Þórsarar sterkari á endasprettinum
Tindastólsmenn héldu suður í Þorlákshöfn í gær og léku við lið Þórs í Dominos-deildinni í körfubolta. Leikurinn var jafn og spennandi en það voru heimamenn sem náðu ágætu forskoti á lokamínútunum og þrátt fyrir að Stólarnir næðu í skottið á þeim þá höfðu Þórsarar sigur, 97-95.
Jafnræði var með liðunum frá byrjun en heimamenn voru þó yfirleitt með yfirhöndina. Helgi Margeirs kom Stólunum þó yfir, 19-20, með 3ja stiga körfu en Helgi var að hitta vel í leiknum, gerði sex 3ja stiga körfur í 11 tilraunum. Þór var yfir 25-24 að loknum fyrsta leikhluta og liðin skiptust síðan á um að hafa forystuna í öðrum leikhluta. Stólarnir náðu góðum kafla undir lokin, komust í 41-48, en 3ja stiga karfa frá Tómasi Tómassyni lagaði stöðuna fyrir Þór. 44-48 í hálfleik.
Þórsarar náðu 12-2 kafla í upphafi síðari hálfleiks og voru síðan yfir, 64-56, um miðjan leikhlutann. Helgi náði þá að setja tvo þrista í með skömmu millibili og Lewis, sem átti mjög góðan leik, jafnaði 64-64. Staðan fyrir fjórða leikhluta var 72-72 og allt í járnum. Lítið gekk hjá Tindastólsmönnum í byrjun leikhlutans og Þórsarar breyttu stöðunni úr 74-74 í 86-75 þegar rúmar fimm mínútur voru eftir. Strákarnir náðu að saxa á forskot heimamanna og þegar 1:15 var eftir jafnaði Lewis leikinn með vítaskotum, 91-91. Vincent Sanford svaraði með 3ja stiga körfu og Stólarnir náðu ekki að brúa bilið það sem eftir lifði leiks.
Tindastóll náði ekki upp almennilegum varnarleik í gærkvöldi og því fór sem fór. Reyndar var munurinn á liðunum svo lítill að hægt er að benda á að munurinn liggi í dapri vítanýtingu Stólanna sem slagaði þó hátt í 70% að þessu sinni. Þá munar um minna þegar Pétur er ekki að finna sig en hann setti aðeins niður eitt af fjórtán skotum sínum í leiknum. Bestur í liði Stólanna var Darrel Lewis en hann gerði 32 stig og tók 14 fráköst. Helgi Margeirs gerði 21 stig og var sjóðheitur þó ekki hefði gengið að bora niður þristi í blálokin. Dempsey var kominn með tvær villur eftir rúmar tvær mínútur og spilaði minna en oft áður en hann gerði 18 stig. Helgi Viggós var með fimm stig í gær og sjö stoðsendingar.
Hjá heimamönnum voru Tómas (24), Grétar Erlendsson (20/9) og Vincent Sanford (20) atkvæðamestir.
Það er skammt stórra högga á milli hjá Stólunum því að á morgun mæta strákarnir Snæfelli í Stykkishólmi í 8 liða úrslitum bikarkeppninnar og nk. fimmtudag mæta hinir ósigrandi KR-ingar í Síkið. Áfram Tindastóll!
Stig Tindastóls: Lewis 32, Helgi Margeirs 21, Dempsey 18, Flake 8, Svavar 6, Helgi Viggós 5, Ingvi 2, Pétur 2 og Hannes 1.
Fleiri fréttir
-
Varmahlíðarskóli endaði í 3ja sæti í Skólahreysti
feykir.is Skagafjörður, Austur-Húnavatnssýsla, Íþróttir, Vestur-Húnavatnssýsla, Lokað efni 25.05.2025 kl. 22.55Í gærkvöldi fór fram æsispennandi úrslitakeppni í Skólahreysti og í tólf skóla úrslitum áttu tveir skólar á Norðurlandi vestra sína fulltrúa; Grunnskóli Húnaþings vestra og Varmahlíðarskóli. Bæði lið stóðu sig frábærlega og Varmhlíðingar gerðu sér lítið fyrir og náðu besta árangri sínum í Skólahreysti frá upphafi, lentu í þriðja sæti og Húnvetningar voru sæti neðar en með jafn mörg stig.Meira -
Ekki vika sem haldið verður upp á hjá UMFT
feykir.is Skagafjörður, Íþróttir, Lokað efni 25.05.2025 kl. 18.58Sandgerðingar komu í heimsókn á Krókinn í gær og öttu kappi við lið Tindastóls í 3. deild karla í knattspyrnu. Því miður urðu heimamenn að sætta sig við 0-1 tap og eru nú ásamt gestunum um miðja deild eftir tvö svekkjandi töp.Meira -
Axel Íslandsmeistari í pílu í U18 flokki stráka
feykir.is Skagafjörður, Íþróttir, Lokað efni 24.05.2025 kl. 18.08Það fór þó aldrei svo að Axel Arnarsson yrði ekki Íslandsmeistari í vikunni. Í dag varð hann fyrsti Íslandsmeistari Pílukastfélags Skagafjarðar þegar hann sigraði í U18 flokki stráka en fyrr í vikunni munaði mjóu að hann yrði Íslandsmeistari í körfuknattleik með meistaraflokki Tindastóls.Um var að ræða Íslandsmót ungmenna í pílu sem fram fór á Bullseye í Reykjavík.Meira -
Fann þegar hún var skiptinemi á Ítalíu hvað tónlist getur verið mikll félagi / VIGDÍS HAFLIÐA
feykir.is Vestur-Húnavatnssýsla, Tón-Lystin, Lokað efni 24.05.2025 kl. 17.27Það fer ekkert alltaf allt eins og planað er þrátt fyrir góðan vilja. Þannig til dæmis ætlaði snillingurinn sem hún Vigdís Hafliðadóttir er að svara Tón-lystinni og nokkrum spurningum um ferminguna í tíma fyrir útgáfu Fermingar-Feykis. En svo togar lífið í nokkra spotta og tíminn flýgur út i tómið. Vigdís var engu að síður harðákveðin í því að bregðast Feyki ekki og eftir þétta vinnutörn stökk hún í að klára að svara.Meira -
Heimavöllur Húnvetninga heldur áfram að gefa
feykir.is Austur-Húnavatnssýsla, Íþróttir, Vestur-Húnavatnssýsla, Lokað efni 24.05.2025 kl. 17.15Lið Kormáks/Hvatar og Kára frá Akranesi mættust í fjórðu umferð 2. deildar karla í knattspyrnu á Blönduósi í dag. Liðin höfðu mæst fjórum sinnum áður og jafnan verið hart barist og alls kyns óvænt atvik litað leiki liðanna. Eitt mark dugði þó til að fá fram hagstæð úrslit fyrir Húnvetninga og 1-0 sigur staðreynd.Meira
