Kveður sunddeildina eftir 12 ára starf
„Hún er sunddeildin“ er oft sagt um Þorgerði Þórhallsdóttur, sundþjálfara og fráfarandi formann sunddeildar Tindastóls. Enda ekki skrýtið þar sem hún hefur lagt mikla vinnu í deildina og byggt hana upp síðustu ár. Þorgerður lét af störfum nýverið sem formaður deildarinnar og hefur smám saman verið að draga sig út úr sundstarfinu, enda búin að vera „kúturinn og korkurinn“ í deildinni síðustu 12 árin.
„Þetta var bara orðið ágætt og kominn tími til að snúa sér að öðru“ segir Þorgerður um brotthvarf sitt frá sundinu. Þegar hún tók við deildinni voru sjö ungmenni að æfa sund og var markmiðið hjá henni að fjölga iðkendum og efla sundstarfið. Það tókst svo sannarlega því nú, þegar hún hættir, æfa 35 krakkar frá 1. – 8. bekk. Þegar mest lét voru 44 iðkendur spriklandi í lauginni. Að hennar sögn hefur það haft óneitanlega mikil áhrif að sundlaugin hafi verið lokuð svona lengi vegna framkvæmda, eða rúmlega átta mánuði veturinn 2018 – 2019, og að margir hafi ekki haldið áfram í íþróttinni eftir að hún opnaði aftur. „En það er alveg frábært fyrir deildina að mæta aftur til leiks eftir breytingar og aðstaðan hefur batnað til muna“ segir hún og finnst spennandi að fylgjast með uppbyggingunni á næstunni á aðstöðu sundiðkenda, hvort sem þeir æfa eða ekki.
Þorgerður byrjaði sem tengiliður á milli foreldra og stjórnar þegar Sigrún Þóra dóttir hennar, hóf að æfa sund, 6 ára gömul. Síðan þróuðust hlutirnir þannig að hún var kosin í stjórn og var sjálf farin að þjálfa. „Smám saman jókst starf deildarinnar og hópurinn stækkaði. Krakkarnir voru duglegir að æfa, voru með alls konar fjáraflanir, við fórum á mörg sundmót og æfingarferðir, t.d. í Hofsós, Blönduós og Varmahlíð. Hápunkturinn má segja að hafi verið þegar deildin fór í æfingaferð til Spánar árið 2017. Það var æðislegt að komast út með krakkana og sjá þá blómstra við frábærar aðstæður til sundiðkunar,“ segir Þorgerður um ferðina og vonast til að deildin komist aftur út síðar.
Síðastliðinn fimmtudag, 11. júní, var svo loksins haldið sundmót í Sundlaug Sauðárkróks eftir langt hlé. Um 23 keppendur voru skráðir til leiks að viðstöddum foreldrum og öðrum aðstandendum. Að móti loknu var öllum boðið til uppskeruhátíðar í Húsi frítímans þar sem boðið var upp á pizzur og meðlæti og verðalaunaafhending fór fram. Krakkarnir stóðu sig frábærlega og mega vera stolt af frammistöðu sinni á mótinu. Æfingar vetrarins hafi skerst vegna COVID en þrátt fyrir það hafi flestir verið tilbúnir til að synda.
Stjórn, iðkendur og nýir þjálfarar komu Þorgerði heldur betur á óvart að verðlaunaafhendingu lokinni þar sem henni voru færð blóm og gjafir í þakklætisskyni fyrir vel unnin störf. Hún segir ganga sátt frá starfinu og hlakki til að sjá deildina halda áfram að stækka og dafna undir stjórn nýrrar stjórnar og þjálfara. Einnig hvetur hún sem flesta krakka til að mæta í laugina í haust þegar æfingar hefjast aftur. „“Sund er skemmtileg og heilsueflandi íþrótt og er fyrir alla“ segir Þorgerður að lokum og þakkar kærlega fyrir sig. /SHV
Fleiri fréttir
-
Umhverfisdagur FISK Seafood 2024
feykir.is Skagafjörður, Austur-Húnavatnssýsla, Vestur-Húnavatnssýsla, Fréttir 20.04.2024 kl. 00.12Umhverfisdagur FISK Seafood verður haldinn 4. maí nk. frá klukkan 10-12. Áætlað er að tína rusl á strandlengjunni á Sauðárkróki (sem verður skipt upp í svæði), Nöfunum, í Varmahlíð, á Hólum og á Hofsósi. Frá 12:15 mun FISK Seafood bjóða öllum þátttakendum að þiggja veitingar að Sandeyri 2.Meira -
Ævintýrið úti hjá liði Tindastóls
feykir.is Skagafjörður, Íþróttir 19.04.2024 kl. 23.34Strax í haust voru bara þrjú hjól undir bíl meistara Tindastóls og eftir það var nánast sama hvaða hindrun varð á vegi hans, það varð allt til að hægja ferðina. Hann hökti reyndar inn í bikarúrslit og í úrslitakeppnina þó með naumindum væri. Stólakagginn sem allir biðu eftir að hrykki í gírinn, kæmi sterkur inn á endasprettinum, var eiginlega hálf vélarvana allt tímabilið. Leikurinn í Smáranum í kvöld var reyndar góður en enn og aftur voru Stólarnir sjálfum sér verstir. Lokakarfan var Grindvíkinga og hún skipti sköpum – lokastölur 91-89. Stólarnir því snemma í sumarfrí þennan veturinn og kannski allir fegnir – þessi bíll þarf í allsherjar yfirhalningu.Meira -
Gul viðvörun á Norðurlandi vestra
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 22.24Veðurstofan hefur smellt á okkur gulri veðurviðvörun mest allan laugardaginn og fram á aðfaranótt sunnudags. Gert er ráð fyrir ört hækkandi hita og því má búast má við miklum leysingum, auknu afrennsli og vatnavöxtum í ám og lækjum. Mikilvægt er að hreinsa frá niðurföllum til að forðast vatnstjón vegna rigningar og leysingavatns. Gula viðvörunin gildir fyrir Vestfirði og allt Norðurland.Meira -
Venju samkvæmt er Stólastúlkum spáð falli
feykir.is Skagafjörður, Íþróttir 19.04.2024 kl. 15.44Það eru nokkrir fjölmiðlar sem spá fyrir tímabilið í Bestu deild kvenna í knattspyrnu og jafnan er liði Tindastóls spáð falli, ýmist 9. eða 10. sæti. Í árlegri spá fyrirliða, þjálfara og forráðamanna er liðinu spáð níunda sæti en liði Keflavíkur því neðsta. Íslandsmeisturum Vals er aftur á móti spáð titlinum og Blikum öðru sæti. Grönnum okkar í Þór/KA er síðan spáð þriðja sætinu.Meira -
Við erum ótrúlega rík af fólki | LS Lulla í spjalli
feykir.is Skagafjörður, Listir og menning, Mannlíf 19.04.2024 kl. 14.40„Litla hryllingsbúðin er skemmtilega fjölbreytt verk með miklum söng og er skemmtileg dramatísk hrollvekja,“ segir Sigurlaug Dóra Ingimundardóttir (Lulla), formaður Leikfélags Sauðárkróks, þegar Feykir spyr hana hvað hún geti sagt um Sæluvikustykki LS þetta árið. Æfingar standa nú yfir en frumsýnt verður í Bifröst á Sauðárkróki sunnudaginn í Sæluviku en samkvæmt áreiðanlegum heimildum Feykis er hér um að ræða 146. sýningu Leikfélags Sauðárkróks frá því það var endurvakið árið 1941.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.