Fréttir

Mjólkursamlag KS átti 80 ára afmæli á síðasta ári, en vinnsla hófst hjá samlaginu, sem þá var staðsett sunnan við Gránu, í júlí árið 1935. Af því tilefni færði Kaupfélag Skagfirðinga Snorra Evertssyni, fyrrum samlagsstjóra, virðingarvott fyrir starf hans í þágu mjólkurvinnslu í Skagafirði. Snorri, sem er Skagfirðingur að uppruna, ættaður frá Stóru-Gröf í fyrrum Staðarhreppi, hafði þá nýlega látið af störfum eftir nærri 50 ára starf við samlagið. Í tilefni þessa ræddi blaðamaður Feykis við hann um starfsferilinn og sögu samlagsins, einkum þróun mjólkurvinnslu eftir að hann hóf störf árið 1959, þá 14 ára gamall.

Á Ströndum og Norðurlandi vestra er austan 8-13 m/s og rigning eða slydda með köflum. Hiti 1 til 8 stig. Víða eru hálkublettir eða hálka á vegum. Þá má búast við umferðatöfum í Strákagöngum vegna vinnu við endurbætur á rafkerfi. Vegfarendur eru beðnir að sýna tillitssemi og virða hraðatakmarkanir.

Byggðarráð Svf. Skagafjarðar vill ítreka mikilvægi neyðarbrautar Reykjavíkurflugvallar (Flugbraut 06/24) fyrir hinar dreifðu byggðir landsins. Í fundargerð frá 14. janúar sl. segir að tvö nýleg dæmi af Norðurlandi vestra, þar sem koma þurfti alvarlega slösuðum einstaklingum undir læknishendur í Reykjavík, sanna svo ekki verður um villst mikilvægi brautarinnar. Í báðum tilvikunum þurfti sjúkraflugvél Mýflugs að lenda á umræddri braut þar sem aðrar brautir voru ekki í boði.

Boðað er til opins fundar í Tjarnarbæ laugardaginn 23. janúar kl. 11:00 þar sem formaður stjórnar Landssambands hestamannafélaga, Lárus Ástmar Hannesson og Áskell Heiðar Ásgeirsson framkvæmdastjóri Landsmóts hestamanna á Hólum munu ræða undirbúning mótsins.

Það vill svo skemmtilega til að bóndadagurinn er á morgun. Á þessum degi hefur skapast sú hefð að eiginkonur/kærustur gefi bónda sínum blóm í tilefni dagsins. Gjafirnar hafa reyndar breyst mikið seinust ár og hugmyndaflugið hefur fengið að njóta sín hjá mörgum þegar kemur að því að velja eitthvað fyrir sinn heittelskaða.

Paradís, lag Steins Karasonar og texta má nú heyra og sjá á vimeo. Lagið er óður til Íslands og íslenskrar náttúru, með ástar og kærleiksívafi. Það er ljósmyndarinn Marco Nescher sem myndskreytti af mikilli snilli.

Samkvæmt verðlagseftirliti ASÍ er skóladagvistun, með hressingu og hádegismat, ódýrust hjá Sveitarfélaginu Skagafirði en það er 56% ódýrara en hjá Garðabæ, sem er með dýrustu skóladagvistunina. Þriggja tíma dagleg vistun eftir skóla ásamt síðdegishressingu og hádegismat í 21 dag er á 35.745 kr. hjá Garðabæ en 22.953 kr. hjá Svf. Skagafirði. Greint er frá þessu á vef ASÍ.

Söfnun Birgit Kositzke, kanínubónda til bjargar búi sínu Syðri-Kárastöðum í Húnaþingi vestra, lauk á Karolina Fund þann 15. janúar síðastliðinn. Birgit lagði upp með að safna 3000 evrum en niðurstaðan var að 4.819 evrur söfnuðust, tæp 700 þúsund, en 91 aðili lét fé af hendi rakna. Rætt er við Birgit á Dv.is.

Sala á tjaldstæðum með rafmagnstengingum á Landsmóti hestamanna á Hólum 2016 er hafin. Samkvæmt vef Landsmótsins er um að ræða afmarkaða reiti, 7x10 metrar að stærð og hverjum reit fylgir ein rafmagnsinnstunga. Allir gestir mótsins hafa aðgang að almennum tjaldstæðum mótsins, en þar verður ekki hægt að bjóða upp á rafmagnstengi.

Nes listamiðstöð býður í svokallað „potluck“ fimmtudagur 21 janúar, kl. 18:30-20:30. Þar gefst gullið tækifæri til þess að hitta þá listamenn sem dvelja á Skagaströnd í janúar, sjá listsköpun þeirra og hvernig umhverfið hefur áhrif á verk þeirra.