Ótrúlega öflug liðsheild og samstaða einkenna liðið
Það hefur ekki farið framhjá mörgum að kvennalið Tindastóls tryggði sér sæti í efstu deild kvennaboltans næsta sumar með því að vinna í gær sinn þrettánda sigur í Lengjudeildinni. Þar með varð ljóst að lið Keflavíkur og Hauka gætu ekki bæði komist upp fyrir lið Tindastóls í toppbaráttu deildarinnar. Aldrei fyrr í sögu Umf. Tindastóls hefur félagið átt lið í efstu deild fótboltans og því rétt að heyra aðeins í öðrum þjálfara liðsins, Guðna Þór Einarssyni, sem segir tilfinninguna í leikslok hafa verið hreint ólýsanlega.
„Að fá að taka þátt í að koma uppeldisfélaginu sínu upp í efstu deild eru hrein og tær forréttindi,“ segir Guðni Þór sem er 32 ára gamall Króksari en hann þjálfar liðið í félagi við Jón Stefán Jónsson sem er 38 ára gamall Akureyringur. „Fyrst og fremst er ég alveg ótrúlega stoltur af hópnum sem setti sér þetta stóra markmið strax eftir síðasta tímabil og hefur unnið markvisst að því að láta þennan draum rætast. Það sem er svo einkennandi fyrir liðið er þessi ótrúlega öfluga liðsheild og samstaða, ekki bara innnan leikmannahópsins heldur þeim fjölmörgu sem hafa starfað og stutt við liðið í sumar.“
Guðni segir að árangur stelpnanna í sumar komi alls ekki af sjálfu sér. „Grunnurinn var lagður í yngri flokka starfi síðustu ár sem skilar góðum leikmönnum upp í meistaraflokk. Þar verð ég að nefna Guðjón Örn, Vönda Sig og Dúfu sem byrjuðu að leggja þennan góða grunn. Hugarfar og þrotlaus vinna skilar svo leikmönnum ennþá lengra og nú fá þær að upplifa drauminn að spila meðal bestu leikmanna Íslands.“
Hann þakkar öllum stuðningsmönnum fyrir ómetanlegan stuðning. „Ykkar stuðningur á risastóran þátt í að liðið sé komið á þann stað sem það er í dag. Við erum hvergi nærri hætt, við ætlum okkur að vinna síðustu þrjá leikina og tryggja okkur efsta sætið í deildinni og taka á móti bikarnum þann 9. október,“ segir Guðni og bætir við í lokin: „Til hamingju við öll. Áfram Tindastóll!“
Tindastóll mætir liði Hauka nk. sunnudag á Sauðárkróksvelli en það er næstsíðasti leikur liðsins á heimavelli á þessu tímabili. Það er um að gera að nýta tækifærið, mæta á völlinn, hvetja stelpurnar til sigurs og óska þeim til hamingju með einstakan árangur.
Fleiri fréttir
-
Alvarleg vanræksla á nautgripum kærð til lögreglu
feykir.is Skagafjörður, Austur-Húnavatnssýsla, Vestur-Húnavatnssýsla 19.04.2024 kl. 10.05Í tilkynningu á vef Matvælastofnunar er greint frá því að MAST hafi kært til lögreglu alvarlega vanrækslu eftir að 29 nautgripir fundust dauðir í gripahúsi við eftirlit á lögbýli á Norðurlandi vestra. Í kjölfarið aflífuðu starfsmenn stofnunarinnar 21 grip til viðbótar á staðnum sökum slæms ástands, allt gripi sem voru hýstir í húsinu.Meira -
Nærandi ferðaþjónusta | Freyja Rut Emilsdóttir skrifar
feykir.is Skagafjörður, Aðsendar greinar 19.04.2024 kl. 09.03Nærandi ferðaþjónusta er hugtak sem fær sífellt meiri athygli í umræðunni bæði hér á Íslandi sem og um heim allan. Hugtakið felur í sér markvissar aðgerðir sem fólk og fyrirtæki geta gripið til með það að markmiði að hafa jákvæð áhrif á nærumhverfi og náttúru og skilja þannig við áfangastaðinn, samfélagið og náttúruna í betra ástandi en áður. Þannig er farið skrefi lengra en sjálfbærni þar sem markmiðið er að skilja ekki við umhverfið í verra ástandi en áður og ganga ekki á auðlindir framtíðar.Meira -
Liðsheildin skilaði þessum sigri - segir Helgi þjálfari
feykir.is Skagafjörður, Íþróttir 19.04.2024 kl. 03.09„Þessi leikur var mjög jafn og spennandi allan tímann, algjör naglbítur tveggja góðra liða sem bæði lögðu allt i að vinna,“ sagði Helgi þjálfari Margeirs þegar Feykir bað hann að lýsa leik Tindastóls og Snæfells í gærkvöldi. „Frábær stemning í húsinu en Snæfell var með flotta stuðningsmannasveit og Síkið vel mannað og stuðningsmannasveitin í essinu sínu,“ en samkvæmt leikskýrslu voru um 300 áhorfendur í húsinu sem gerist ekki á hverjum degi í kvennaboltanum.Meira -
Lið Tindastóls sló út Subway-deildar lið Snæfells
feykir.is Skagafjörður, Íþróttir 18.04.2024 kl. 22.53Það var gleði og gaman í Síkinu í kvöld en sennilega þó ekki síður stress og naglanögun fram á síðustu sekúndu framlengingar þegar Tindastóll og Snæfell mættust í fjórða leik einvígis síns um réttinn til að spila um sæti í efstu deild. Leikurinn var jafn og spennandi allan tímann en gestirnir náðu góðum kafla snemma í fjórða leikhluta, náðu 13 stiga forystu og virtust ætla að tryggja sér oddaleik í Stykkishólmi. Lið Tindastóls gafst ekki upp og náði að jafna í blálokin og tryggja sér framlengingu þar sem heimaliðið reyndist sterkara. Lokatölur 82-78 og rjúkandi stemning hjá Stólastúlkum.Meira -
Jordyn Rhodes komin með leikheimild
feykir.is Skagafjörður, Íþróttir 18.04.2024 kl. 18.42Tindastóll teflir fram liði í þriðja skipti í efstu deild kvennafótboltans eftir ansi gott tímabil síðastliðið sumar. Besta deildin hefst nú á sunnudag og þá kemur FH í heimsókn á Krókinn. Það vita allir að það er bara ein Murr en hún hefur nú skipt um heimavöll og spilar með Fram í sumar í Lengjudeildinni. Jordyn Rhodes tekur hennar stöðu í fremstu víglínu og eru miklar vonir bundnar við hana.Meira
Athugasemdir eru á ábyrgð þeirra sem þær skrá.
Feykir áskilur sér þó rétt til að eyða ummælum sem metin verða sem ærumeiðandi eða ósæmileg.
Smelltu hér til að tilkynna óviðeigandi athugasemdir.