Fréttir

Stólastúlkan Margrét Rún Stefánsdóttir hefur skrifað undir þriggja ára samning við Gróttu sem teflir fram liði í 1. deild kvenna. Margrét kom upp í gegnum unglingastarfið hjá Tindastóli en hún er fædd árið 2005. Margrét er efnilegur markmaður sem á að baki fjóra landsleiki með U16 og U17 ára landsliði Íslands.

Vinna við lagningu neysluvatnslagnar frá Hvammstanga að Laugarbakka til að leysa vatnsskort sem þar hefur ítrekað verið að koma upp hefur staðið yfir frá því í sumar. Í frétt á vef Húnaþings vestra er sagt frá því að nú hefur vatni loks verið hleypt á lögnina.

Í tilkynningu frá Skagafjarðarveitum beina þeir þeim tilmælum til notenda hitaveitu á Sauðárkróki að fara sparlega með heita vatnið. Nú er mjög kalt og mikil vindkæling og útlit fyrir kulda áfram næstu daga og þess verður vart á stöðu heita vatnsins.

Þrír keppendur frá UMSS kepptu á Meistaramóti Íslands 15-22 ára sem fram fór um helgina í Laugardalshöllinni í Reykjavík. Á síðu frjálsiþróttadeildar Tindastóls segir að keppendurnir þrír voru þau Halldór Stefánsson, Katelyn Eva John og Súsanna Guðlaug Halldórsdóttir.

RARIK var með níu jarðstrengsverkefni með samtals 123 km af strengjum á Norðurlandi á síðasta ári en þetta kemur fram í yfirferð um verkefni ársins 2023 á heimasíðu RARIK. Sjö verkefnum er þegar lokið en þar af voru þrjú hér á Norðurlandi vestra; í Hrútafirði, Miðfirði og Fitjárdal.

Það ráku örugglega margir upp stór augu í gær þegar markamaskínan Murielle Tiernan, sem leikið hefur með liði Stólastúlkna í fótboltanum síðustu sex tímabil með einstökum árangri, sendi stuðningsmönnum kveðju á Facebook og þakkaði fyrir frábæran tíma á Króknum. Feykir hafði samband við Murr í dag og spurði hvað kæmi til að hún yrði ekki lengur í herbúðum Tindastóls líkt og flestir hafa sennilega óskað sér.

Eftir stillt veður síðustu daga snýr veturkonungur aðeins upp á sig í nótt og á morgun. Spáð er 10-18 m/sek á morgun og ef nebba er stungið út fyrir dyrakarm má berlega finna að blástur er þegar hafinn. Norðanáttinni fylgir lítilsháttar snjókoma á svæðinu en bæði vindur og éljagangur gengur niður á miðvikudagsmorgni.

Áfram halda vendingar hjá Bestu deildar liði Tindastóls í fótboltanum. Nú hefur knattspyrnudeild Tindastóls sent frá sér fréttatilkynningu þar sem segir að Murielle Tiernan hafi samið við Fram um að spila með þeim bláhvítu í 1.deildinni á komandi tímabili. Það verður mikill sjónarsviptir af Murr en hún hefur skorað 117 mörk í 129 leikjum fyrir Stólastúlkur síðustu sex árin.

Á upphafsdögum janúarmánaðar var sagt frá því að undirrituð hefði verið viljayfirlýsing um byggingu átta íbúða fyrir 60 ára og eldri við Flúðabakka á Blönduósi. Nú liggur fyrir að kynna verkefnið fyrir fólki og verður opinn fundur haldinn í Félagsheimilinu á Blönduósi fimmtudaginn 18. janúar klukkan 20:00.

Keppni í 1. deild kvenna í körfunni harðnar enn og baráttan á toppnum stefnir í eitthvað sögulegt. Í kvöld lék lið Tindastóls við Ármann í Laugardalshöllinni en liðin eru bæði í bullandi séns með sæti í Subway-deildinni næsta haust. Stólastúlkur höfðu ekki tapað leik í deildinni síðan 15. október en í kvöld reyndust heimastúlkur sterkari á lokakaflanum og hirtu stigin sem í boði voru. Lokatölur 71-64.