einnig ríkir ákveðin spenna yfir þeim áformum Gærunnar að kynna þá tónlistarmenn sem þar koma fram á götumarkaðnum á laugardaginn, en Gæran verður haldin í ágúst. Lummudagar hefjast í Litla-Skógi seinnipart fimmtudags og þeim lýkur með með formlegri opnun smábátabryggjunnar á sunnudaginn.

Sigríður Inga vill hvetja Skagfirðinga til virkrar þátttöku. Hún segir alltaf vera eitthvað um að menn bjóði upp á heitar lummur og hvetur fleiri til að gera það, og hengja hvítar blöðrur á hús sín til auðkenningar. „Svo hvet ég fólk til að missa sig í skreytingum, en þær hafa verið bæði miklar og skemmtilegar. Veðurspáin er góð, enda er ekki til vont veður heldur frekar illa búið fólk. Ég óska öllum gleðilegra lummudaga,“ sagði Sigríður Inga „lummustýra“ að lokum.

Meðal tónlistarfólks sem fram kemur á Lummudögum eru Hreindís Ylfa og drengirnir hennar, Ingunn Kristjáns og Reynir Snær, og hin þekkta hljómsveit úr Túnahverfinu, Úlfur Úlfur.

Dagskrá Lummudaga:

Fimmtudagur 27. júní

Kl. 18:00 Fjör í Litlaskógi (upp við “sundlaugina”)

Leikir

Útieldun

Fiskisúpa kl. 19:00

Tónlistaratriði

Föstudagur 28. júní

Kl. 10 - 11 Lummukaffi hjá Leikskólanum Ársölum yngra stig

Krakkarnir á yngri stigi Ársala bjóða foreldrum/forráðamönnum í lummukaffi

Kl. 14 - 15 Lummukaffi hjá Leikskólanum Ársölum eldra stig

Krakkarnir á eldra stigi Ársala bjóða foreldrum/forráðamönnum í lummukaffi

Kl. 15:00 Sápufótboltamót í Ártúni

Kl. 19:00 Götugrill

Kl. 20:00 Villtir svanir og tófa (Húsið opnar kl. 20:00)

-          Tónleikar í Bifröst – Fjöldi hljómsveita koma fram

Laugardagur 29. júní

Kl. 09:00 Árnahlaup start á íþróttavellinum

Þeir sem vilja ganga 17,6 km.

-          Árnahlaup er á Facebook

Kl. 13 – 17 Götumarkaður – Lifandi tónlist

Úlfur Úlfur,

Hljómsveit Hreindísar Ylfu,

Ingunn Kristjáns og Reynir Snær og fl.

GÆRAN kynnir listamenn sem koma fram á hátíðinni

Bílaklúbbur Skagafjarðar verður með kassabílarallý.

Og margt fleira í boði.

Kl. 21:00 Hreindís Ylfa og hljómsveit með tónleika í Bifröst

Kl. 23:00 Mælifell dansleikur

Paparnir leika fyrir dansi.

Sunnudagur 30. júní

Kl. 13:00 Nýja smábátahöfnin formlega tekin í notkun

Alla daga: Gallerý Lafleur – Ýmsar uppákomur

Opið 12 – 22.