Tvær matskeiðar af volgu lýsi á hverjum degi til 12 ára aldurs - Elsti núlifandi Skagfirðingurinn
Jakobína Ragnhildur Valdimarsdóttir varð 99 ára gömul þann 2. ágúst síðastliðinn. Samkvæmt heimildum Feykis er hún elsti núlifandi Skagfirðingurinn. Bína, eins og hún er jafnan kölluð, féllst á að svara nokkrum spurningum frá Feyki.
Bína er næst yngst af níu systkinum. Foreldrar þeirra voru Valdimar Jónsson og Guðrún Ólafía Frímannsdóttir á Sauðárkróki. Guðrún lést hins vegar úr berklum þegar Bína var eins árs og var hún send í fóstur til Maríusar Pálssonar og Jakobínu Jóhannsdóttur.
Maki Bínu var Valgarður Björnsson, Valli, en hann lést árið 2000. Saman eignuðust þau fimm börn, fjögur þeirra komust á legg en næst elsta dóttir þeirra lést 3ja ára vegna hjartagalla. Í dag á Bína 66 afkomendur.
Heilsa Bínu er nokkuð góð. Heyrnin er þó aðeins farin að slappast en sjónin er upp á tíu. Hún býr ennþá ein í tveggja hæða húsi á Skagfirðingabrautinni og sér að mestu um sig sjálf þó að unga fólkið í kringum hana rétti henni hjálparhönd af og til við ýmsa hluti. Er hún þeim mjög þakklát fyrir það.
Bína segist ekki sjá mikinn mun á unga fólkinu í dag og þegar hún var ung. Í dag tíðkast þó ekki að konur séu heimavinnandi og að karlarnir sjái um að framfleyta fjölskyldunni en þannig var það í hennar tilfelli. Hún vann aldrei utan heimilisins eftir að hún gifti sig og eignaðist börn. Fram að því hafði hún verið í síld á sumrin. Henni finnst fólk verða langlífara í dag en áður og algengara sé að fólk nái 100 ára aldri og yfir. Þegar hún var ung hafi fólk um sjötugt verið eldgamalt þó það sé fólk á besta aldri í dag.
Ástandið í heiminum í dag finnst henni hræðilega sorglegt. Hún segist ekki muna eftir að hafa upplifað svona tíma áður. Henni finnst Þórólfur, Víðir og Alma hafa unnið mjög vel að þessu og segir að við getum ekki annað en verið ánægð með þeirra störf, dugnað og þolinmæðina í þeim. Við séum mun betur stödd heldur en margar aðrar þjóðir.
Langlífinu vill hún þakka móður sinni sem var dugleg að gefa henni lýsi, 2 matskeiðar á hverjum degi þar til hún varð tólf ára. Þá sagði hún stopp og lét nægja að taka eina matskeið upp frá því. Bína minnist þessara stunda með hryllingi því lýsið hafi verið volgt þar sem það var geymt á borði bak við hurð.
Feykir sendi Bínu síðbúnar afmælis- og árnaðaróskir og vonar að hún hafi átt góðan afmælisdag.
/SHV
Fleiri fréttir
-
Skákmótið Húnabyggð Open 2025
feykir.is Skagafjörður, Austur-Húnavatnssýsla, Íþróttir, Vestur-Húnavatnssýsla, Lokað efni 16.06.2025 kl. 09.15Huni.is segir frá því að á föstudaginn 20. júní verður haldið skákmótið Húnabyggð open sem er í tengslum við skákhátíðina sem stendur yfir á Blönduósi og lýkur þann 21. júní. Enn er hægt að skrá sig til leiks.Meira -
Víðismenn í vandræðum á Blönduósi
feykir.is Austur-Húnavatnssýsla, Íþróttir, Vestur-Húnavatnssýsla, Lokað efni 15.06.2025 kl. 16.24Það var spilað á Blönduósvelli í gær við fínar aðstæður en þá tóku heimamenn í Kormáki/Hvöt á móti liði Víðis í Garði. Liðin voru bæði í neðri hluta 2. deildar en Húnvetningar með einu stigi meira og leikurinn því mikilvægur fyrir bæði lið. Það fór svo að Húnvetningar voru sterkara liðið og unnu sanngjarnan 2-0 sigur og komu sér enn á ný upp í efri hluta deildarinnar.Meira -
Uppskriftir að hætti Jóhanns Daða
feykir.is Skagafjörður, Í matinn er þetta helst 15.06.2025 kl. 10.00Jóhann Daði er 24 ára Skagfirskur viðburðastjóri, fæddur og uppalinn á Sauðárkróki. Foreldrar hans eru Gísli Sigurðsson og Lydía Ósk Jónasdóttir. Jóhann býr fyrir sunnan, nánar tiltekið í Kópavogi, og vinnur sem sölumaður hjá Sýn. Jóhann spilar knattspyrnu með Tindastól og er trommuleikari í þeirri víðfrægu hljómsveit Danssveit Dósa.Meira -
Níu marka veisla á Sauðárkróksvelli
feykir.is Skagafjörður, Íþróttir, Lokað efni 14.06.2025 kl. 21.17Það var leikið í 3. deildinni í knattspyrnu á Króknum í dag en þá tóku Stólarnir á móti liði Árbæjar í áttundu umferð. Liðin voru bæði um miðja deild en gestirnir þó ofan við miðlínuna en Stólarnir neðan hennar. Eftir nokkurt ströggl síðasta mánuðinn þá sýndu heimamenn sparihliðarnar og rúlluðu gestunum upp eins og gómsætri vöfflu með rjóma og rabarbarasultu. Lokatölur 7-2 og allt í gúddi.Meira -
Vel heppnuð vinnustofa um íþróttir fatlaðra
feykir.is Skagafjörður, Íþróttir, Mannlíf, Lokað efni 14.06.2025 kl. 20.04Í byrjun mánaðar héldu Ungmennasamband Skagafjarðar (UMSS), Svæðisstöðvar íþróttahéraða og Íþróttasamband fatlaðra (ÍF) sameiginlega vinnustofu um íþróttir fyrir fatlaða á Sauðárkróki. Vinnustofan var fyrir foreldra, forsjáraðila, íþróttaþjálfara, starfsfólk skóla og áhugafólk um íþróttir í sveitarfélaginu. „Vinnustofan var vel sótt og greinilegt að mikil þörf var á þessum viðburði. Miklar og góðar umræður sköpuðust um íþróttir fatlaðra í Skagafirði. Það verður gaman að vinna úr þeim punktum sem fram komu og koma þeim í farveg,“ segir Halldór Lárusson, svæðisfulltrúi íþróttahéraða á Norðurlandi vestra.Meira
