Fréttir

Í tilefni 40 ára afmælis Feykis var Björn Jóhann Björnsson, blaðamaður og aðstoðarfréttastjóri á innlendri fréttadeild Morgunblaðsins, beðinn um að rifja upp sín Feykisár þar sem farsæll blaðamannaferill hans hófst til skýjanna eftir góðan undirbúning við Molduxa, skólablað Fjölbrautaskólans. Björn Jóhann brást vel við bóninni eins og hægt er að lesa hér á eftir.

Ég vil byrja á að þakka vinkonu minni, fyrrum nágranna á Sauðárkróki og frænku, Önnu Elísabetu Sæmundsdóttur fyrir að skora á mig – eða ekki. Ég sagði óvart strax „já“ þegar hún bað mig um að taka við keflinu, enda hef ég alltaf verið svo hlýðin… og löghlýðin, sem tengist að einhverju leyti því efni sem ég skrifa um hér að neðan.

Sveitarstjórnir Blönduósbæjar, Húnavatnshrepps, Skagabyggðar og Sveitarfélagsins Skagastrandar skipuðu samstarfsnefnd til að kanna hvaða áhrif sameining sveitarfélaganna myndi hafa á rekstur og þjónustu sveitarfélaganna og hlaut verkefnið nafnið „Húnvetningur“ en allar upplýsingar um verkefnið er hægt að nálgast á samnefndri heimasíðu þess. Í samstarfsnefnd sitja tveir fulltrúar hverrar sveitarstjórnar, auk framkvæmdastjóra sveitarfélaganna og er formaður verkefnishópsins Jón Gíslason, oddviti sveitarstjórnar Húnavatnshrepps.

Lið Kormáks Hvatar spilaði fyrsta leikinn í D-riðli 4. deildar um liðna helgi en þá mættu þeir liði Léttra á Hertz-vellinum í Breiðholtinu. Áður en keppni hófst sendi Feykir nokkrar spurningar á Ingva Rafn Ingvarsson sem tók við þjálfun liðsins nú á vordögum eftir smá sviptingar á þjálfaramarkaðnum. Hann segir lið sitt fara fullt sjálfstrausts og tilhlökkunar inn í sumarið.

Dagana 18. og 19. Maí voru haldnir íbúafundir á Blönduósi og Skagaströnd vegna sameiningar sveitarfélagana í austur Húnavatnssýslu. Um 20 manns sóttu fundinn á Blönduósi sem haldinn var í félagsheimilinu þar og um 35 fundinn á Skagaströnd, en hann fór fram í Fellsborg. Fundunum var einnig streymt beint á netið, en um 120 manns fylgdust með báðum fundunum þar.

Byggðarráð hefur samþykkt að fela sveitastjóra að kanna, með aðstoð lögmanns, bótagrundvöll og móta kröfugerð gagnvart þeim sem bera ábyrgð á tjóninu.

Vinnslustöðin, FISK Seafood og VÍS hafa hrundið af stokkum átaksverkefni sem ætlað er að beina kastljósum að öryggismálum á skipum fyrirtækjanna og skerpa á vitund og árvekni skipverja í þeim efnum. Verkefnið hófst mánudaginn 10. maí og stendur yfir í fimm vikur.

Þriðji leikurinn í einvígi Keflavíkur og Tindastóls fer fram í Keflavík á laugardag og hefst kl. 17:00. Keflvíkingar hafa unnið báða leikina hingað til og eiga möguleika á að sópa Stólunum út úr úrslitakeppninni en eflaust ætla strákarnir okkar að selja sig dýrt. Feykir lagði nokkrar spurningar fyrir Baldur Þór Ragnarsson þjálfara Tindastóls sem bendir stuðningsmönnum Stólanna á að gefast ekki upp. „Það er alltaf möguleiki á comebacki.“

Þriðjudaginn 18. maí síðastliðinn var haldið uppá alþjóðlega safnadaginn víðsvegar um allt land. Þema safnadagsins 2021 var; Framtíð safna, uppbygging og nýjar áherslur. Söfn voru hvött til að nota rafrænar lausnir við að miðla fróðleik og vera virk á samfélagsmiðlum. Byggðasafnið í Glaumbæ tók að sjálfsögðu þátt.

Sýningar Leikfélags Sauðárkróks á Á frívaktinni fara af stað á ný eftir tveggja vikna Covid-pásu en eftir mikið púsl og skipulagspælingar á æfingatímabilinu náðist að frumsýna þann 7. maí sl. Daginn eftir fór allt í baklás á Sauðárkróki eftir hópsmit og fór svo að Regína Gunnarsdóttir, ein þeirra sem sminkar leikarana, endaði í sóttkví og síðar í einangrun vegna smits. Í gær fékk hún heimsókn leikara og starfsfólks sýningarinnar sem sungu fyrir utan heimili hennar.